ايماقتار • 19 تامىز، 2019

قوبىزدىڭ قۇنى

254 رەت كورسەتىلدى

ۇلتتىق اسپاپتارىمەن قاتار اعاشتان جاساعان تۋىندىلارى جوعارى باعالانىپ جۇرگەن تۇركىستاندىق شەبەر داۋرەن ءمينشاريپوۆتى ىزدەيتىندەردىڭ اراسىندا شەتەلدىك تۋريستەر دە كوپ. تۋىندىلارىن دۇكەندەرگە، ساۋدا ورىندارىنا قويمايتىن شەبەردىڭ قولىنان شىققان دۇنيەنى ىزدەگەندەر شەبەرحاناسىنان تابادى.

و.تاڭسىقباەۆ اتىنداعى الماتى ساندىك-قولدانبالى ونەر كوللەدجىندە ءمۇسىن­شى ماماندىعىن العاننان كەيىنگى 15 جىل اعاش شەبەرى رەتىندە ەڭبەك ەتىپ جۇرگەن داۋرەننىڭ تابىسى جاقسى. شەبەردىڭ اڭسارى، اسىرەسە قوبىز جاساۋعا اۋىپ تۇرا­دى ەكەن. ءار قوبىزدى جاساۋ­عا كەمىندە ءبىر اي ۋاقىت جۇم­سايدى. ودان دۇرىس ءۇن شىق­قانىن باقىلاۋ ءۇشىن ءوزى قوبىز تارتۋدى ۇيرەنىپ العان. العاشقىدا تۋىندى­لارىن كورمەگە قويىپ، كورەرمەن­نىڭ كە­يىپىنە ەنە كوپشىلىك­تىڭ پىكىرىن ءبىلىپ ءجۇرىپتى. ءسوي­تىپ ايتىلعان سىن-ەسكەرت­پە­لەردى سارالاعان. بۇگىن­گى تاڭدا تاراز، شىمكەنت، نۇر-سۇلتان، الماتى قالالارىندا قوبىزعا سۇ­رانىس جوعارى ەكەن. شەبەر مۋزىكالىق مەكتەپتە ءبىلىم الاتىن شاكىرتتەرگە قارا­پايىم اسپاپتى 60 مىڭ تەڭگەگە، وتاندىق جانە الەمدىك ساحنادا ونەر كور­سەتىپ جۇرگەن تالانتتارعا ەرەكشە ديزاينمەن 1000 اقش دوللارىنان جوعارى باعاعا قوبىز جاسايدى.

«باعانى بەلگىلەگەندە اسپاپتىڭ كولەمى مەن كەتكەن ماتەريالىن عانا ەسەپتەسەم، بازارداعى ساتۋشىدان پارقىم قالمايدى عوي. ءوزىم جۇمىس بارىسىندا قانداي كۇيدە بولعانىما بايلانىستى باعا بەلگىلەيمىن. ۇلتتىق اسپاپ جاساۋعا اسا نازىك­تىك پەن سەزىمتالدىق، ەرەك­شە سۇيىسپەنشىلىك قاجەت. جۇي­كەگە تۇسەتىن سالماق تا از بولمايدى. ياعني، قوبىز­دىڭ قۇنى مەن ءۇشىن وتە ج­وعارى. تۋىندىلارىمدى تۇتىن­ۋ­شىعا اماناتتايمىن.  جاسىراتىنى جوق، كوپ دا­نامەن تارايتىن جۇمىس­تارىمنىڭ قۇنىن تومەنىرەك باعالايمىن. سەبەبى ول داع­دىلى تۇردە جاسالادى»، – دەيدى شەبەر.

ىلگەرىدە وتكەن ۇلت­تىق اسپاپ جاسايتىن قولونەرشىلەر بايقاۋىنا شەبەر قىلقوبىز جانە نار­قوبىز جاساپ قاتىسقان. ساحنا تورىنەن نارقوبىزدىڭ ءۇنى ەستىلگەندە، تىڭدارماندار تاڭدانىسىن جاسىرا الماپتى. نارقوبىز سول بايقاۋدا جەڭىس سىيلاعان. شەبەردىڭ ايتۋىنشا، نارقوبىزدى جاساۋدان بۇرىن قولجاز­بالاردى قاراپ، اسپاپتى ۇزاق ۋاقىت زەرتتەگەن. ياعني، بۇل جەڭىس ۇزاق ىزدەنىس پەن توككەن تەردىڭ ناتيجەسى. كومپوزيتسيالىق تۋىندىلارى اراسىندا شەبەردىڭ كوڭىلىنە جاقىندارى دا از ەمەس. تاۋەلسىز ەلىمىزدىڭ بول­مىسىن ەركىندىكتىڭ اۋقى­مىنا سىيدىرۋعا تالپىنىس جاساعان «ساياتكەرلىك» كومپوزيتسياسى ءوزى ۇناتاتىن ەڭ­بەكتەرىنىڭ ءبىرى. «بۇركىتتى قولىنا قوندىرىپ، كوكتى اڭساعان ساياتشى بالا ءار قازاقتىڭ اۋىلعا دەگەن ساعىنىشىن ارتتىرادى. قازاق پەن اۋىل ەگىز ۇعىم عوي.  ۇلتى قازاق ازامات­تار­دان تىس شەتەلدىك تۋريس­تەر ەلەڭ ەتىپ، حالىقارالىق كور­مەلەردە تۋىندىنىڭ الدىندا ساعاتتاپ تۇرىپ الادى»، – دەيدى داۋرەن مينشاريپوۆ.

شەبەر ءوز تۋىندىلارىنا ەرەكشە ساپاداعى اعاش­تى قولدانادى. ارنايى تاپ­سىرىسپەن باسقا وڭىر­لەردەن دە الدىرادى ەكەن. قاراعاش، ۇيەڭكى، جاڭعاقتى قولداناتىن شەبەر اعاشتى ارنايى قويمادا ءبىر جىل ساقتايدى. دايىن تۋىندىسىن لاكتامايدى، تابيعي ءتۇسىن ساقتاۋ ءۇشىن اس دايىن­داعاندا قوساتىن مايدى پايدالانادى.

 

تۇركىستان وبلىسى

 

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار