جانارتاۋ
سەيسەنبى, 19 اقپان 2013 7:30
جاستار – ۇلكەن كۇش. جاستار دەگەنىمىز – جالىن وت. جاس ءجۇرگەن جەر – مەرەكە. وڭتۇستىك جاستارىنىڭ كوپتىگىمەن ەرەكشەلەنەدى. بۇگىندە وبلىستا 14 پەن 29 جاس ارالىعىنداعى جاستار 765 مىڭنان اسادى. بۇل وبلىس حالقىنىڭ ۇشتەن ءبىرىن قۇرايدى دەگەن ءسوز. ونىڭ ىشىندە 900-دەن استام ەلدى مەكەندەردەگى اۋىل جاستارى 453 مىڭ بولسا, قالا جاستارى – 312 مىڭعا جەتىپ وتىر.
سەيسەنبى, 19 اقپان 2013 7:30
جاستار – ۇلكەن كۇش. جاستار دەگەنىمىز – جالىن وت. جاس ءجۇرگەن جەر – مەرەكە. وڭتۇستىك جاستارىنىڭ كوپتىگىمەن ەرەكشەلەنەدى. بۇگىندە وبلىستا 14 پەن 29 جاس ارالىعىنداعى جاستار 765 مىڭنان اسادى. بۇل وبلىس حالقىنىڭ ۇشتەن ءبىرىن قۇرايدى دەگەن ءسوز. ونىڭ ىشىندە 900-دەن استام ەلدى مەكەندەردەگى اۋىل جاستارى 453 مىڭ بولسا, قالا جاستارى – 312 مىڭعا جەتىپ وتىر.
وڭتۇستىك قازاقستان وبلىسىندا جاستارعا كوپتەگەن جاعدايلار جاسالۋدا. ونىڭ ىشىندە, وبلىس اكىمى اسقار مىرزاحمەتوۆتىڭ تىكەلەي قولداۋىمەن جاستاردىڭ ءبىلىم الۋ, ماماندىق تاڭداۋ, جۇمىسقا ورنالاسۋ باعىتىندا كوپتەگەن وڭ تىرلىكتەر اتقارىلدى. ەلباسىمىز ن.نازارباەۆتىڭ ساليقالى ساياساتى ارقاسىندا قازىر جاستارىمىز قولداۋشىسى, پاناسى, دەمەۋشىسى بار ەكەنىن سەزىنەدى. جاستارعا جاقسى جول كورسەتىپ, باعىت-باعدار سىلتەپ, ەلىمىزدىڭ تۇكپىر-تۇكپىرىن شارلاپ كەتكەن «ديپلوممەن – اۋىلعا!», «قازاقشا سويلەسەيىك!», «جاستار – وتانعا!», «اۋىلدىڭ گۇلدەنۋى – قازاقستاننىڭ گۇلدەنۋى», «ەركىن پىكىر» جانە باسقا دا جوبالار, مىنە, سول جاس تولقىنعا كورسەتىلىپ جاتقان قامقورلىقتىڭ ناقتى دالەلى.
«قازاقستان-2050» ستراتەگياسىندا ەلباسىمىز جاستار تۋرالى «ال كەيىنگى تولقىن جاستارعا ايتارىم: سەندەر – بولاشاققا دەگەن ۇكىلى ءۇمىتىمىزدىڭ تىرەگىسىڭدەر. ءبىزدىڭ بۇگىنگى اتقارىپ جاتقان قىرۋار شارۋالارىمىز تەك سەندەر ءۇشىن جاسالۋدا. سەندەر تاۋەلسىز قازاق ەلىنىڭ پەرزەنتتەرىسىڭدەر. تاۋەلسىز ەلدە تۋىپ, تاۋەلسىز ەلدە تاربيە الدىڭدار. سەندەردىڭ ازات ويلارىڭ مەن كەمەل بىلىمدەرىڭ – ەلىمىزدى قازىر بىزگە كوز جەتپەس الىستا, قول جەتپەس قياندا كورىنەتىن تىڭ ماقساتتارعا اپاراتىن قۇدىرەتتى كۇش» دەگەن بولاتىن.
