ادامدى ەڭبەك وسىرەدى
سەيسەنبى, 30 ءساۋىر 2013 2:27
«نۇر وتان» حالىقتىق-دەموكراتيالىق پارتياسى توراعاسىنىڭ ءبىرىنشى ورىنباسارى باۋىرجان بايبەك جۇمىس ساپارىمەن الماتى وبلىسىنا كەلدى. ونىمەن الماتى وبلىسىنىڭ اكىمى اڭسار مۇساحانوۆ بىرگە ءجۇرىپ, اگرارلى وبلىستا اۋىل شارۋاشىلىعى سالاسى بويىنشا مەملەكەتتىك باعدارلامالاردىڭ قالاي ءىس جۇزىنە اسىرىلىپ جاتقانىن كورسەتتى.
سەيسەنبى, 30 ءساۋىر 2013 2:27
«نۇر وتان» حالىقتىق-دەموكراتيالىق پارتياسى توراعاسىنىڭ ءبىرىنشى ورىنباسارى باۋىرجان بايبەك جۇمىس ساپارىمەن الماتى وبلىسىنا كەلدى. ونىمەن الماتى وبلىسىنىڭ اكىمى اڭسار مۇساحانوۆ بىرگە ءجۇرىپ, اگرارلى وبلىستا اۋىل شارۋاشىلىعى سالاسى بويىنشا مەملەكەتتىك باعدارلامالاردىڭ قالاي ءىس جۇزىنە اسىرىلىپ جاتقانىن كورسەتتى.
پارتيا توراعاسىنىڭ ءبىرىنشى ورىنباسارى اۋەلگى كەزەكتە ەسكەلدى اۋدانىنداعى «بيمۇراتوۆ» شارۋا قوجالىعىنداعى مال تۇقىمىن اسىلداندىرۋ بارىسىمەن تانىستى. ءبىر ەرەكشەلىگى –شارۋا قوجالىعى باسشىسىنىڭ ەسەبىمەن شەكتەلىپ قالماي, مالشىلاردىڭ ورتاسىندا تۇرىپ وبلىس اكىمىنىڭ ورىنباسارى تىنىشباي دوسىمبەكوۆتىڭ جەتىسۋ جەرىندە زەڭگى بابا تۇقىمىن اسىلداندىرۋ جونىندە بەرگەن مالىمەتتەرىن زەردەلەپ, وزىق تاجىريبەلەرمەن سالىستىرا سالماقتاپ ءارى قاراپايىم ەڭبەك ادامدارىنىڭ ايلىق جالاقىلارى مەن تۇرمىس جاعدايلارىن دا سۇراپ, وزىندىك وي قورىتتى. ءسويتىپ, حالىق پەن پارتيا اراسىنداعى جاقىندىقتى, تۇسىنىستىكتى ايقىنداي ءتۇستى.
نەگىزىنەن, مال تۇقىمىن اسىلداندىرۋ باعىتىنداعى بۇل شارۋاشىلىق 1998 جىلى قۇرىلعان. بىلتىر ۇجىم مەملەكەتتىك «سىباعا» باعدارلاماسى اياسىندا 6 پايىزدىق جەڭىلدىكپەن 42 ملن. تەڭگە نەسيە الىپ, سول قاراجاتقا 215 باس انالىق, 10 باس قازاقتىڭ اسىل تۇقىمدى اقباس بۇقاشىعىن ساتىپ العان. مۇنىڭ سىرتىندا مەملەكەتتەن 5,5 ملن. تەڭگە سۋبسيديا الىپ, جوعارىدا كورسەتىلگەن قارىزىن جاۋىپ تا قويعان. سونداي-اق, بۇل ۇجىم جىلىنا 40 گەكتار جەرگە كارتوپ ءوسىرىپ, ءونىمىن ساتىپ پايدا تابۋدا. لەزينگكە الىپ جاتقان اۋىل شارۋاشىلىعى تەحنيكالارى ءوز الدىنا.
ءسويتىپ, شارۋا قوجالىعىندا تۇراقتى تۇردە – 20, ال ماۋسىمدىق جۇمىستار كەزىندە 50 ادام تاۋ قويناۋىندا ەڭبەك كورىگىن قىزدىرۋدا. ايىنا ورتا ەسەپپەن 45-50 مىڭ تەڭگەدەن جالاقى الىپ, تابىس كوزىن اشا بىلگەن ءار ۇلت وكىلىنەن قۇرالعان جاندار جايدارمان كوڭىلدەرىن پارتيا توراعاسىنىڭ ءبىرىنشى ورىنباسارىنا پاش ەتتى. حالقىنىڭ 70 پايىزعا جۋىعى اۋىلدى جەردە تۇراتىن جەتىسۋلىقتار وسىلاي ورتا جانە شاعىن بيزنەستى دامىتۋ ارقىلى مەملەكەتتىك ساياساتقا ساي جۇمىس جۇرگىزىپ جاتقانىن ءىس جۇزىندە كورسەتە ءبىلدى. وزدەرىنىڭ جاعدايلارىن جاقسارتۋ ارقىلى مەملەكەتتىك ساياساتتى قولداپ, ياعني بيۋدجەتكە تۇراقتى تۇردە سالىق تولەپ ءارى مەملەكەتتەن بولىنگەن قاراجاتتى ءتيىمدى پايدالانا ءبىلۋ دە مەملەكەتتىك ساياساتتى جۇرگىزۋدىڭ ءبىر تارماعى ەكەندىگى ءمالىم.
