سپورتتىق قۇزعا ورمەلەۋ
حاتيودزي قالاسىندا وتەتىن سپورتتىق قۇزعا ورمەلەۋدەن الەم چەمپيوناتىندا تۇڭعىش رەت وليمپيادا ويىندارىنىڭ جولداماسى تاراتىلادى. كوماندا باپكەرى ساۋلە ىسقاقوۆانىڭ ايتۋىنشا, وليمپيادا ليتسەنزياسى كوپسايىس بويىنشا ساراپقا سالىنادى. سوندىقتان, كوپسايىسشىلارعا باسىمدىق بەرىلىپ وتىر.
«الەم چەمپيوناتىنا بەس سپورتشىمىز جولداما الدى. ولار: ازيا ويىندارىندا بەسىنشى ورىن العان اسەل مارلەنوۆا, ازيادانىڭ ءتورتىنشى ورىن يەگەرى ريشات حايبۋللين, قازىرگى قازاقستان چەمپيونى مارگاريتا اگامباەۆا مەن تاجىريبەلى تامارا ولجاباەۆا جانە جىلدامدىققا جارىسۋدان ەل ۇزدىگى سانالاتىن ءامىر مايمۇراتوۆ. 2024 جىلى «جىلدامدىق» بويىنشا وليمپيادادا جۇلدە تاراتىلا باستايدى. سول سەبەپتى, ءامىردى وسى باستان شىڭداۋدى ءجون كوردىك», - دەيدى ساۋلە ىسقاقوۆا.
باس باپكەر سپورتشىلاردىڭ الدىنداعى باستى مىندەت – توپ-20 قاتارىنا ەنۋ ەكەنىن ايتادى.
«فرانتسيانىڭ تۋلۋزا قالاسىندا وتەتىن قوسىمشا ليتسەنزيالىق تۋرنيرگە قاتىسۋ ءۇشىن كوپسايىسشىلار العاشقى 20 سپورتشىنىڭ قاتارىنا ەنۋ كەرەك. سونداي-اق, ازيا چەمپيوناتىندا وليمپيادا جولداماسىن جەڭىپ الاتىن مۇمكىندىك بار. الەم چەمپيوناتىندا العاشقى جيىرما سپورتشىنىڭ قاتارىنا قوسىلىپ, تاجىريبە جيناقتاپ, ازيا قۇرلىعىنداعى سپورتشىلاردىڭ الەۋەتىن بايقاۋدى باستى مىندەت قىلدىق. ويتكەنى, ازيا چەمپيوناتىنداعى باستى قارسىلاستىرىمىزدى زەرتتەۋ كەرەك», - دەيدى ول.
بايداركا مەن كانوەدە ەسۋ
بۇگىندە بايداركا مەن كانوەدە ەسۋدەن قازاقستان كومانداسى چەحيادا وقۋ-جاتتىعۋ جيىنىن وتكىزۋدە. قۇراما باس باپكەرى اندرەي شانتاروۆيچ الەم چەمپيوناتىنا قاتىساتىن سپورتشىلار ءتىزىمىن ءالى جاريالاعان جوق. ۆەنگرياداعى الەمدىك سىندا ءتورت ادامدىق بايداركادان وليمپيادا جولداماسى ساراپقا سالىنادى. بۇل باسەكە بويىنشا قوسىمشا ليتسەنزيالىق تۋرنيرلەر وتپەيدى. سوندىقتان, ءتورت ادامدىق بايداركاشىلار موينىندا ۇلكەن مىندەت تۇر.