بۇل جولدار بويىندا جالىنى بار جاستاردىڭ پاتريوتتىق سەزىمىن وياتىپ, كۇش-جىگەرىن تاسىتىپ, اسقاق ارمان, ۇلكەن ماقساتتارعا جەتەلەيتىنى انىق. «تەگىندە ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزادى. ودان باسقا نارسەمەن وزدىم عوي دەمەكتىڭ ءبارى اقىماقشىلىق», دەگەن ەكەن ۇلى اباي. شىنىندا, اقىلدىڭ كوركى – ءبىلىم. قازىرگى زامان – ءبىلىمدىنىڭ زامانى. جاستارعا ساپالى ءبىلىم بەرۋ, ەڭبەككە باۋلۋ ماسەلەسىندە وڭتۇستىك قازاقستان وبلىسىندا وراسان تىرلىكتەر بار.
بۇگىندە وڭتۇستىكتە مەملەكەتتىك كوللەدجدەردىڭ سانى – 44, جەكە مەنشىك كوللەدجدەر سانى – 50. بارلىعى 94 كوللەدجدە 75 645 وقۋشى ءبىلىم الۋدا. قازاقستان رەسپۋبليكاسىنىڭ «ءبىلىم تۋرالى» زاڭىنا ەنگىزىلگەن وزگەرىستەرگە بايلانىستى وبلىستاعى 27 كاسىپتىك ليتسەي كوللەدج بولىپ قايتا راسىمدەلدى. 2012-2013 وقۋ جىلىنا 97 ماماندىق بويىنشا 12 714 ورىنعا سۇرانىستى وبلىس اكىمدىگىنىڭ وڭىرلىك كەڭەسىنىڭ قاراۋىنا ۇسىنىپ, ناتيجەسىندە, كاسىپتىك ليتسەيلەرگە 4861 ورىن, كوللەدجدەرگە 2435 ورىنعا مەملەكەتتىك تاپسىرىس قالىپتاستىرىلدى.
ءوندىرىس ورىندارىنىڭ سۇرانىسى بويىنشا شىمكەنت, ءتۇركىستان, سوزاق, سايرام ءوڭىرلەرىنە قاجەتتى جاڭادان 9 ماماندىق اشىلدى.
«جول كارتاسى» جانە «جۇمىسپەن قامتۋ-2020» باعدارلاماسى بويىنشا 2012 جىلى وبلىستاعى 32 كاسىپتىك ءبىلىم مەكەمەسىندە 10 825 وقۋشى ءبىلىم الدى, ونىڭ 3400-ءى ءبىتىرىپ, 2890-ى جۇمىسقا (83%) ورنالاستى. 2012 جىلى تەحنيكالىق جانە كاسىپتىك ءبىلىم مەكەمەلەرىن مەملەكەتتىك تاپسىرىسپەن بىتىرگەن 7385 ءبىتىرۋشىنىڭ 6783-ءى, ياعني 91,8 پايىزى جۇمىسپەن قامتىلىپ, 2011 جىلمەن سالىستىرعاندا ءبىتىرۋشىلەردىڭ جۇمىسقا ورنالاسۋى 3,7 پايىزعا ارتتى.
جەرگىلىكتى بيلىكتىڭ قامقورلىعىنىڭ تىندىرىمدى ىستەرىنىڭ ناتيجەسىندە وبلىستا جىلدان-جىلعا ءبىلىم ساپاسى جاقسارىپ, كوپتەگەن وڭ جەتىستىكتەرگە قول جەتكىزىلۋدە. وبلىستاعى كاسىپتىك ليتسەي مەن كوللەدجدەردى بىتىرۋشىلەردىڭ كاسىپتىك بىلىكتىلىگىن جانە ءبىلىم ساپاسىن باعالاۋ بويىنشا ءبىلىم جانە عىلىم مينيسترلىگى تاراپىنان جۇرگىزىلگەن تاۋەلسىز باعالاۋدىڭ كورسەتكىشى 2010 جىلى 88,1 پايىز بولسا, 2012 جىلى 94,1 پايىزعا جەتىپ, وبلىسىمىز رەسپۋبليكادا 1-ورىندى يەلەندى.
قاناتبەك دوساليەۆ,
جاڭا تەحنولوگيالار كوللەدجىنىڭ ديرەكتورى,
وڭتۇستىك قازاقستان وبلىسى كوللەدجدەر ديرەكتورلارى كەڭەسىنىڭ توراعاسى.
وڭتۇستىك قازاقستان وبلىسى.
