«بولاشاق» باعدارلاماسىنىڭ العاشقى تۇلەكتەرىنىڭ ءبىرى, سىرتقى ىستەر مينيسترلىگىندە, پرەزيدەنت اكىمشىلىگىندە, Nur Otan پارتياسىندا قىزمەت اتقارىپ, ابدەن ىسىلىپ, 41 جاسىندا ەلىمىزدىڭ ەڭ جاس اكىمى اتانعان باۋىرجان بايبەك لاۋازىمدى ورىنتاققا وتىرعان كۇننەن باستاپ-اق الدىنا ايقىن ماقسات قويىپ, ءتورت جىلدىڭ ىشىندە حالىق يگىلىگى ءۇشىن كوز قۋانتارلىق قاداۋ-قاداۋ شارۋانىڭ باسىن قايىرىپ تاستادى. قالانىڭ بيۋدجەتىنە تۇسكەن قاراجاتتى حالىقتىڭ يگىلىگىنە جۇمساپ, وسى جىلدار ىشىندە اسەم الماتىنى ودان ءارى كورىكتەندىرۋگە كۇش سالدى. ماسەلەن, قالانى كەشەندى دامىتۋعا باعىتتالعان «الماتىنىڭ دامۋ باعدارلاماسى-2020» جوباسىن قابىلداپ, شاھاردى ءار قىرىنان دامىتۋدىڭ جان-جاقتى جەتى باعىتىن ۇسىندى. وندا ەڭ باستىسى الماتىنىڭ ءومىر سۇرۋگە جايلى, قاۋىپسىز قالا بولۋى قاراستىرىلعان. ول ءۇشىن الەۋمەتتىك سالاعا بەت بۇرىپ, ەكونوميكالىق تۇرعىدان تۇراقتى دامۋىنا باسىمدىق بەردى.
قالاي دەسەك تە, قالا اكىمى قوعامعا اشىقتىعىمەن تانىلىپ, ونىڭ ۇسىنىسىمەن ينتەرنەت جەلىلەرىندە اكىمدىكتىڭ اككاۋنتتارى پايدا بولدى. اكىمدىك قىزمەتكەرلەرى الەۋمەتتىك جەلىلەرگە تۇسكەن مىڭداعان ارىز-شاعىمدى قاراپ, ارقايسىسىنا جاۋاپ بەردى. كوپتەگەن تۇرعىنداردىڭ جول, باسپانا, كوممۋنالدىق شارۋاشىلىقتاعى قوردالانىپ قالعان ماسەلەلەرى ءوز شەشىمىن تابا باستادى. الماتىلىقتارعا ارنالعان «Open Almaty» اتتى قوعامدىق قابىلداۋ ورنى اشىلدى.
سونداي-اق الاتاۋ باۋرايىندا ون ءبىر كۇنگە سوزىلىپ, دۇبىرلەپ وتكەن الەمنىڭ 57 مەملەكەتىنەن قاتىسقان XحVIII دۇنيەجۇزىلىك قىسقى ۋنيۆەرسيادانىڭ جوعارى دەڭگەيدە وتكىزىلۋى ەرەكشە ەستە قالدى. ءدال مۇنداي اۋقىمدى ءارى ماڭىزدى دودانىڭ ەلىمىزدە بۇرىن-سوڭدى وتپەگەنىن ەسكەرسەك, ونىڭ الەمدىك دەڭگەيدە ۇيىمداستىرىلىپ, ابىرويمەن اتقارىلۋىندا دا بايبەك مىرزانىڭ ەڭبەگى ەرەن.