ب.بايبەك كوكسۋ اۋىلشارۋاشىلىق كوللەدجى وقىتۋشىلارىمەن, وقۋشىلارىمەن كەزدەسكەندە دە اۋىل شارۋاشىلىعى سالاسىن دامىتۋ اڭگىمە وزەگىنە اينالدى. البەتتە, بۇگىنگى كۇننىڭ وزەكتى ماسەلەسىنىڭ ءبىرى ەگىن ەگىپ, كوكونىس ءوسىرىپ ءجۇرگەن ديقاندار مەن باعبانداردى – اۋىل شارۋاشىلعى تەحنيكالارىمەن قاجەتىنشە سۇرانىستارىن وتەپ, دەر كەزىندە قامتاماسىز ەتۋ ەكەندىگى باسا ايتىلدى.
«ديپلوممەن – اۋىلعا!» جوباسىنىڭ ءسوز جۇزىندە ايتىلىپ قالماي, شالعايداعى اۋىلدا قالاي جۇزەگە اسىپ جاتقاندىعىن دا «نۇر وتان» حدپ توراعاسىنىڭ ءبىرىنشى ورىنباسارى كورىپ, سول اۋىلدا جۇمىس ىستەپ جۇرگەن جاستارمەن پىكىر الماستى. نەگىزگى قاجەتتىلىك جۇمىس ورنىن تاۋىپ, جان تىنىشتىعىن كۇيتتەۋ ەمەس, سول جۇمىس ارقىلى اركىم ءوزىن ءوزى دامىتۋىندا. سوندا عانا اۋىل دا, قالا دا, جالپى ەلىمىزدە وركەنيەتتى ەلدەر ساناتىنا قوسىلاتىندىعى جاستارعا باسا ايتىلدى.
جالپى, الماتى وبلىسى بويىنشا 2009-2012 جىلدارى باعدارلاما شەڭبەرىندە 2765 مامان جۇمىسقا تارتىلعان. قۋانارلىعى سول, باسىم بولىگى سول اۋىلداردا تامىر جايىپ, ءوسىپ-ونۋدە. سونداي ونەگەلى وتباسىنىڭ بىرىنە پارتيا ءتوراعاسىنىڭ ءبىرىنشى ورىنباسارى كىرىپ تە شىقتى.
ب.بايبەك تالدىقورعان قالاسىندا «كۇنشۋاق» بالاباقشاسىنا اتباسىن بۇرىپ, مەكتەپكە دەيىنگى ءبىلىم بەرۋ ماسەلەسىن تالقىلاعانىنىڭ ءمانى مەن ماڭىزى ەرەكشە بولدى. نەبارى 4-5 جاستاعى بۇلدىرشىندەر اعىلشىن تىلىندە تاقپاقتاردى مۇدىرمەي ايتىپ, ونى مۇعالىمدەرىمەن سۇراق-جاۋاپپەن جالعاستىرعانى ءتانتى ەتتى. ءۇش تىلدە سايراپ تۇرعان سول بۇلدىرشىندەرگە ءسۇيسىنبەسكە ءاددى جوق. ءسوز رەتى كەلگەندە ايتا كەتسەك, ب.بايبەك ۇرىمتال ءساتتە ءوزى «بولاشاق» باعدارلاماسىمەن شەتەلدە وقىپ كەلگەندىگىن تىلگە تيەك ەتىپ قانا قويماي, الەمدىك تاجىريبەگە سايكەس مىنا ءىستى بىلاي جالعاساڭىزدار ۇتىمدى بولاتىن ەدى دەگەندەي كەڭەسىن دە ىرىكپەدى. مۇنى «تەمىردى قىزعان كەزىندە سوق» دەگەن قازاقى دانالىقپەن ساباقتاستىرساق, ەلباسىنىڭ سارابدال ساياساتىنىڭ ناتيجەسىندە قول جەتكىزگەن جەتىستىكتەرىمىزدىڭ ءبىر تارماعى اۋىل بالالارىنىڭ دا قاجەتتىلىگىن وتەگەنى ەمەس پە؟!
«نۇر وتان» حدپ توراعاسىنىڭ ءبىرىنشى ورىنباسارى جۇمىس ساپارىن وبلىستاعى پارتيا بەلسەندىلەرىمەن كەزدەسۋمەن تۇيىندەدى.
نۇربول الدىباەۆ,
«ەگەمەن قازاقستان».
الماتى وبلىسى.
