ارىپتەستىك بايلانىستىڭ ءتيىمدى جولى
جۇما, 22 اقپان 2013 7:25
وبلىس اكىمى سامات ەسكەندىروۆتىڭ توراعالىعىمەن بۇقارالىق اقپارات قۇرالدارى /باق/ ماسەلەلەرى جونىندەگى قوعامدىق كەڭەستىڭ ءبىرىنشى وتىرىسى ءوتتى. وعان رەسپۋبليكالىق, جەرگىلىكتى باسىلىمدار وكىلدەرى, ارداگەر جۋرناليستەر, ۇكىمەتتىك ەمەس ۇيىمدار مۇشەلەرى, ۆەدوموستۆولار باسشىلارى قاتىستى.
جۇما, 22 اقپان 2013 7:25
وبلىس اكىمى سامات ەسكەندىروۆتىڭ توراعالىعىمەن بۇقارالىق اقپارات قۇرالدارى /باق/ ماسەلەلەرى جونىندەگى قوعامدىق كەڭەستىڭ ءبىرىنشى وتىرىسى ءوتتى. وعان رەسپۋبليكالىق, جەرگىلىكتى باسىلىمدار وكىلدەرى, ارداگەر جۋرناليستەر, ۇكىمەتتىك ەمەس ۇيىمدار مۇشەلەرى, ۆەدوموستۆولار باسشىلارى قاتىستى.
ايماق باسشىسى قوعامدىق كەڭەستىڭ قۇرىلۋ سەبەبىن تۇسىندىرە كەلىپ, مەملەكەتتىك اقپاراتتىق ساياساتتى قالىپتاستىرۋ بويىنشا ۇسىنىستار ازىرلەۋ, باق سالاسىندا قوعامدىق قاتىناستاردى جەتىلدىرۋ, جوعارى ەتيكالىق جانە كاسىپتىك قاعيداتتاردى دامىتۋعا جاردەمدەسۋ, وڭىرلىك اقپاراتتىڭ قولجەتىمدىلىگىن قامتاماسىز ەتۋ سەكىلدى مىندەتتەر جۇكتەلەتىنىن, سوعان وراي قوعامدىق پىكىر مەن ازاماتتىق ۇستانىمدى قالىپتاستىرۋداعى «ءتورتىنشى بيلىك» يەلەرى ءرولىنىڭ ەرەكشەلىگىن العا تارتتى. ەلباسى حالىققا ارناعان جولداۋىندا 2050 جىلعا قاراي جالپىعا ورتاق ەڭبەك قوعامىن قۇرۋ, الەمنىڭ ەڭ دامىعان 30 ەلىنىڭ قاتارىنا كىرۋ تالاپتارىن قويدى. سونداي-اق مەملەكەت, قوعام, ۇلت رەتىندە ءومىر ءسۇرۋىمىزدىڭ باستى العىشارتى قوعامدىق كەلىسىمدى ساقتاۋ جانە نىعايتۋ بولىپ تابىلاتىنىن اتاپ كورسەتتى. بۇل ورايدا, بيلىككە دە, باق-تارعا دا ۇلكەن جاۋاپكەرشىلىك جۇكتەلەدى. ءبارىمىز قوعامدى بىرىكتىرۋشىلىك قىزمەتىنە بىرىگىپ اتسالىسۋىمىز كەرەك, دەدى وبلىس اكىمى.