«الماتى – قورشاۋسىز قالا» باعدارلاماسى بويىنشا شاھارداعى ەسكى دۋال مەن قورشاۋلار الىندى. قورشاۋسىز قالا – قاۋىپسىز قالا. دەمەك, ونداي جەرلەردە قىلمىسقا جول بەرىلمەيدى, حالىق الاڭسىز دەمالادى. قانشاما شاقىرىم جەراستى ەسكىرىپ, شىرىگەن قۇبىرلار اۋىستىرىلدى. ءتۋريزمدى دامىتۋدىڭ جول كارتاسىمەن «قتج» ۇك» اق-مەن بىرگە «الماتى-1» جانە «الماتى-2» ۆوكزالدارى قايتا جوندەۋدەن وتكىزىلۋدە. سونداي-اق «سايران» اۆتوۆوكزالى مەن وعان ءتيىستى اۋماق جانە اتاقتى «ساياحات» اۆتوبەكەتى قايتادان قالپىنا كەلتىرىلمەك. «يۋجنىي» ساياباعى جاڭاشا تۇرلەنبەك. «الماتىنى دامىتۋدىڭ 50 درايۆەرىنىڭ» ءبىرى بولىپ تابىلاتىن جاياۋ جۇرگىنشىگە باسىمدىق بەرەتىن قايتا جاسالعان «استانا» الاڭى اشىلدى. بوساعان كەڭىستىكتەرگە ۆەلوجولدار سالىنىپ, گرانيت تاس توسەلگەن. بۇدان وزگە, الاڭنىڭ قوس جاقتاۋى دەرندەرمەن كوگالداندىرىلىپ, لاۆاندا كلۋمبالارى قويىلعان. ساتىلى ەسپلانادا جاڭارتىلىپ, ولاردىڭ الدىنا كلاسسيكالىق ستيلدە ءتۇن مەزگىلىندە ەرەكشە جارىقپەن نۇرلاناتىن ەكى قۇرعاق فونتان ورناتىلعان. جالپى, مەگاپوليستە 23 شاقىرىم ۆەلوسيپەدكە ارنالعان جولدار سالىنعان.
سونىمەن قاتار بىرنەشە كوشەگە بىرجاقتى جول قوزعالىسى ەنگىزىلدى. بۇل جوبا كوشە-جول قوزعالىسى جەلىسىنە تۇسەتىن جۇكتەمەنى ازايتۋعا جانە كولىك قۇرالدارىنىڭ ورتاشا جىلدامدىعىن ارتتىرۋعا مۇمكىندىك بەرەدى. جۇرگىنشىلەردىڭ قاۋىپسىزدىگىن قامتاماسىز ەتۋ ماقساتىندا زاڭسىز كولىك تۇراقتارى الىنىپ, ورنىنا جاياۋ جۇرگىنشى جولدارى رەتكە كەلتىرىلدى. بارلىق جەراستى وتپەلى جولىنداعى ساۋدا نۇكتەلەرىن جاۋىپ, كۇردەلى جوندەۋدەن وتكىزدى. قازىر وندا كۇي كۇمبىرلەپ, قازاقشا اۋەندەر ويناپ تۇر. پانفيلوۆ, جىبەك جولى, گوگول, قابانباي باتىر, بايسەيىتوۆا, تولەباەۆ, ت.ب. كوشەلەر تۇگەلدەي جاڭاردى. ونداعى بۇرىنعى قارا ءاسفالتتىڭ ورنىنا قىرلانعان كەسپە تاس پەن گرانيت توسەلىپ, تاپ-تۇيناقتاي. اسىرەسە جاياۋ جۇرگىنشىلەر جۇرەتىن اربات جارقىراپ تۇر. ال پانفيلوۆ كوشەسىنىڭ ءبىراز جەرىن كولىك جۇرگىزبەي, ەرتەلى-كەش حالىق سەرۋەندەپ, دەمالاتىن ورىنعا اينالدىردى.
