– بۇل ءۇشىن وبلىستىق بيۋدجەتتەن 54 ملن تەڭگە ءبولىنىپ, ورتالىق ءۇشىن قولايلى عيمارات جوندەۋدەن وتكىزىلدى جانە جيھازبەن, كومپيۋتەرمەن جابدىقتالدى. ارنايى كولىك ساتىپ الىندى. ءبىر بالانىڭ ءومىرى ساقتالسا, ءبىر وتباسىنىڭ اجىراسپاي ءتۇتىنى ءتۇزۋ ۇشسا, ەڭبەكتىڭ قايتارىمى بولعانى, – دەيدى وبلىس اكىمىنىڭ ورىنباسارى مارات جۇندىباەۆ. راسىندا, جارتى جىلدا ورتالىق جۇمىسىنىڭ ناتيجەسى دە كورىنىپتى.
– ەگەر بىلتىر وبلىستا بالالار مەن جاسوسپىرىمدەر اراسىندا وزىنە قول جۇمساۋدىڭ 9 وقيعاسى تىركەلسە, بيىل 3 سۋيتسيد ورىن العان. جۇمىستى باستاعالى سەنىم تەلەفونىنا قوڭىراۋ شالعاندار مەن پسيحولوگتاردىڭ قابىلداۋىنا كەلگەندەر سانى 400-گە جۋىقتايدى. باسىم كوپشىلىگىن پسيحولوگتار جەكە قابىلدادى, كەڭەستەر بەردى. سەنىم تەلەفونى تاۋلىك بويى جۇمىس ىستەيدى. كەيدە اتا-انالاردان نەمەسە بالالاردان قوڭىراۋ تۇسكەن كەزدە, وقيعا ورنىنا جەدەلدەتىلگەن توپ جىبەرۋگە تۋرا كەلەدى. اۋداندارعا شىعىپ, سەمينارلار وتكىزدىك, اۋىل مەكتەپتەرىندەگى پسيحولوگتاردى, ءتىپتى مۇعالىمدەردى دە وقىتامىز, – دەيدى پسيحولوگيالىق قولداۋ جانە قوسىمشا وقۋ وڭىرلىك ورتالىعىنىڭ ديرەكتورى ەلەنا پەترەنكو.
ورتالىقتىڭ ىشىندە كۇيزەلىپ كەلگەندەردىڭ جۇيكەسىن جۇمسارتىپ, ولاردى اۋەلى سەيىلتىپ الاتىن پسيحولوگيالىق ەرەكشە كۇي كۇتىپ الادى. تىرناعىنا دەيىن كۇيىپ, ومىردەن كۇدەر ءۇزىپ كەلگەن ادام الدىمەن جانعا دا, تانگە دە جايلى جۇمساق جيھازعا وتىرادى, وعان ىستىق شاي, تىسكە باسار تاتتىلەر ۇسىنىلادى, جاندى جادىراتار اسەرلى مۋزىكا قويىلادى. تاعدىردىڭ تالكەگىنە تۇسكەن جاس وسىلاردان كەيىن دەرەۋ ەسىن جيناعانداي, تىنىشتالاتىن كورىنەدى. سودان كەيىن ماماندار ونىمەن جۇمىستى باستايدى. ورتالىققا كەلۋشىلەردى دارىگەرلەر ەمدەمەيدى, ولارعا پسيحولوگ-پەداگوگتار كەڭەس بەرەدى. ەگەر پسيحياتردىڭ كومەگى كەرەك بولعان جاعدايدا شاقىرتىلادى. ورتالىقتىڭ پسيحياتر ماماندارمەن كەلىسىمى بار, ولار دەر ۋاقىتىندا جەتەدى.
– بۇل – ءبىزدىڭ ابدەن تالقىلاپ, جەتى رەت ءپىشىپ, ءبىر رەت كەسكەن ىزدەنىسىمىزدىڭ ناتيجەسى. وزىق ەلدەردىڭ تاجىريبەلەرىنە قاراساق, ولار پسيحولوگيالىق كومەككە ءجيى جۇگىنەدى. بۇل – قوعام دەنساۋلىعىنىڭ ەڭ ماڭىزدى بولىگى. سوندىقتان وسى تاجىريبەنى وزىمىزدە باستاۋدى ءجون كوردىك. ورتالىقتىڭ التى ايعى جۇمىسى باعىتىمىزدىڭ دۇرىستىعىن دالەلدەدى, – دەيدى وبلىستىق ءبىلىم باسقارماسىنىڭ باسشىسى ۆاسيلي تسىمباليۋك. ورتالىقتاعى بىلىكتى پسيحولوگتاردىڭ ءبىرى اناستاسيا بارانوۆا كومەككە جۇگىنەتىندەردىڭ باسىم كوپشىلىگى ءتىل تابىسا الماعان بالا مەن اتا-انالار ەكەنىن ايتتى.
