10 تامىزدا ەلوردادا «ساۋ جۇرەك ايلىعى» جىلسايىنعى قايىرىمدىلىق ۆەلوشەرۋى وتەدى.
«ساۋ جۇرەك ايلىعى» قايىرىمدىلىق شاراسىنىڭ باستى ۇيىمداستىرۋشىسى «ۇلتتىق عىلىمي كارديوحيرۋرگيا ورتالىعى» اق باستاماسىمەن قۇرىلعان «جۇرەك ورتالىعى» كورپوراتيۆتىك قورى. «جۇرەك ورتالىعى» قورى – كلينيكادا عىلىمي جانە ءبىلىم بەرۋ قىزمەتىن دامىتۋ جانە جالپى, قازاقستان بويىنشا كارديوحيرۋرگيالىق قىزمەتتى جەتىلدىرۋ ماقساتىندا قۇرىلعان ەلىمىزدەگى وسىنداي العاشقى جانە جالعىز قور.
شاراعا دونورلىق جۇرەك سالىنعان پاتسيەنتتەر مەن وسى بىرەگەي وپەراتسيالاردى جاساعان دارىگەر يۋري پيا باستاعان ماماندار دا اتسالىسادى. شەرۋگە قاتىسۋشىلار كەرەي-جانىبەك حاندار كوشەسىمەن جانە تۇران داڭعىلىمەن ءجۇرىپ وتەدى. ۇزىندىعى 12 شاقىرىمدى قۇرايتىن مارشرۋت ۇلتتىق عىلىمي كارديوحيرۋرگيا ورتالىعىنىڭ تۇراعىنان (تۇران داڭع., 38) باستالىپ, تۇران داڭعىلىمەن «استانا جۇلدىزدارى» مونۋمەنتىنە دەيىن (قابانباي باتىر داڭعىلىنداعى اينالما جول) جالعاسادى. قاتىسۋشىلار وسى جەردەن كەرى بۇرىلىپ, تۇران داڭعىلىمەن ۇلتتىق عىلىمي كارديوحيرۋرگيا ورتالىعىنا دەيىن جۇرەدى.
مارەدە باعالى سىيلىقتار ۇتىسى ۇيىمداستىرىلادى, ال جينالعان قارجى كارديوحيرۋرگيا سالاسىنداعى ءبىلىم مەن عىلىمدى دامىتۋعا باعىتتالادى.
قاتىسۋشىلاردىڭ قاۋىپسىزدىگىن قامتاماسىز ەتۋ ماقساتىندا ۆەلوشەرۋ بارىسىندا اتالعان كوشەلەردە كولىك قوزعالىسى جارتىلاي شەكتەلەدى. ايتا كەتەيىك, قاشىقتىقتى باعىندىرۋعا 60 مينۋت ۋاقىت بەرىلەدى.
ۆەلوشەرۋگە 16 جاستان اسقانداردىڭ بارلىعى قاتىسا الادى, ول ءۇشىن «جۇرەك ورتالىعى» كورپوراتيۆتىك قورىنىڭ www.hcenter.kz سايتىندا تىركەلۋ كەرەك. ءبىرىنشى بولىپ تىركەلگەن 300 قاتىسۋشىعا قوردىڭ فيرمالىق بەلگىسى بار زاتتاردان سىيلىقتار تابىستالادى. تىركەلۋ جانە تولىق اقپارات www.hcenter.kz سايتىندا. تىركەلۋ قۇنى - 5000 تگ.