ىشكى ساياسات باسقارماسىنىڭ باستىعى رۋسلان الىشەۆ جەرگىلىكتى اقپارات كەڭىستىگى جايلى ماعلۇمات بەردى. جىل وتكەن سايىن مەملەكەتتىك تاپسىرىس مولشەرى ارتىپ, بۇگىندە 425,5 ميلليون تەڭگەنى قۇراپ وتىر. تىركەۋدەگى 70-كە جۋىق باق بەتتەرىندە وبلىس ومىرىنە قاتىستى ماقالالار مەن پروبلەمالىق ماسەلەلەر جۇيەلى جاريالانىپ كەلەدى. دەسەك تە, شەشىمىن تاباتىن جايتتەر جوق ەمەس. مەملەكەتتىك ورگانداردىڭ باق-تارمەن بايلانىسى ءالى دە جەتىلدىرۋدى قاجەت ەتەدى. ويتكەنى, ينتەرنەت-رەسۋرستاردىڭ جەتىمسىزدىگىنەن سايتتاردىڭ جاڭارتىلمايتىنى, اقپاراتتاردىڭ كەشىگىپ بەرىلۋى, بولماسا ەسكىرىپ قالۋى سياقتى وعاشتىقتار كەزدەسىپ قالادى. سول سياقتى كەي مەكەمەلەردە باسپاسوزگە جاۋاپتىلىق مىندەتى كەزدەيسوق ادامدارعا جۇكتەلە سالعان. تالدامالى تۇسىنىكتەمەلەر بەرۋگە ولاردىڭ كاسىبي شەبەرلىگى مەن بىلىكتىلىگى جەتە بەرمەيدى. سوعان وراي, ءباسپاسوز حاتشىلارىنىڭ وقۋلارىن ۇيىمداستىرۋ, سەمينارلار, ترەنينگتەر وتكىزۋ ۇسىنىلدى.
«ءادىل-ارقا» قوعامدىق قورىنىڭ ءتورايىمى زاۋرە جۇماليەۆا ءوز ويىن «تاۋەلدى جانە تاۋەلسىز» باسىلىمدار توڭىرەگىندە ءوربىتتى. ول جەكە مەنشىك باسىلىمدارعا دا مەملەكەتتىك تاپسىرىسپەن جۇمىس ىستەۋ مۇمكىندىگىن بەرۋدى ءوتىندى. مەنشىكتى تىلشىلەر سۆەتلانا پىشكينا, امانتاي ەرباقىت مالىمەت, دەرەك الۋ قيىندىعىن ءسوز ەتسە, وبلىستىق «سەۆەرنىي كازاحستان» گازەتىنىڭ شەف-رەداكتورى نازگۇل سۇلەيمەنوۆا, قالالىق «پروسپەكت-سك» گازەتىنىڭ رەداكتورى يۋليا پرونينا باق وكىلدەرىن اكىمدىك جيىندارىنا ءجيى قاتىستىرۋىن قۇلاققاعىس ەتتى. ارداگەر جۋرناليست گالينا ۆوروبەۆا پوشتا مەن باق بايلانىسىنىڭ تومەندىگىنە قىنجىلىس ءبىلدىردى. «قىزىلجار-اقپارات» جشس-ءنىڭ باس رەداكتورى كارىباي مۇسىرمان اۋداندىق گازەتتەردىڭ ماتەريالدىق-تەحنيكالىق بازاسىن جانە كادر قۇرامىن نىعايتۋعا, جەرگىلىكتى تەلەديدارلاردا وتكىر ماتەريالداردىڭ كورىنبەي كەتكەنىنە جينالعانداردىڭ نازارىن اۋداردى. باسقوسۋدا وبلىستىق ىشكى ىستەر دەپارتامەنتى جانىنداعى ءباسپاسوز قىزمەتىنىڭ جەتەكشىسى – ءمادينا بالعاشوقوۆا جۇمىسى ۇلگى ەتىلدى.
سامات ساپاربەك ۇلى قورىتىندى سوزىندە باق-تاردىڭ مىندەتى – ادامدار بويىندا ەلگە, جەرگە, وتانعا دەگەن ماقتانىش سەزىمىن ۇيالاتا وتىرىپ, قالىپتاسقان مەملەكەتتىڭ جاڭا ساياسي باعىتىن جان-جاقتى ءتۇسىندىرۋ, بۇل ورايدا جاريالىلىق, اشىقتىق, دالدىك, شىندىق باستى ولشەم بولىپ تابىلاتىنىن تاعى ءبىر ەسكە سالدى. ۆەدومستۆولار باسشىلارىنا بۇقارالىق اقپارات قۇرالدارىمەن تىكەلەي ارىپتەستىك بايلانىس ورناتىپ, ءبىرىنشى كەزەكتە مۇددەلىلىك تانىتۋدى, بيلىك پەن حالىقتى جاقىنداستىرۋدىڭ بارلىق جولدارىن قاراستىرۋدى جۇكتەدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
