جاڭا نىسان ۋنيۆەرسيتەت جاتاقحانالارى اراسىن جالعاپ جاتقان جاپسارلاس عيمارات ىشىنەن ورىن الادى. ورتالىقتا زاماناۋي كومپيۋتەر تەحنيكالارىمەن جابدىقتالعان كونفەرەنتس-زال, كوۆوركينگ-اۋماق جۇمىس ىستەيتىن بولادى.
– بۇل يگىلىكتەر ستۋدەنت جاستارعا بەلسەندى تۇردە دەمالىپ جانە بوس ۋاقىتتارىن ءتيىمدى وتكىزۋگە مول مۇمكىندىكتەر بەرەدى, – دەيدى قارمۋ-دىڭ رەكتورى ازامات ەدريسوۆ.
سونىمەن قاتار اتالعان نىسان ىشىندە كوفە-برەيك پىشىمىندەگى ءدامحانا دا جاستارعا قىزمەت كورسەتەتىن بولادى.
ال ۋنيۆەرسيتەتتىڭ باس كورپۋسى مەن جاتاقحانالارىنىڭ اراسىنداعى «جاستار» اللەياسىندا Wi-Fi ەركىن ينتەرنەت جەلىسى بار تابيعات اياسىندا دەنساۋلىقتى قالپىنا كەلتىرۋ اۋماعىنىڭ قۇرىلىسى ءجۇرىپ جاتىر. سونداي-اق, اللەيادا سىرتى قورشالىپ, تابانىنا جاساندى كوگال توسەلگەن شاعىن فۋتبول الاڭى سالىنىپ ءبىتتى.
وسى شارۋالارمەن اينالىسىپ جاتقان مەردىگەر كومپانيا – «شىعىس-5» جشس-ءنىڭ قۇرىلتايشىسى ساماجان كەنجەباەۆتىڭ ايتۋىنشا, ماقسات – قۇرىلىس جۇمىستارىنىڭ ساپالى جۇرگىزىلۋىنە باسا كوڭىل ءبولۋ ەكەن.
– قوسىمشا جۇمىستاردىڭ تۋىنداۋىنا بايلانىستى نىساننىڭ تاپسىرىلۋ مەرزىمى ءسال-ءپال العا جىلجىتىلعانى راس. ەڭ باستىسى, ءبىز ساپاعا ءمان بەرەمىز. دەگەنمەن, تاپسىرىس بەرۋشى تاراپپەن كەلىسىلگەن مەرزىمدە نىساندى تولىقتاي تاپسىرۋعا كۇش سالىپ جاتىرمىز, – دەدى مەردىگەر كومپانيانىڭ باسشىسى.
قاراعاندى وبلىسى
