بۇگىن ەلورداداعى باقىتتى پاتەر يەلەرى ر.قوشقارباەۆ داڭعىلى, 80/1 جانە لەپسى, 42/1 ءۇي مەكەن-جايى بويىنشا ورنالاسقان پاتەرلەرىنە كوشتى. ۇيلەر ساتىپ الۋ قۇقىعىسىز جالدامالى باسپانا بەرۋدى قاراستىراتىن «بەرەكەلى باسپانا» تۇرعىن ءۇي باعدارلاماسى اياسىندا قالا اكىمدىگىنىڭ تاپسىرىسى بويىنشا سالىندى.
پاتەر كىلتتەرىن تابىستاۋ راسىمىندە قالا اكىمىنىڭ ورىنباسارى باحتيار ماكەن قۇتتىقتاۋ ءسوز سويلەدى.
«بۇگىن بارلىعى ءۇشىن كەرەمەت مەرەكە! ەلوردادا باسپانا الۋ - ەرەكشە قۋانىش. كوبىسى ارمانداعان تۇرعىن ءۇيدى 10 جىلدان استام ۋاقىت كۇتتى. «بەرەكەلى باسپانا» باعدارلاماسىنان وتكەندەردىڭ بارلىعىنا بۇل مەملەكەت تاراپىنان جاسالعان جاقسى قولداۋ. ەگەر ءسىز بۇرىن بيۋدجەتتىڭ كوپ بولىگىن جەكە تۇرعىن ءۇيدى جالداۋعا جۇمساساڭىز, ەندى ۇنەمدەلگەن اقشانى ارمانىڭىزعا جۇمساي الاسىز, ويتكەنى بۇل ۇيدە جالداۋ باعاسى ايىنا 5000-نان 10000 تەڭگەگە دەيىن بولادى», - دەدى ول پاتەر قوجايىندارىنا.
ولارمەن بىرگە اكىم ورىنباسارى جاڭا پاتەرلەردى قاراپ شىقتى.
كەزەكتە تۇرعانداردىڭ اراسىندا «كوپ بالالى وتباسىلار» ساناتىنداعىلارعا 150 پاتەر, «حالىقتىڭ الەۋمەتتىك ءالسىز توپتارى» ساناتىنا كىرەتىندەرگە - 148 ۇلەستىرىلدى.
ەسكە سالساق, 2019 جىلدىڭ 6 تامىزىنان 12 تامىزىنا دەيىن ەلوردانىڭ تۇرعىن ءۇي قورى ءوزىنىڭ رەسمي ينتەرنەت-رەسۋرستارىندا تۇرعىن ءۇي كەزەگىنە قاتىسۋعا نيەت بىلدىرگەن ازاماتتاردان وسى باعدارلاما بويىنشا قۇجاتتاردى قابىلداۋ باستالعانى تۋرالى حابارلاما ورنالاستىردى. ءوتىنىش بەرۋشىلەردىڭ اراسىندا تاڭداۋ كەزەككە قويىلعان كۇنىنە قاراپ جاسالدى.
