قازاقستاننىڭ ءسۇت وداعىنىڭ (قسو) باستاماسىمەن ۇيىمداستىرىلعان القالى باسقوسۋدا ءسۇت شيكىزاتىن كەدەن وداعىنىڭ تەحنيكالىق رەگلامەنتتەر تالاپتارىنا بەيىمدەۋ, سالالىق جول كارتاسىن ءتۇزىپ, ىسكە اسىرۋ ماسەلەلەرى تالقىلاندى. قسو باعدارلاماسىنىڭ ۇيلەستىرۋشىسى ساۋلە جانكينانىڭ ايتۋىنشا, كەدەن وداعىنىڭ جاڭا تالاپتارى بويىنشا قايتا وڭدەلەتىن ءسۇت شيكىزاتى قاۋىپسىزدىك تەحنيكالىق رەگلامەنتەرىنە ىڭعايلانۋى ءتيىس. قسو دەرەكتەرىنە قاراعاندا قايتا وڭدەلەتىن شيكىزاتتىڭ 700 مىڭ تونناعا جۋىعى جاريالانعان تالاپتارعا مۇلدەم ساي ەمەس. كەلەسى جىلدان باستاپ جاڭا شارتتارعا سايكەس كەلمەيتىن ءسۇت ونىمدەرىن وڭدەۋ كاسىپورىندارى قايتا قابىلدامايدى. ءسۇت زاۋىتتارى شيكىزاتتىڭ 70 پروتسەنتتەن استامىن ەلدى مەكەندەردەن جينايدى. «جول كارتاسى ءسۇت شيكىزاتىنىڭ قاۋىپسىزدىگى مەن ساپاسىن قامتاماسىز ەتۋگە باعىتتالعان. ءسۇت وداعى كوپتەگەن جىلدار بويى كەدەن وداعىنىڭ رەگلامەنتتەرىنە كوشۋ بويىنشا جوسپارلى جۇمىس جۇرگىزگەن. تۇرعىندارمەن, ءسۇت دايىنداۋشىلارمەن جانە تاپسىرۋشىلارمەن اقپاراتتىق-ءتۇسىندىرۋ شارالارى اتقارىلعان. الايدا, سالادا قالىپتاسقان پروبلەمالار بيزنەستىڭ عانا ەمەس, باسقا دا تاراپتاردىڭ جۇيەلى جانە بەلسەندى قاتىسۋىن تالاپ ەتەدى.
«بيزنەس وكىلدەرى مەملەكەتتىك ورگاندارمەن شيكىزات پەن شيكىزات بازاسى بويىنشا بارلىق ءتۇيىندى پروبلەمالاردى تالقىلاۋعا, بىرلەسىپ شەشۋگە دايىن. شيكىزات بازاسىنىڭ اۋديتىنە فەرمەرلەر قوسىلۋعا ساقاداي ساي. ءبىزدى 5 ميلليون توننا ءسۇتتىڭ 75 پروتسەنتى كەدەن وداعىنىڭ تەحنيكالىق رەگلامەنتتىك تالاپتارىنا سايكەس كەلمەيتىنى الاڭداتادى», دەدى قازاقستان ءسۇت وداعىنىڭ اتقارۋشى ديرەكتورى ۆلاديمير كوجەۆنيكوۆ.
جول كارتاسى ەكى كەزەڭدە جۇزەگە اسىرىلاتىن بولىپ بەلگىلەنگەن. ءبىرىنشى كەزەڭدە ءسۇت وداعىنا مۇشە كاسىپورىندار, ەكىنشى كەزەڭدە قازاقستاننىڭ بارلىق ايماقتارىنداعى ءسۇت وندىرۋشىلەر قامتىلماق. وسىلايشا شيكىزاتتىڭ تازالىعىن قامتاماسىز ەتۋ ءسۇت وڭدەۋ سەكتورى ءۇشىن باسىم باعدارعا اينالاتىن بولادى. بۇگىندە ەكى ميلليونداي قازاقستاندىق ءسۇت وتكىزۋمەن اينالىسىپ, اۋىلدىقتار ءۇشىن بىردەن-ءبىر تابىس كوزى سانالادى.
سولتۇستىك قازاقستان وبلىسى
