قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا قر 2019 جىلعى قاڭتار–شىلدەدەگى الەۋمەتتىك-ەكونوميكالىق دامۋ جانە رەسپۋبليكالىق بيۋدجەتتىڭ ورىندالۋ قورىتىندىسى شىعارىلدى.
ۇلتتىق ەكونوميكا ءمينيسترى ر. دالەنوۆ 2019 جىلدىڭ جەتى ايىنىڭ قورىتىندىسى بويىنشا ءجىو وڭ قارقىنى ساقتالعانىن ايتتى, ءوسىم 4,2% قۇرادى.
«سەرپىن ونەركاسىپتەگى, قۇرىلىستاعى جانە كورسەتىلەتىن قىزمەتتەر سالاسىنداعى جەدەلدەۋمەن, سونداي-اق اۋىل شارۋاشىلىعى مەن نەگىزگى كاپيتالعا سالىنعان ينۆەستيتسيالاردىڭ تۇراقتى قارقىنىمەن قامتاماسىز ەتىلدى», — دەدى ر. دالەنوۆ.
قر ۇلتتىق ەكونوميكا مينيسترلىگىنىڭ دەرەكتەرى بويىنشا, ينۆەستيتسيالار سەرپىنى ءجىو ءوسۋ قارقىنىنان وزىق, ولاردىڭ ءوسۋى 11,3% قۇرادى. ينۆەستيتسيالار اۋىل شارۋاشىلىعىندا (61,4%), قۇرىلىستا (46,3%), ساۋدادا (23%) جانە ونەركاسىپتە (18,9%) ءوستى.
ونەركاسىپ ءوندىرىسى بيىلعى قاڭتار-شىلدەدە 2,7% ءوستى. 2019 جىلعى قاڭتار–شىلدەدە قۇرىلىستا (11,5%), ساۋدادا (7,5%-عا), كولىك سالاسىندا (5,4%-عا), اۋىل شارۋاشىلىعىندا (3,5%-عا), ونەركاسىپتە (2,7%-عا) جانە بايلانىس قىزمەتتەرىندە (2,6%-عا) وڭ قارقىن بايقالدى.
ۇەم باسشىسى 7 ايدىڭ قورىتىندىسى بويىنشا كوپتەگەن كورسەتكىشتەر بويىنشا وڭ قارقىن ساقتالعانىن اتاپ ءوتتى.
سونىمەن قاتار, ر. دالەنوۆ ورتالىق جانە جەرگىلىكتى اتقارۋشى ورگانداردىڭ نازارىن نەگىزگى ەكونوميكالىق كورسەتكىشتەردىڭ ءوسۋىن قامتاماسىز ەتۋگە, ينۆەستيتسيالىق جوبالاردى باقىلاۋدى قامتاماسىز ەتۋگە, قۇرىلىس جانە اۋىل شارۋاشىلىعى جۇمىستارىنىڭ ماۋسىمىن بارىنشا پىسىقتاۋعا جانە ينفلياتسيانى باقىلاۋدى كۇشەيتۋگە اۋداردى.
ءبىرىنشى قارجى ۆيتسە-ءمينيسترى بەرىك شولپانقۇلوۆ وسى جىلدىڭ 7 ايىنداعى مەملەكەتتىك بيۋدجەتتىڭ ورىندالۋ قورىتىندىلارى تۋرالى باياندادى. ەسەپتى كەزەڭدە مەملەكەتتىك بيۋدجەت كىرىستەرىنىڭ ءوسىمى 114,5%, رەسپۋبليكالىق — 118% جانە جەرگىلىكتى بيۋدجەت — 106% قۇرادى.
ب. شولپانقۇلوۆ بيۋدجەتتەردىڭ بارلىق دەڭگەيلەرىندە قاراجاتتى يگەرۋ 2018 جىلمەن سالىستىرعاندا جاقسارعانىن ايتتى.
ەسەپتى كەزەڭدە مەملەكەتتىك بيۋدجەتكە 4 ترلن. 984 ملرد. تەڭگە كولەمىندە نەمەسە جوسپارعا شاققاندا 103,6% كىرىس ءتۇستى.
رەسپۋبليكالىق بيۋدجەت شىعىستارى 98,9%-عا يگەرىلدى. «نۇرلى جول» مەملەكەتتىك باعدارلاماسى بويىنشا 2019 جىلعا 555 ملرد تەڭگە كوزدەلگەن, اعىمداعى جىلدىڭ 1 تامىزىنا شىعىستار 272,5 ملرد تەڭگەگە نەمەسە يگەرىلدى.
بەرىك شولپانقۇلوۆ سونىمەن قاتار مەملەكەتتىك اۋديت جانە كامەرالدىق باقىلاۋ بويىنشا اتقارىلىپ جاتقان جۇمىستار تۋرالى باياندادى. ماسەلەن, ەسەپتى كەزەڭدە 719 ملرد تەڭگە بيۋدجەت قاراجاتىنا اۋديت جۇرگىزىلدى. اۋديت ناتيجەلەرى بويىنشا جالپى سوماسى 121 ملرد تەڭگەگە قارجىلىق بۇزۋشىلىقتار انىقتالدى.
اۋديت جۇرگىزۋ بارىسىندا 114 ملرد تەڭگە سوماعا بۇزۋشىلىقتار تۇزەتىلدى, ونىڭ ىشىندە 7 ملرد تەڭگە قالپىنا كەلتىرىلدى, 2 ملرد تەڭگە وتەلدى جانە 105 ملرد تەڭگە ەسەپ بويىنشا كورسەتىلدى. ءوز كەزەگىندە, كامەرالدىق باقىلاۋمەن جالپى سوماسى 6 ترلن تەڭگەگە 1 ملن مەملەكەتتىك ساتىپ الۋ ءراسىمى قامتىلدى. ناتيجەسىندە 379 ملرد تەڭگە سوماعا بۇزۋشىلىقتارعا جول بەرىلمەدى.