2 ميلليونعا جۋىق حالىق تۇراتىن مەگاپوليس ءۇشىن تاعى ءبىر تاماشا تارتۋ – باستاۋىن اق باس الاتاۋدان الىپ, ارۋ قالا الماتىنى قاق جارىپ اعاتىن ەسەنتاي وزەنىنىڭ بويى – حاميت ەرعالي جاعالاۋىنىڭ ءال-فارابي داڭعىلىنان جاماقاەۆ كوشەسىنە دەيىن كەرەمەتتەي اباتتاندىرىلۋى. بۇرىنعى اكىمدەردىڭ دە ەڭبەگىن ايتا كەتۋ كەرەك, ولار ءال-فارابي داڭعىلىنان تومەن گوگول كوشەسىنە دەيىن وزەننىڭ ەكى جاعىن حالىق قىدىرىپ, سەرۋەندەيتىن تەرەنكۋر جاساپ, سپورتپەن جاتتىعاتىن, سونداي-اق بالالارعا ارنالعان الاڭداردى سىيعا تارتقان-دى. ال ەندى ءال-فارابي داڭعىلىنان تاۋعا قاراي وزەن بويىمەن الماتىلىقتار مەن قالا قوناقتارى دەمالىپ, قىدىراتىن وسىنداي عاجاپ دەمالىس ورنىن جاساۋعا بولادى ەكەن دەپ ەشكىم ويلاماعان ەدى.
قازىر الاتاۋىمىزدىڭ دا, سارقىراپ اعىپ جاتقان تاۋ وزەنىنىڭ دە القىمى كەڭەيىپ, اجارى اشىلا تۇسكەن. ونى ايتقاننان گورى ءبىر رەت كەلىپ, كوزبەن كورگەنگە جەتپەيدى. وزەننىڭ ەكى جاق ساعاسىن قوسىپ ەسەپتەگەندە 4 شاقىرىمعا (20 مىڭ تەكشە) جاپوندىقتاردىڭ جاعانى بەكىتۋ تاسىلىمەن تابيعي تاستار (گابيون) تەمىر تورعا سالىنىپ, ءورىلىپ كومكەرىلگەن. وزەننىڭ ارعى-بەرگى بەتىنە ەركىن وتەتىن پلوتينادان ءبىر, جوعارىدان ەكى كوپىر سالىنىپ, ەدەنى توسەلىپ, جاقتاۋى اعاشپەن قاپتالدى. بۇرىنعى شاعىن توعان كەڭەيتىلىپ, جان-جاعى تسەمەنتتەلىپ, سىرلاندى. ساعانى بويلاي وسكەن بۇرىنعى اعاشتار تۇگەلىمەن الىنىپ, ورنىنا جاس تالدار وتىرعىزىلدى. كوكوراي شالعىن ءشوپ ەگىلىپ, جاپ-جاسىل الاڭقايعا اينالعان. ارالىعى 25-30 مەتردەن 150 قوقىس جاشىگىمەن قوسا ورىندىق ورناتىلسا, ونىڭ 80-ءىنىڭ كولەڭكە, جاۋىننان باس ساۋعالايتىن شاتىرى بار. ارىق تا ويلاستىرىلعان. وزەننەن ءسال قاشىقتاۋ جەردە ەركىن اڭگىمەلەسىپ وتىرۋعا ارنالعان 10 كوركەمدەلگەن كۇركە قويىلعان. بالالارعا ويناۋعا, ەرەسەكتەرگە جاتتىعۋ جاساپ شىنىعۋعا ارنالعان نەشە الۋان اۋلالىق ترەناجەرلەر ورنالاسقان ەكى فيتنەس الاڭقايى بار. ەندى دەيمىن-اۋ, پالەنشە مىڭ تەڭگەگە فيتنەس كلۋبقا بارعانشا ءجۇرىپ, بولماسا جۇگىرىپ كەلىپ وزەن بويىندا تازا اۋادا جاتتىعۋ جاساۋعا بارلىق جاعداي بار.
