ازاماتتىق ءۇن
جۇما, 7 ماۋسىم 2013 2:25
كەشە «نۇر وتان» حالىقتىق-دەموكراتيالىق پارتياسىنىڭ ورتالىق وفيسىندە پارتيا توراعاسىنىڭ ورىنباسارى باۋىرجان بايبەك قوعامدىق قابىلداۋ وتكىزدى.
ب.بايبەكتىڭ وسىعان دەيىنگى ايماقتاردى ارالاعان ساپارلارىندا قوعامدىق قابىلداۋلار وتكىزگەنى جاقسى ءمالىم. ال بۇل جولعى ەلورداداعى قابىلداۋىنا نەگىزىنەن ازاماتتىق ۇستانىمدارى ايقىن, ەلگە قاجەتتى ىسكە جانى اۋىراتىن بەلسەندى قوعامدىق ينستيتۋتتاردىڭ وكىلدەرى كەلىپتى.
جۇما, 7 ماۋسىم 2013 2:25
كەشە «نۇر وتان» حالىقتىق-دەموكراتيالىق پارتياسىنىڭ ورتالىق وفيسىندە پارتيا توراعاسىنىڭ ورىنباسارى باۋىرجان بايبەك قوعامدىق قابىلداۋ وتكىزدى.
ب.بايبەكتىڭ وسىعان دەيىنگى ايماقتاردى ارالاعان ساپارلارىندا قوعامدىق قابىلداۋلار وتكىزگەنى جاقسى ءمالىم. ال بۇل جولعى ەلورداداعى قابىلداۋىنا نەگىزىنەن ازاماتتىق ۇستانىمدارى ايقىن, ەلگە قاجەتتى ىسكە جانى اۋىراتىن بەلسەندى قوعامدىق ينستيتۋتتاردىڭ وكىلدەرى كەلىپتى.
«وتباسىلىق تاربيە» جشس-ءنىڭ باس ديرەكتورى سوفيا ەۆدوكيموۆا قابىلداۋعا وتباسىلىق قۇندىلىقتاردى قاسيەتتەۋگە نەگىزدەلگەن جوبالارىن ارقالاي جەتىپتى.
ءۇش جىل بۇرىن قۇرىلعان ينستيتۋت وسى ۋاقىت ىشىندە وتباسىنىڭ ىرگەسى بەكۋىنە قاتىستى وزدەرى اتسالىسقان بىرنەشە باعدارلامالارىن ايتا كەلە, بۇل رەتتە ەلىمىزدە ارنايى ماماندانعان پەداگوگ-پسيحولوگتاردىڭ ازدىعىنا توقتالدى. سول ولقىلىقتىڭ ورنىن تولتىرۋ ءۇشىن وبلىستاردان كەلگەن پەداگوگ-پسيحولوگتاردىڭ ينستيتۋت قابىرعاسىندا بىلىكتىلىكتەرىن ارتتىرعانىن, وعان ەلىمىزدىڭ ءبىلىم جانە عىلىم مينيسترلىگى تاراپىنان قولداۋ تابىلعانىن, كەرىسىنشە, وتباسىنىڭ ىرگەسى قالانار ساتتە ولارمەن جۇمىس جاسايتىن احاج-ورتالىقتارىندا پسيحولوگ مامانداردىڭ مۇلدە جوقتىعىن ايتىپ, ادىلەت مينيسترلىگىنە جازعان حاتىنا جاۋاپ بولماي وتىرعانىن جەتكىزدى. سونىمەن قاتار, قورعانىس, دەنساۋلىق ساقتاۋ مينيسترلىكتەرىنە دە بىرنەشە رەت حات جازىپ, جاۋابىن كۇتىپ, ەكى كوزدەرى ءتورت بولعانىن تىلگە تيەك ەتتى. وسىلايشا ءوزى ءۇشىن ەمەس, كوپ ءۇشىن شىرىلداعان س.ەۆدوكيموۆا نۇروتاندىقتاردان وزدەرى اتقارىپ جۇرگەن جۇمىستارىنا قولداۋ كورسەتۋدى سۇرادى.
پارتيا توراعاسىنىڭ ورىنباسارى: «سوفيا لۆوۆنا, ءسىزدىڭ بەلسەندى ازاماتتىق كوزقاراسىڭىزعا الدىمەن العىسىمدى بىلدىرگىم كەلەدى. جەكە باسىڭىزدىڭ قامىمەن ەمەس, بۇكىل قوعامىمىز ءۇشىن قاجەتتى, اسا ماڭىزدى ىسپەن پارتياعا سەنىم ارتىپ كەلگەنىڭىز وتە قۋاتتالاتىن قادام. بۇل – ءبىزدىڭ پارتيالىق دوكترينامىزبەن وتە ۇندەس, ەلباسىنىڭ ءوزى ۇنەمى نازارىندا ۇستايتىن ماسەلە. سوندىقتان پارتيا, الدىن الا ايتايىن, باستامالارىڭىزدى قولدايدى, ال ونىڭ قانداي باعىتتاردا جۇرەتىنى وزدەرىڭىزبەن اقىلداسا وتىرىپ, ءبىر ايدىڭ ىشىندە شەشىلەدى», دەپ جاۋاپ بەردى.
