قار قۇرساۋىندا قالعان الپينيستەر ىزدەستىرىلۋدە

قازىرگى ۋاقىتتا تاۋدىڭ ەتەگىندە جاڭبىر تولاستاماي تۇرسا، جوعارى جاعىندا قار جاۋدا. سونداي-اق ىزدەستىرۋ جۇمىستارىن بىرلەسىپ جۇرگىزۋ ءۇشىن قىرعىز الپينيستەرىنىڭ توبى جاساقتالدى. ن.نۇراحمەت جوعارى مامانداندىرىلعان قازاقستاندىق قۇتقارۋشىلار توبى الماتى وبلىسىنىڭ «قارقارا» بازالىق لاگەرىنە 19 تامىز كۇنى ءتۇس الەتىندە، ساعات 13.20-دا جەتكەنىن حابارلادى. الپينيستەردى ءارى قاراي قىرعىزستانعا جەتكىزۋ ءۇشىن قازاۋەقۇتقارۋدىڭ مي-171 بورتى دايىن تۇر.

ەسكە سالا كەتەيىك، 4 تا­مىز­دا «اقساي ترەۆەل» تۋ­ر­يس­تىك كومپانياسى جە­ڭىس شىڭىنا شىعۋدى ۇيىمداستىرعان بولاتىن. بۇل تاۋداعى جورىققا ءۇش ادامنان تۇراتىن قازاقستاندىق الپينيستەر دە قاتىسىپ، 14 تامىزدا اتالعان شىڭعا شىققان بولاتىن. الايدا سول كۇنى جەرگىلىكتى تابيعات رايى كۇرت بۇزىلدى. 15 تامىز كۇنى تاڭعى ساعات 08.15-تە توپ مۇشەلەرى راديوبايلانىس ارقىلى سوڭعى رەت بايلانىسقا شىعىپ، الپينيستەردىڭ ءبىرى الەكساندر چەچۋليننىڭ وكپە قابىنۋىنان قازا بولعانىن حابارلادى. ال شاتىرلار مەن قۇرالداردى جەل ۇشىرىپ كەتكەن. توپتىڭ قالعان مۇشە­لەرىنىڭ ءومىرىن ساقتاپ قالۋ ءۇشىن مۇرات وتەپباەۆ پەن اندرەي كورنەەۆ قاردان ۇڭگىر قازىپ، بوي تاسالاعان كورىنەدى.

الماتى قالاسىنىڭ اكىمى باقىتجان ساعىنتاەۆ تا الەۋمەتتىك جە­­لى­­­دەگى پا­راق­شاسىندا الماتىلىق ال­­پي­نيس­تەردى ىزدەۋ-قۇتقارۋ جۇ­مىس­­تا­رى باس­تالعانىن، حان ءتاڭىرى جاعىنان قۇت­قا­رۋ تىكۇشاعى ۇشقانىن جازعان بولاتىن. الايدا تىكۇشاق­تىڭ ەڭ جوعارى كوتەرى­لە­تىن بيىكتىگى 4500 مەتردەن اسپاي­تىندىقتان، ءارى قاراي ىزدەۋ جۇ­مىستارىن ەرىكتىلەر مەن قۇتقارۋ توبى جالعاستىرۋعا تۋرا كەلەدى.

ال سىرتقى ىستەر مينيس­تر­لىگىنىڭ رەسمي وكىلى ايبەك سما­دياروۆتىڭ حا­بار­لا­ۋىن­­شا، قىرعىزستاننىڭ ىس­تىق­­­­كول وبلىسىنداعى جەڭىس شى­ڭى­نا شىققان ءۇش قازاق­­ستاندىقتىڭ جوعال­عانى تۋرالى اقپارات بىشكەكتەگى قازاق­ستان كونسۋلدىعىنا 17 تامىزدا كەلىپ تۇسكەن. مۇرات وتەپباەۆ، اندرەي كورنە­ەۆ جانە الەكساندر چەچۋلين ەسىم­دى قازاقستان ازاماتتارىنىڭ ۇشەۋى دە كا­سىبي ءارى تاجىريبەلى الپينيستەر.

ديپلوماتتار اتالعان وقيعا تۋرالى قىرعىزستان مەن قازاقستاننىڭ توتەنشە جاعداي قۇرىلىمدارىنا ج­ەدەل حابارلاعان. 18 تامىزدا وسى سا­پاردى ۇيىمداستىرعان تۋريستىك كوم­پا­نياعا تيەسىلى تىكۇشاق الپينيستەر بول­ۋى ىقتيمال اۋماققا ەكى مارتە كوتە­رىل­گەنىمەن جوعالعان ادامداردى تابا المادى. ونىڭ ۇستىنە بۇل اۋماقتا قار كوش­كىنى جۇرگەن ەكەن.

قازاقستان ەلشىلىگىندە جو­عالعان الپي­نيس­تەر­گە بارىنشا كومەك كور­سەتۋ ماقساتىندا جەدەل شتاب قۇرىلدى. ەل­شى­لىك قىزمەتكەرلەرى الپي­نيس­تەر­دىڭ جاقىندارىمەن جانە ءتيىستى قۇزىرلى ورگاندارمەن ءالسىن-ءالسىن سويلەسىپ وتىر. ماسەلەن، م.وتەپباەۆتىڭ تۋىستارى ءتۇنى بويى ەلشىلىكتە بولىپ، ىزدەۋ جۇمىستارىن ۇيلەستىرۋ ماسەلەلەرىنە قاتىستى. قازىر قازاقستان، قىرعىزستان جانە رەسەيدەن شاقىرىلعان كاسىبي الپينيستەر توبىن جەتكىزۋ ءۇشىن قازاقستان تىكۇشاقتارىنىڭ قىرعىزستان اۋما­عى­مەن ۇشۋى­­نا رۇقسات الۋ بويىنشا جۇمىس­تار جۇرگىزىلۋدە. ىزدەستىرۋ توپتارىنىڭ بىرىنە بەلگىلى ال­­پينيست ماقسۇت جۇماەۆ جەتەك­شىلىك جاسايدى دەپ جوسپارلانىپ وتىر. سونىمەن بىرگە ديپلوماتتار Thuraya سپۋتنيكتىك تەلەفون بايلانىسى وپەراتورىنا جوعالعان الپينيستەردەن بەرىلگەن بەلگى اۋماعىن انىقتاۋعا قولداۋ كورسەتۋىن سۇراعان حات جىبەردى.