اسىرەسە كەشكى ەسەنتايدىڭ جاعالاۋىن كورگەن دە ارماندا, كورمەگەن دە ارماندا. سامالاداي جارقىراپ تۇر. بۇل كورىنىستەردىڭ شاھارعا ءسان بەرگەنى ءوز الدىنا, ەڭ باستىسى كوپ قاباتتى ۇيلەردە شىلىڭگىر شىلدەنىڭ ىستىعىنان, قالانىڭ قاپىرىعىنان ء«ۇپ» دەگەن جەلگە زار بولعان تۇرعىنداردى تاۋ اڭعارىنان سوققان سامال جەل ايمالاپ, جەلپىنتىپ, سەرگىتىپ تاستايدى. ال تاڭەرتەڭگىلىك توعانعا ۇشىپ كەلىپ, الاڭسىز ءجۇزىپ جۇرگەن جابايى ۇيرەكتەر دە سانگە ءسان, كورىككە كورىك قوسۋدا. سەنبى, جەكسەنبى كۇندەرى ءتۇننىڭ ءبىر ۋاعىنا دەيىن ۇلكەنى-كىشىسى بار, بالا-شاعاسىمەن ەمەن-جارقىن سەرۋەندەگەن الماتىلىقتارعا قىزىعا قارايسىڭ. ءتىپتى دەمالىس كۇندەرى حالىقتىڭ كوپتىگى سونشا, تروتۋار تارلىق جاسايتىنداي. وسى ساتتەردى كورگەندە ەسىمە مۇحيتتىڭ ارعى بەتىندەگى امەريكانىڭ برايتون-بيچ (نيۋ-يورك, برۋكليننىڭ ەڭ شەتكى وڭتۇستىك اۋماعى) اۋدانىنداعى اتلانت مۇحيتىنىڭ جاعالاۋىندا كەشكىسىن جاپپاي سەرۋەنگە شىعاتىن ەميگرانتتاردىڭ تۇسكەنى بار.
...2007 جىلى اقش-تىڭ قازاقستانداعى ەلشىلىگىنىڭ ۇيىمداستىرۋىمەن ورتالىق ازياداعى مەديتسينا تاقىرىبىنا جازاتىن جۋرناليستەر ارنايى ىسساپارمەن 21 كۇن سول ەلدە بولىپ, التى شتاتىن ارالاپ قايتقانبىز. ساپارلاس بولعان تۇرىكمەن قىزىنىڭ ارقاسىندا كەزىندە تۇرىكمەنستاننان امەريكاعا قونىس اۋدارىپ, نيۋ-يوركتىڭ ەڭ ءىرى اۋدانىنىڭ ءبىرى برايتون-بيچتە تۇراتىن ەۆرەي اعايىنداردىڭ ۇيىندە قوناقتا بولۋدىڭ ءساتى تۇسكەن-ءدى. اۋدان اتلانت مۇحيتىنىڭ جاعالاۋىنا ورنالاسىپ, وندا نەگىزىنەن كسرو-دان كەلگەن ەميگرانتتار كوپ قونىستانعان ەكەن. ءۇي يەلەرى كەشكى تاماقتان سوڭ وزدەرىنىڭ كۇندەلىكتى داعدىلارى بويىنشا جاعالاۋعا شىعىپ, جاتار الدىندا سەرگىپ قايتاتىندارىن ايتىپ, ءبىزدى دە قىدىرىپ قايتۋعا شاقىردى.
جاعالاۋدا ءبىر مەزەتتە سونشاما ادام جۇرەدى دەپ كىم ويلاعان. ەنى 100-150 مەتردەي تاقتاي توسەلگەن ۇزىن-سونار جاعالاۋىڭىزدا ەرسىلى-قارسىلى جۇرگەن حالىق. ەسكىرگەن بولۋى كەرەك, باسقان سايىن تاقتايدىڭ سىقىرى اجەپتاۋىر ەستىلەدى. ءبارى ورىسشا سويلەيدى. سوندا «شىركىن-اي, ءبىزدىڭ ەسەنتايدىڭ جاعالاۋىن وسىلاي حالىق كەشكە قىدىراتىن ورىن جاساسا عوي» دەگەن ويدىڭ جىلت ەتكەنى بار. بىراق «قايدان» دەپ قويا سالعانمىن. ارماندار ورىندالادى دەگەن, ەندى, مىنە, ەسەنتايدىڭ جاعاسى قۇددى برايتون-ءبيچتىڭ جاعالاۋىنان ارتىق بولماسا كەم ەمەس. بۇگىندە جاعالاۋعا كەلگەن سايىن كەۋدەمدى سونداي ءبىر قۋانىش سەزىمى بيلەپ, ەسەنتايعا جۇرتتىڭ ءبارىن شاقىرعىم كەلىپ تۇرادى. كەرەمەت! عاجاپ!