«الەم چەمپيوناتىنا قاتىساتىن قۇرامدى 90 پايىز انىقتاپ قويدىق. ال ءتورت ادامدىق بايداركادان بۇگىندە التى ادامدى باقىلاۋدا ۇستاپ وتىرمىز. ءالى ءبىر اپتاداي ۋاقىت بار. جىگىتتەردىڭ بارلىعى قارقىندى جاتتىعۋ ۇستىندە. ازىرگە, الەم چەمپيوناتىندا كىمدەردىڭ سىنعا تۇسەتىنىن ايتقان جوقپىز. دەگەنمەن, ءتورت ادامدىق بايداركادا باق سىنايتىن سپورتشىلار باپكەرلەر قاۋىمىنا بەلگىلى. ناقتى ەشتەڭە ايتپادىق, ءالى وزگەرىستەر بولۋى مۇمكىن. ال ءتورت ادامدىق بايداركادان وليمپيادا جولداماسى تەك قانا الەم چەمپيوناتىندا ساراپقا سالىنادى. دەمەك, ۆەنگريادا ليتسەنزيا ۇتىپ الۋ ءۇشىن بار كۇشىمىزدى سالۋ قاجەت. جىگىتتەر قاتەلەسۋگە بولمايتىنىن جاقسى بىلەدى. ءاربىر مەتر ءۇشىن, ءاربىر سەكۋندا ءۇشىن جانىمىزدى سالامىز. ال الەم چەمپيوناتىنان كەيىن جاتتىعۋ جۇمىستارىنا وزگەرىس ەنگىزىپ, ازيا بىرىنشىلىگىندە ەكى جانە ءبىر ادامدىق بايداركاداعى سپورتشىلاردى سىننان وتكىزەمىز. جالپى, الەم چەمپيوناتىنا 13 سپورتشى اتتانادى. ونىڭ جەتەۋى بايداركادان ەرلەر اراسىندا, ەكەۋى ايەلدەر اراسىندا باق سىنايدى. كانوەدەن ەرلەر اراسىندا ءتورت سپورتشىعا ءۇمىت ارتامىز» - دەدى كوماندا باس باپكەرى اندرەي شانتاروۆيچ.
اكادەميالىق ەسۋ
سپورتتىڭ بۇل تۇرىنەن كومانداعا جاڭا باپكەر تاعايىندالدى. ۆلاديمير بەلونوگوۆ اكادەميالىق ەسۋدەن ۇلتتىق قۇراما تىزگىنىن بيىلعى قاڭتار ايىندا ۇستاعان بولاتىن. جاڭا باپكەر كوماندانى جاڭا ادىسپەن جاتتىقتىرۋعا كوشتى. بۇگىندە اكادەميالىق ەسۋدەن قازاقستان كومانداسى ەۋروپالىق ادىسپەن جاتتىعۋعا كوپ كوڭىل بولۋدە. دەسە دە, باس باپكەر الەم چەمپيوناتىندا جولداما مەن جۇلدەگە تالاسا المايتىنىن اشىق ايتتى.
«بۇگىندە سپورتشىلار جاڭا جوسپار بويىنشا دايىندالۋدا. بىراق الەم چەمپيوناتىندا جاقسى ناتيجە كورسەتۋگە ازداپ ۋاقىت جەتپەيدى. الدىمىزدا ەكى ءىرى جارىس تۇر – الەم جانە ازيا بىرىنشىلىگى. ەكى ءىرى تۋرنيرگە دە قاتىسامىز. ودان بولەك, لينتستە وتەتىن الەم چەمپيوناتىندا وليمپيادا جولداماسى ساراپقا سالىنادى. بىردەن باسىن اشىپ العان ءجون, ءبىز الەم چەمپيوناتىندا جولدامادان ۇمىتتەنبەيمىز. ويتكەنى, ءبىرىنشى فينالعا شىعۋ ءۇشىن كوماندانىڭ دايىندىعى جەتكىلىكسىز. جاڭا باعدارلاما بويىنشا جاتتىعۋ جۇرگىزگەنىمىزگە كوپ بولعان جوق. سوندىقتان, الەمدىك سىندا جۇلدە مەن جولدامانىڭ اۋىلى الىس ەكەنى ايتپاسا دا تۇسىنىكتى. ەۋروپالىقتارعا جەتۋ ازىرگە مۇمكىن ەمەس. ولارمەن سالىستىرعاندا ءبىز ءالى دامۋ ۇستىندەمىز. دەسە دە, الەم چەمپيوناتىنا ماقساتسىز بارا جاتقان جوقپىز. بىرىنشىدەن, كوماندانىڭ قازىرگى دايىندىعىن باقىلايمىز. ەكىنشىدەن, الەمدىك سىنداعى ازيا قۇرلىعى وكىلدەرىنىڭ اياق الىسىنا نازار اۋدارامىز. ويتكەنى, ءبىز كەلەسى جىلى وتەتىن قۇرلىق دوداسىندا جولداماعا تالاسامىز. ال سول سىندا بىزگە باستى قارسىلاس اتاناتىن كوماندالاردىڭ الەۋەتىن وسى باستان زەرتتەگەن ءجون», - دەيدى ۆلاديمير بەلونوگوۆ.
