قر ۇكىمەتىنىڭ باسشىسى ورتالىقتىڭ مەديتسينا, اۋىل شارۋاشىلىعى, ەكولوگيالىق بيوتەحنولوگيا, ازىق-ت ۇلىك جانە وڭدەۋ ونەركاسىبى سالالارىنداعى پەرسپەكتيۆالىق ازىرلەمەلەرى, سونداي-اق, ولاردى ەلىمىزدىڭ ەكونوميكاسىنا ودان ءارى ەنگىزۋ مۇمكىندىكتەرى ۇسىنىلعان زەرتحانالىق بلوكتى تەكسەردى.
ەلوردالىق بيوتەحنولوگيا ورتالىعىندا ءتۇرلى باعىتتاعى 14 زەرتحانا ورنالاسقان, وندا گەنەتيكالىق ينجەنەريا, يممۋنولوگيا, باعانالىق جاسۋشالار, ادام ۇلپالارىن قالپىنا كەلتىرۋ, ەكولوگيالىق بيوتەحنولوگيا, فارماكولوگيا سالاسىندا زەرتتەۋلەر جۇرگىزىلەدى.
ۇلتتىق بيوتەحنولوگيا ورتالىعىنىڭ باس ديرەكتورى ە. رامانقۇلوۆ ورتالىق ماماندارى بىرقاتار ماڭىزدى عىلىمي-زەرتتەۋ جوبالارىن ازىرلەگەنىن ايتتى.
نىساندى ارالاۋ بارىسىندا باعانالىق جاسۋشا زەرتحاناسىنىڭ مەڭگەرۋشىسى ۆ. وگاي, ۇجىمدىق پايدالانۋ زەرتحاناسىنىڭ مەڭگەرۋشىسى ە. جولدىباەۆا, وسىمدىكتەردىڭ گەنەتيكالىق ينجەنەرياسى زەرتحاناسىنىڭ مەڭگەرۋشىسى ش. ماناباەۆا, ادام گەنەتيكاسى زەرتحاناسىنىڭ مەڭگەرۋشىسى م. جاباعين ادام گەنوميكاسى, گەنەتيكاسى جانە ونىڭ پاتوگەندەرى, ءۇي جانۋارلارىنىڭ گەنەتيكاسى, سونداي-اق, عىلىمنىڭ جاڭا سالاسى — گەنومدىق رەداكتسيالاۋ سالاسىندا جۇرگىزىلگەن زەرتتەۋلەردىڭ ناتيجەلەرىمەن تانىستىردى. ولاردىڭ اراسىندا — دەنەنىڭ كۇيگەن جەرلەرىن ەمدەيتىن جاسۋشالىق پرەپاراتتار, بيداي مەن كارتوپتىڭ جاڭا سۇرىپتارى, اۋرۋلارعا قارسى ۆاكتسينالار, ءدارى-دارمەكتەر, دارىلىك جانە ەمدەۋ-پروفيلاكتيكالىق پرەپاراتتار بار.
قر پرەمەر-ءمينيسترى اسقار مامين ورتالىقتى قاراۋ قورىتىندىسى بويىنشا قولدانبالى جوبالاردى ازىرلەۋدى جالعاستىرۋدى جانە عىلىمي ناتيجەلەردى كوممەرتسيالاندىرۋ شارالارىن كۇشەيتۋدى تاپسىردى. بىلىكتى مامانداردى دايارلاۋعا ەرەكشە نازار اۋدارۋ قاجەت.