بۇگىندە ح.ەرعالي جاعالاۋىن اباتتاندىرۋ جۇمىستارى اياقتالىپ قالدى. حالىق تروتۋار سالىنىسىمەن قۇرىلىسشىلارمەن جاعالاسىپ جۇرە باستاعان سوڭ, ماۋسىم ايىندا رەسمي تۇردە اشقان-دى. قازىر قالعان مايدا-شۇيدە جۇمىستارى جۇرگىزىلۋدە. وسى مۇمكىندىكتى پايدالانىپ, اۋقىمدى قۇرىلىستى قولعا الىپ, قىستان بەرى قىرۋار جۇمىس جۇرگىزگەن مەردىگەر كومپانياعا, ونىڭ باسشىسىنا الماتىلىقتار اتىنان مىڭ دا ءبىر العىسىمىزدى جەتكىزگىمىز كەلەدى.
ءبارى جاقسى, حالىق ريزا. تاڭ سارىدەن شىققان جۇرگىنشىلەر ءبىر-بىرىمەن امانداسىپ, كىممەن سويلەسپەسەڭ دە بايبەك مىرزاعا العىستارىن جاۋدىرىپ, «بايبەككە راحمەت! مىناۋ بايبەكتىڭ بەل بالاسى بولدى-اۋ» دەپ جاتقانى. ولاردىڭ اراسىندا بەلگىلى تۇلعالاردى كورگەندە, شۇرقىراسىپ اڭگىمەلەسىپ قالامىز. مەن تانيتىنداردىڭ ءوزى ءبىر قاۋىم. ەسەنتايدىڭ بايىرعى جۇرگىنشىلەرى كورنەكتى اقىن-جازۋشى اعالارىمىز, قانشاما ارداگەر عالىمدار, اتاقتى سپورتشىلار, تابيعاتتى جاقسى كورەتىن فاناتتار, ءبىر قۋانتارلىعى جاستار كوپ. قالانىڭ باسقا اۋداندارىنان جاياۋ-جالپىلاپ تا, كولىكتەرىن وزەنگە جاقىن جەردەگى تۇراققا قويىپ تا كەلەتىن قىدىرۋشىلاردىڭ قاراسى كوپ.
دەسەك تە, «بىتكەن ىسكە سىنشى كوپ» دەگەن, تاپسىرىس بەرۋشى الماتى قالاسى اكىمدىگىنە بۇكىل جۇرگىنشىلەر اتىنان ايتار بۇيىمتايىمىز دا بار. ماقساتىمىز – اكىمدىك كومپانيادان نىساندى قابىلداپ الماي تۇرىپ, سول ولقىلىقتاردىڭ ورنىن تولتىرسا, نۇر ۇستىنە نۇر بولار ەدى.
بىرىنشىدەن, سوناۋ گوگول كوشەسىنەن جاماقاەۆ كوشەسىنە دەيىنگى قانشاما شاقىرىم ارالىقتا ءبىر اجەتحانانىڭ جوقتىعى. سوندىقتان ءال-ءفارابيدىڭ جوعارى جاعىنان اقىلى تۇردە بولسا دا اجەتحانا سالىنسا. بولماسا بيبي-اجەتحانالار ورناتىلسا. قىسى, جازى سۋ اعىپ تۇر. ورىن دا جەتكىلىكتى. بۇل جونىندە مەردىگەر قۇرىلىس كومپانياسىنىڭ ماماندارىنان سۇراعانىمىزدا, اجەتحانا جوباسىنىڭ قاراستىرىلماعانىن ايتتى. ماسەلەن, تۇڭعىش پرەزيدەنت اتىنداعى دەمالىس پاركىندە كىرەبەرىستە ۇلكەن اجەتحانا ويلاستىرىلىپ سالىنعان.
