ەكى كۇنگە سوزىلعان سەمينار باستالار الدىندا ماڭعىستاۋ وبلىستىق سوتى توراعاسىنىڭ مىندەتىن اتقارۋشى ەرجان قاراباەۆ پەن ازاماتتىق ىستەر جونىندەگى سوت القاسىنىڭ توراعاسى نۇرساپا پريماشەۆ قۇتتىقتاۋ ءسوز سويلەدى. ولار سۋديالاردىڭ سوت پروتسەستەرىنىڭ اشىقتىعى مەن جاريالىلىعىن قامتاماسىز ەتىپ وتىرعانى تۋرالى ايتا كەلىپ, ءوڭىر سوتتارىندا «سوت تورەلىگىنىڭ جەتى ءتۇيىنىنىڭ» جۇزەگە اسىرىلىپ جاتقانى تۋرالى اڭگىمەلەپ بەردى.
ۇيىمداستىرۋشىلار قاتىسۋشىلارعا جۋرناليستەردىڭ قۇقىقتارى مەن مىندەتتەرىنىڭ قانداي بولاتىنى, سۇحباتتى دايىنداۋ تەحنولوگياسى, رەزونانستى جاريالانىمدارعا دەن قويۋ جانە مۋلتيمەديالىق كونتەنت جاساۋ تۋرالى اڭگىمەلەپ بەرۋدى جوسپارلادى. تالقىلاۋلار تاقىرىبىنىڭ وزەكتىلىگى, مۇقيات جوسپارلانىپ سويلەنگەن سوزدەر مەن ينتەراكتيۆتىك ساباقتار سەرپىنى ترەنينگتى ونىڭ قاتىسۋشىلارى ءۇشىن تارتىمدى دا پايدالى ەتە ءبىلدى. بۇل تۋرالى ولار ءىس-شارانىڭ بارىسىندا جانە الەۋمەتتىك جەلىلەردەگى وزدەرىنىڭ اككاۋنتتارىندا ايتىپ ءوتتى.
جۇمىستى وبلسوتتىڭ وتستاۆكاداعى سۋدياسى ينەسسا كۋانوۆا اشتى. ول سوت قۇرىلىسى مەن سوت ءىسىن جۇرگىزۋ: نەگىزگى ۇعىمدار, سوت ساتىلارى, سوت اكتىلەرى, سونداي-اق زاڭ تەحنيكاسىنىڭ نەگىزدەرى تۋرالى ايتىپ بەردى. سپيكەر ءوزىنىڭ سوت پراكتيكاسىندا كەزىككەن ءارتۇرلى احۋالدارعا بايلانىستى پىكىرلەرىمەن ءبولىستى.
جس-تىڭ سۋدياسى ەلەنا ماكسيۋتا الەۋمەتتىك جەلىلەردەگى جۇمىس: بەيىن مەن كونتەنتتى جاساۋ, قاۋىپسىزدىك ماسەلەلەرى تۋرالى اقپارات بەردى. تۇسىندىرمەلەر بەرۋ پرينتسيپتەرى تۋرالى تىلگە تيەك ەتە كەلىپ, سپيكەر الەۋمەتتىك جەلىلەردەگى سىن ماتەريالدارعا دەن قويۋدىڭ ءارتۇرلى كەيستەرىن ۇسىندى.
جس-تىڭ ءباسپاسوز حاتشىسى ايدوس سادۋاقاسوۆ پەن «قازاقستاننىڭ سوت جۋرناليستەرى ليگاسى» وف ديرەكتورى ماۋلەتباي سەرىكجان باق وكىلدەرىنە سوت پروتسەستەرىن قالاي جاريالاۋعا: جۋرناليستەرگە سوت زالىندا نەنى ىستەۋگە جانە نەنى ىستەمەۋگە بولاتىنى تۋرالى ءتۇسىندىرىپ بەردى.
ەكىنشى كۇنى جۋرناليستەردىڭ سوت وتىرىسى زالدارىنا قولجەتىمدىلىك ماسەلەلەرى, سوت پروتسەسى بارىسىنداعى ولاردىڭ وزدەرىن ۇستاۋ قاعيدالارى, سوت قىزمەتىن كورسەتۋدەگى ادەپ پەن كاسىبي نورمالار, سوتتاردا جۋرناليستەر قۇقىقتارىنىڭ بۇزىلۋى تالقىلاندى.
سەميناردىڭ قاتىسۋشىلارى ينتەراكتيۆتى پىكىر الماسۋلارعا جانە ءارتۇرلى كەيستەر بويىنشا رولدىك ويىندارعا قاتىستى. ترەنينگتىڭ ءاربىر قاتىسۋشىسى باق پەن سوتتاردىڭ ءوزارا بايلانىسى كەزىندە ءجيى تۋىندايتىن وقيعالارعا جانە كەزىككەن تىعىرىقتى جاعدايدان جول تاۋىپ شىعۋ مىندەتىنە تاپ بولعانداي اسەر الدى. بارلىق وقيعالار ءارتۇرلى, الايدا ولاردى ءبىر بىرىنە ۇقساس تاۋەكەلدەر مەن قوبالجۋلار بىرىكتىرىپ تۇرعانداي ەدى. مىسالى, باق ادەيى نەمەسە كەزدەيسوق اقپاراتتىڭ ءوڭىن اينالدىرىپ جىبەرە الادى, جۋرناليست سەنساتسيانى «شيرىقتىرىپ» جىبەرەدى, باق-تىڭ قاتىسۋى تاراپتاردىڭ تاتۋلاسۋىنا جانە تاتۋلاسۋ كەلىسىمىن جاساسۋعا كەدەرگى كەلتىرۋى, سونداي-اق باسەكەلەستەر ءۇشىن قىزىعۋشىلىق تۋدىراتىن كوممەرتسيالىق قۇپيانى اشىپ جىبەرۋى مۇمكىن, بۇل تۇتىنۋشىلار سۇرانىمىن كۇرت تومەندەتىپ, شىعىندارعا اكەپ سوعادى.
جۇمىستى قورىتىندىلاي كەلىپ, ا.سادۋاقاسوۆ قۇقىقتۇسىندىرۋ جۇمىستارىن جۇرگىزۋدىڭ وزەكتىلىگىن اتاپ كورسەتتى. ونىڭ پىكىرى بويىنشا, سوت قىزمەتىنىڭ ءمانى مەن زاڭناما نەگىزدەرىن دۇرىس تۇسىنبەۋ كوبىنەسە قوعامداعى داۋ-جانجالشىلدىقتى تۋىنداتادى. ول سەمينارعا قاتىسۋشىلاردى وسى جۇمىسقا قاتىسۋعا شاقىردى. ء«بىز ورتاق ءىستى جاساپ جاتىرمىز – ادامدارعا زاڭ نورمالارىن جەرىنە جەتكىزە تۇسىندىرەمىز, سۋديانىڭ جۇمىسى جانە سوت شەشىمدەرىنە شاعىم بەرۋ, نارازىلىق كەلتىرۋ مۇمكىندىكتەرى تۋرالى وبەكتيۆتى تۇردە ايتۋدان جالىقپايمىز, دەدى ول.
جۇمىس قورىتىندىلارى بويىنشا قاتىسۋشىلار سەمينار-ترەنينگ سپيكەرلەرىنىڭ ۇسىنىمدارىن تالقىعا ءتۇسىردى. بارلىق قاتىسۋشىلارعا سەرتيفيكاتتار تاپسىرىلدى.
ماڭعىستاۋ وبلىسى