– مۇنداي جاعدايلار ءبىزدىڭ جۇمىسىمىزداعى نەگىزگى سيپاتقا يە. كەيدە اتا-انا بالاسىمەن كەلەدى, كەيدە بالا ءوزى كەلىپ, ءوزىن تۇسىنبەيتىن اتا-اناسىنا شاعىم جاسايدى. بۇگىن وتباسىلارداعى ناعىز وزەكتى جاي دا وسى اتا-انا مەن بالانىڭ اراسىنداعى كەلىسپەۋشىلىك. سوسىن ومىردە ءتۇرلى جاعداي بولادى, بالالاردى قورلاۋدىڭ, ءجاسوسپىرىم قىزداردىڭ اياعى اۋىر بولىپ قالماۋ ءۇشىن الدىن الۋ جۇمىستارىن جۇرگىزەمىز, جاسوسپىرىمدەر مەن بالالاردى كۇيزەلىستەن الىپ شىعۋ, ءسۋيتسيدتىڭ الدىن الۋ – باستى ماقساتىمىز. توتەنشە جانە ەكسترەمالدى جاعدايلاردا پسيحولوگيالىق كومەك بەرەمىز, – دەيدى اناستاسيا اندرەەۆنا. جاقىن كۇندەرى عانا وعان ءجاسوسپىرىم قىز بالا كەلدى. اناسى ەرتەلەۋ قايتىپ كەتكەن, اكەسى دە بۇگىندە اۋىر حالدە جاتىر. ۇلكەن اپايىمەن اراداعى تۇسىنىسپەۋشىلىكتەن جۇدەپ جۇرگەندە, ءوزىنىڭ جاقسى كورەتىن جىگىتى دە وعان تەرىس قاراپ كەتكەن. قىز بالا كۇيزەلىستەن وزىنە قول جۇمساۋعا ءسال-اق قالعان. ورتالىق ماماندارى پسيحولوگيالىق ادىستەردى قولدانعان اڭگىمەلەسۋلەردەن كەيىن ءومىردىڭ تىعىرىققا تىرەگەن اۋىرلىعىنان كۇيزەلگەن قىز بالانىڭ جىگەرى ويانعان, جانارىندا جارقىل پايدا بولعان. مۇنداي جاستاردى تىركەپ, ولارمەن ءجيى حابارلاسىپ, باقىلاپ وتىرادى ەكەن.
ورتالىقتىڭ اشىلۋىنا Nur Otan پارتياسى جانىنداعى قۇقىق قورعاۋ كەڭەسى توراعاسىنىڭ ورىنباسارى دينارا زاكيەۆا قاتىستى.
– وسىنداي پروبلەمالاردى شەشكەن جاعدايدا عانا ءار وتباسى قايعى-مۇڭسىز ءومىر سۇرەدى. پسيحولوگيالىق كومەك بەرۋ ورتالىعى «باقىتتى وتباسى» باعدارلاماسى اياسىنداعى ومىرگە جولداما العان جاڭالىعى مول ءىس ەكەنىن كورىپ تۇرمىز. اتا-انانىڭ, بالانىڭ تۇسىنىستىگى ورناعان وتباسى ناعىز باقىتتى وتباسى بولادى, وندا بالالار دا جاقسى تاربيە الادى, – دەگەن ول ورتالىق ماماندارىنىڭ جۇمىسىنا جاقسى ناتيجە تىلەدى.
بۇل ورتالىقتىڭ ازىرگە ەلىمىزدە بالاماسى جوق. ونىڭ ناتيجەسى بالانىڭ باقىتتى بولاشاعىنا اراشا بولارىنا پسيحولوگ ماماندار دا سەنىمدى.
قوستاناي
