كەزدەسۋلەر تاقىرىبى سان قىرلى
بەيسەنبى, 6 ماۋسىم 2013 1:46
قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى قايرات سارىباي باستاعان دەلەگاتسيا پارسى شىعاناعىنا جاساعان جۇمىس ساپارىنىڭ ەكىنشى كۇنى جيددا قالاسىنا (ساۋد ارابياسى كورولدىگى – ساك) كەلىپ, ساك سىرتقى ىستەر ءمينيسترىنىڭ ورىنباسارى حانزادا ابدەل ءازيز بەن ابداللا ءال ساۋدپەن كەزدەستى.
بەيسەنبى, 6 ماۋسىم 2013 1:46
قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى قايرات سارىباي باستاعان دەلەگاتسيا پارسى شىعاناعىنا جاساعان جۇمىس ساپارىنىڭ ەكىنشى كۇنى جيددا قالاسىنا (ساۋد ارابياسى كورولدىگى – ساك) كەلىپ, ساك سىرتقى ىستەر ءمينيسترىنىڭ ورىنباسارى حانزادا ابدەل ءازيز بەن ابداللا ءال ساۋدپەن كەزدەستى.
كەلىسسوزدەر اياسىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ساك كورولى ابداللا بەن ابدەل ءازيز ءال ساۋدقا جولداعان ارنايى حاتىن تاپسىردى.
تاراپتار ەلدەر اراسىنداعى ءتۇرلى سالالار بويىنشا دامىپ كەلە جاتقان ىنتىماقتاستىق دەڭگەيىن وڭ باعالاي وتىرىپ, الداعى قازان ايىندا ەر-رياد قالاسىندا وتەتىن ساۋدا-ەكونوميكالىق ءجانە مادەني-گۋمانيتارلىق ىنتىماقتاستىق جونىندەگى ۇكىمەتارالىق كوميسسيانىڭ كۇن ءتارتىبىن بەلگىلەدى, سونداي-اق ەكىجاقتى قارىم-قاتىناستاردى دامىتۋدىڭ باسىم باعىتتارى مەن ءوزارا ىقپالداستىقتىڭ پەرسپەكتيۆالى سالالارىن تالقىلادى.
كەلىسسوزدەردىڭ باستى تاقىرىپتارى رەتىندە ساۋد كاپيتالىنىڭ «جاسىل ەكونوميكا» تۇجىرىمداماسىن جۇزەگە اسىرۋ مەن استانادا وتەتىن ەكسپو-2017 حالىقارالىق كورمەسىن ۇيىمداستىرۋعا بەلسەندى اتسالىسۋ ماسەلەلەرى قاراستىرىلدى.
حانزادا ابدەل ءازيز بەن ابداللا ءال ساۋد ءوز ەلىنىڭ ەكىجاقتى بايلانىستار قارقىنىن كۇشەيتۋگە دايىن ەكەنىن راستادى.
ساۋد ارابياسىنا جاساعان ساپارى اياسىندا ق.سارىباي يسلام دامۋ بانكىنىڭ (يدب) ۆيتسە-پرەزيدەنتى ب.سيديبەمەن كەزدەستى. كەلىسسوزدەر بارىسىندا ەلباسىنىڭ باستامالارىن ءجۇزەگە اسىرۋ جولدارى, اتاپ ايتقاندا, شتاب-پاتەرى استانادا ورنالاساتىن يسلام ىنتىماقتاستىعى ۇيىمىنىڭ ازىق-ءتۇلىك قاۋىپسىزدىگى ينستيتۋتىن قۇرۋ, يسلام الەمى ەلدەرىندەگى كىشى جانە ورتا بيزنەسكە ينستيتۋتتىق قولداۋ كورسەتۋ بولاشاعى مەن قازاقستاندا يسلام بانكينگىن دامىتۋ ماسەلەلەرى تالقىلاندى. تاراپتار يسلام دامۋ بانكىنىڭ بىرقاتار ايماقتىق باعدارلامالارىنىڭ جۇزەگە اسىرىلۋىنا ەرەكشە نازار اۋداردى, دەپ حابارلادى قر ءسىم-ءىنىڭ ءباسپاسوز قىزمەتى.