ەكىنشىدەن, جاعالاۋ – جالپى قالا جۇرتشىلىعى دەمالاتىن, سەرۋەندەيتىن قوعامدىق ورىن بولعاندىقتان, ونىڭ قاۋىپسىزدىگى مىندەتتى تۇردە باقىلانسا. قازىردىڭ وزىندە ازىرگە ءبىر كۇركەگە ۇستەل ورىندىعىمەن قويىلىپ ەدى, تاڭەرتەڭ ماسكۇنەم-قاڭعىباس «اعايىندارىمىز» اكەلەرىنىڭ ۇيىندە وتىرعانداي باستارىن جازىپ, گۇجىلگە باسىپ راحاتتانۋدا. ەستۋىمىزشە, تولە بي كوشەسىنەن تومەن وزەن جاعالاۋىنداعى كۇركەنى بۇزاقىلار ورتەپ جىبەرگەن. ونىڭ ۇستىنە قانشاما قويىلعان ورىندىق, كۇركەلەر, فيتنەس الاڭقايلارىن نەشە ءتۇرلى مىنەزدى ادامدار بار, نەبىر ءتارتىپ بۇزاتىنداردان ساقتاندىرۋ ماقساتىندا سولارعا سەس بولاتىنداي جاعالاۋدىڭ ەكى جاعىنا كۇندىز-ءتۇنى باقىلايتىن كۇزەت بەكەتى كەرەك. ءارى سول جەرگە جۇرگىنشىلەر كەلىپ, تروتۋاردىڭ كەم-كەتىك جەرلەرىن ايتىپ جاتسا, ونى پوليتسەيلەر ءتيىستى ورىندارعا جەتكىزىپ وتىرسا قۇبا-قۇپ بولار ەدى. بولماسا ءبىر ادامعا شتات اشىپ, باسشى ەتىپ بەكىتىپ, مىندەتتەسە. سەبەبى ويىڭدى ايتىپ, بولماسا ەسكەرتۋ جاسايىن دەسەڭ, جان ادام تاپپايسىڭ. ال ەرتەلى-كەش نىساندى ارالاپ كورىپ, باقىلاپ تۇرۋدا نۇر-سۇلتان قالاسىنداعى سياقتى كۇزەت پوليتسەيلەرى ۆەلوسيپەدپەن, بولماسا ەلەكتر توگىمەن جۇرەتىن شاعىن كولىكپەن قامتاماسىز ەتىلسە.
ۇشىنشىدەن, پلوتينانىڭ ۇستىندەگى كوپىر شاتىرمەن جابىلسا. ونداعى ورناتىلعان اۋلالىق ترەناجەرلەرمەن كۇننىڭ ىستىعىندا دا, جاۋىن-شاشىندى, قارلى كۇندەرى جاتتىعۋلارىن ۇزبەي جاساۋعا مۇمكىندىك تۋادى ءارى باس ساۋعالايتىن ورىن بولادى. سونداي-اق كوپىرگە بەينەكامەرا ورناتىلسا, قاي ۋاقىتتا الاڭسىز وتىرادى. ارينە تازالىقتى ساقتاپ, باقىلاۋدا ۇستاۋ ءوز الدىنا ءبىر ماسەلە.
تورتىنشىدەن, قازىر مۇندا يت جەتەكتەۋشىلەردىڭ قاراسى كوبەيگەن. ولار كىرمە جول ارقىلى توعانعا ءتۇسىپ, سۋ كەشىپ ويناقتاپ, كۇندە ەرتەلى-كەش كەلىپ قوناتىن جابايى ۇيرەكتەردى ۇركىتۋدە. سوندىقتان ولارعا سۋعا تۇسۋگە رۇقسات ەتىلمەيتىندەي كورنەكى جەرگە ماڭدايشا جازۋ جازىلىپ, قاداعالاپ وتىرسا.