اكادەميالىق ەسۋدەن الەم چەمپيوناتىندا باق سىنايتىن سپورتشىلار:
ۆلاديسلاۆ ياكوۆلەۆ (2000 مەتر, جەكەلەي سىن), سۆەتلانا گەرمانوۆيچ (2000 مەتر, جەكەلەي سىن), ميحايل تاسكين, اناستاس شاشكوۆ (2000 مەتر, جۇپتىق سىن), ەۆگەني تاتسەي, دانيل ساۆچەنكو (2000 مەتر, جۇپتىق سىن, جەڭىل سالماق), ماريا چەرنەتس, الينا كليمەنتەۆا (2000 مەتر, جۇپتىق سىن, جەڭىل سالماق), الينا موچۋلا (2000 مەتر, جەكەلەي سىن, جەڭىل سالماق)
دزيۋدو
دزيۋدوشىلار دوداسى وتاندىق جانكۇيەرلەر اسىعا كۇتكەن باسەكەلەردىڭ ءبىرى. سەبەبى, سپورتتىڭ بۇل تۇرىنەن جۇلدەگە ءۇمىتتى بالۋاندارىمىز جوق ەمەس.
«قازاقستان قۇراماسى بۋرابايداعى «جاقسى» سپورت بازاسىندا دايىندىق وتكىزۋدە. بۇل الەم چەمپيوناتى قارساڭىنداعى نەگىزگى دايىندىق كەزەڭدەرىنىڭ ءبىرى. 16 تامىزدا الماتىعا ورالىپ, نوۆوالەكسەەۆكادا توعىز كۇندىك جيىن وتكىزەمىز. سودان سوڭ الەم چەمپيوناتىنا اتتانامىز», - دەيدى باس باپكەر ايدىن سماعۇلوۆ.
دزيۋدونىڭ ءتۇپ اتاسى سانالاتىن جاپون جەرىندە الەم چەمپيونى (2015), وليمپيادا ويىندارىنىڭ (2016) كۇمىس جۇلدەگەرى ەلدوس سمەتوۆ, الەم چەمپيوناتىنىڭ كۇمىس جۇلدەگەرى (2018) ەرلان سەرىكجانوۆ, ازيا ويىندارىنىڭ چەمپيونى (2018) ديدار حامزالار يۋاق سىنايدى.
2019 جىلى توكيودا وتەتىن دزيۋدودان الەم چەمپيوناتىنا قاتىساتىن قازاقستان كومانداسى:
60 كەلى:
ەلدوس سمەتوۆ, عۇسمان قىرعىزباەۆ
66 كەلى: ەرلان سەرىكجانوۆ, ەلدوس جۇماقانوۆ
73 كەلى: جانساي سماعۇلوۆ
81 كەلى: ديدار حامزا, رۋسلان مۇساەۆ
90 كەلى: يسلام بوزباەۆ
100 كەلى: ايبەك سەرىكباەۆ ارالاس كوماندالىق سىن:
73 كەلى: سەرىك اقىلبەك
90 كەلى: يسلام بوزباەۆ
+100 كەلى: ەراسىل قاجىباەۆ