قوعامدىق قابىلداۋدىڭ ەندىگى ءوتىنىش ءبىلدىرۋشىسىنىڭ دە ويلاعانى بالالار قامى ەكەن. بالالار مەكەمەلەرى مەن مەكتەپتەردە دۇرىس تاماقتانۋ ماسەلەسىمەن اينالىسىپ جۇرگەن مارات باەلەۆ بالالاردىڭ تاماقتانۋىندا بىرىڭعاي ۇلگى-قالىپتىڭ جوقتىعىن العا تارتتى. مۇنىڭ ۇستىنە ەلىمىز بويىنشا كوپتەگەن مەكتەپتەردە وقۋشىلارعا ىستىق تاماق تا بەرىلمەيدى ەكەن. ەگەر پايىزعا شاعىپ ەسەپتەسە, ول 69-دان كوتەرىلىپ كورمەپتى. ستاندارت جوقتىعىنان اسحانالارعا اكەلۋگە بولاتىن ازىق-ت ۇلىكتەردىڭ رەەسترى جاسالماعان. ونىڭ ارتى كوبىنە مەكتەپ اسحانالارىنا بالالار اعزاسىنا زياندى تاعامدار ەنىپ كەتۋ تاۋەكەلىن ارتتىرادى.
وسىلاي دەگەن مارات سەمباي ۇلى دەنساۋلىق ساقتاۋ مينيسترلىگىندە بالالار ديەتولوگى شتاتىنىڭ قاراستىرىلماعانىن العا تارتتى. ەلدىڭ بولاشاعى بالالاردىڭ دەنساۋلىعىنا قاتىستى ماسەلەگە پارتيا تاراپىنان قولداۋ سۇراعان قوعامدىق ۇيىم وكىلى وسى ماڭىزدى پروبلەمانى جونگە قوياتىن زاڭدىق نەگىز قالانۋى قاجەت دەگەن ويىن جەتكىزدى. ماسەلەنىڭ ءمانىسىن تۇبىرىنەن ۇعىنعان ب.بايبەك: «ويلارىڭىز وتە ورىندى, بۇل ىسكە ءتيىستى مينيسترلىكتەرمەن قاتار, پارلامەنتتەگى نۇروتاندىقتار دا ارالاسادى دەگەن پىكىردەمىن. ۇسىنىستارىڭىز بەن ءوتىنىشىڭىزدى قالدىرىڭىز, قاراستىرامىز», دەپ جاۋاپ بەردى.
ال ايتىس سۇيەر قاۋىمعا «سارى تەنتەك» بولىپ تانىلعان قۋانىش ماقسۇتوۆ حالقىمىزدىڭ ءتولتۋما ونەرى– كۇيدىڭ ءداستۇرلى ەرەكشەلىكتەرىن ساقتاۋ مەن ناسيحاتتاۋ ءۇشىن رەسپۋبليكالىق «شەرتپە كۇي» فەستيۆالىن وتكىزۋگە «نۇر وتان» حدپ-دان كومەك سۇراي كەلىپتى. «سايگەز» جەكە قورىن باسقاراتىن ايتىسكەر اقىن ونەر يندۋسترياسىن جولعا قويۋ قاجەت دەگەن ەلباسىمەن ءبىر كەزدەسكەندە تاپسىرما العانىن, سول بويىنشا وزدەرى اتقارعان جۇمىستاردى ايتىپ, شىعارعان ونىمدەرىن دە كورسەتتى. توراعا ورىنباسارى ق.ماقسۇتوۆتىڭ دا ۇسىنىسىن تولىق قولداپ, فەستيۆالدى بىرلەسە وتكىزۋ ءماسەلەسىنىڭ جان-جاقتى قارالاتىنىن ايتتى.
ونەر–حالىقتىڭ ولمەس بايلىعى. ونى ۇرپاقتاردان ۇرپاقتارعا جەتكىزىپ, التىنداي جارقىراتا, مازمۇنىن بايىتا, نەعۇرلىم قالىڭ كوپشىلىككە ناسيحاتتاي ورلەتۋ پارتيانىڭ دا نازارىندا ەكەنىن جەتكىزگەن باۋىرجان بايبەك تاعى دا ازاماتتىق ۇندەرى ايقىن وتانداستارعا ريزاشىلىعىن جەتكىزدى.
انار تولەۋحانقىزى,
«ەگەمەن قازاقستان».