مىنە, وسىنداي ەسكەرتپەلەرگە الماتى قالاسىنىڭ اكىمى بولىپ جاڭادان تاعايىندالعان باقىتجان ساعىنتاەۆ وڭ كوزبەن قارايدى دەگەن سەنىمدەمىز. وعان نەگىز دە جوق ەمەس. جاڭا باسشى كەلە سالا مەگاپوليستەگى بىرقاتار باسقارما, اۋدانداردىڭ جۇمىسىمەن تانىسىپ, ناقتى تاپسىرمالار بەرىپ ۇلگەردى. سوڭعى جىلدارى قالا بيلىگى بار نازارىن قالانىڭ ورتالىق بولىگىنە اۋدارىپ كەلسە, ساعىنتاەۆ مىرزا ۇلكەن شاھاردىڭ قاي جەرىنە, قاي شەتىنە بارماڭىز – بارلىق جاعىنان كورىكتى دە اسەم قالا ەكەندىگى سەزىلىپ تۇرۋى كەرەك دەگەن قاعيدانى ۇستانۋى قالالىقتاردىڭ كوڭىلىنە جاعىپ وتىر.
ول راس. الماتىنىڭ شەكارالىق اۋماعى جىلدان-جىلعا كەڭەيىپ, حالقىنىڭ سانى ارتىپ كەلەدى. دالىرەك ايتقاندا, تۇركسىب, ناۋرىزباي, الاتاۋ, بوستاندىق اۋداندارىنىڭ الەۋمەتتىك-ەكونوميكالىق جاعدايىمەن تانىسقان پرەزيدەنت قاسىم-جومارت توقاەۆتىڭ تاپسىرماسىنا سايكەس قالانى دامىتۋدىڭ «شەتسىز قالا» تۇجىرىمداماسىن قابىلداپ, وندا مەگاپوليستەگى ءار اۋداننىڭ ورتالىقتاندىرىلىپ, ماڭايى قاجەتتى ينفراقۇرىلىمدارعا قولجەتىمدى بولۋىن مىندەتتەۋدە. بۇل ءوز كەزەگىندە حالىقتىڭ قالا ورتالىعىنا قاراي سابىلۋىن سايابىرسىتۋعا سەپتىگىن تيگىزبەك. «...شەتكى اۋداندار مەن قالانىڭ ورتالىعى جاقىنداستىرىلىپ, الماتىنىڭ كەز كەلگەن اۋدانى – مەگاپوليستىڭ ايناسىنا اينالۋى ءتيىس», دەيدى بۇگىندە كۇڭگەيىندەگى باس قالانىڭ تىزگىنىن ۇستاعان, سوڭعى جىلدارى رەسپۋبليكا ۇكىمەتىن تابىستى باسقارىپ, ەلىمىزدىڭ وركەندەپ, دامۋىنا وزىندىك ۇلەسىن قوسقان ۇتقىر دا كانىگى باسشى باقىتجان ساعىنتاەۆ. ەندەشە, ىسكە ءسات, اكىم مىرزا!
...بىردە سىيلاس كۋرستاس قۇربىم, دوسىم داريعاش تەلەفونداپ: «قىز-اۋ, داريانىڭ جاعاسىنا شىقپايمىز با؟» دەپ قىدىرۋعا شاقىرعانى بار. سول ايتپاقشى, قالا حالقى ءۇشىن ەسەنتاي وزەنى الماتىلىقتاردىڭ سىردارياسى, ءامۋدارياسى ەمەس پە! امەريكالىقتارشا ايتقاندا, برايتون-ءبيچى ەمەس پە؟ «جاقسىنى كورمەك ءۇشىن», الماتىلىقتاردى حاميت ەرعالي جاعالاۋىنا سالقىنداپ, بوي جازىپ قايتۋعا شاقىرامىز. ء«تان قوزعالسا, جان قۋانادى» دەگەن, كەلىڭىزدەر, كورىڭىزدەر!..
گۇلزەينەپ سادىرقىزى,
«Egemen Qazaqstan»
