ايماقتار • 07 تامىز، 2019

اتاۋلى الەۋمەتتىك كومەكتى ءتيىمدى پايدالانۋدا

327 رەت كورسەتىلدى

«دۇنيەگە ءبىر پەرزەنت كەلسە، ءبىر قوزى ارتىق تۋادى; ءبىر قوزى تۋىلسا، ءبىر ۋىس ءشوپ ارتىق شىعادى» دەيدى اتام قازاق. ياعني ءار بالانىڭ ءوز نەسىبەسى بار. بۇگىندە كوپ بالالى انالار اتاۋلى الەۋمەتتىك كومەكتى پەرزەنتتەرىنىڭ نەسىبەسى دەپ سانايدى جانە ءاربىر تەڭگەنى ەسەلەي وتىرىپ، وتباسى پايداسىنا جاراتقىسى كەلەدى. ءسويتىپ الەۋمەتتىك كومەكتى جەكە كاسىبىن اشۋعا جۇمساپ جاتقاندار تۇركىستان وبلىسىندا از ەمەس.

مىسالى، تۇلكىباس اۋدا­­نىن­­داعى قابانباي اۋىلى­نىڭ تۇرعىنى گۇلنارا تاشتە­مي­روۆانىڭ وتباسى تىرشىلىگىن وسى اتاۋلى الەۋمەتتىك كومەك باسقا ارناعا بۇردى دەسەك قاتەلەسپەسپىز. گۇلنارا كومەكتىڭ باسىم بولىگىنە 150 قاز ساتىپ العان. «قازدىڭ ەتى، جۇمىرتقاسى – جۇ­عىمدى تاعام، ءجۇنى – جاستىق، مايىنىڭ ءوزى تەرىنىڭ كۇيىگىنە ەم، پايداسى – شاش-ەتەكتەن. كۇتىمى جاقسى بولسا تەز كوبەيەدى. الداعى ۋاقىتتا وسى قازداردىڭ باسىن كوبەيتىپ، ساتىپ، قوسىمشا كاسىپكە جۇمساۋدى كوزدەپ وتىرمىز. كوپ بالالى انالاردىڭ قامىن ويلاپ، الەۋمەتتىك كومەك كورسەتۋدى ۇيعارعان ەلباسىنا، پرەزيدەنتكە العىسىمىز شەكسىز»، دەيدى گۇلنارا. وسىنداي مۇمكىندىكتەردى ءتيىمدى پايدالانىپ، تۇرمىستارىن جاق­سار­تىپ جاتقانداردىڭ تاعى ءبىرى كۇمىس­باستاۋ اۋىلىنىڭ تۇر­عىنى جىبەك جۇما­بەكوۆا – 6 بالا ءوسىرىپ، تاربيەلەپ وتىر­عان انا. مەكتەپتە ەدەن جۋشى بولىپ جۇمىس ىستەيدى. ماردىمسىز جالاقى­مەن شيەتتەي بالا-شاعانى اسىراۋ قيىنعا سوعىپ جۇرگەن. الاتىن ازداعان جار­دەماقىسى مەن جالاقىسىن جەتكىزە الماي جۇرگەندە، تابىسى تومەن از قام­تاماسىز ەتىلگەن كوپ بالالى وت­باسى­لاردىڭ تۇرمىس ساپاسىن ارتتىرۋعا ارنال­عان باعدارلاما ۇلكەن ءۇمىت سىيلادى. جىبەك جۇ­مابەكوۆاعا جىلىنا 1 591 030 تەڭ­گەنى قۇرايتىن كومەك بەل­گىلە­نىپ، ازىرگە ونىڭ 3 ايلىق سوماسى بەرىل­گەن. جىبەك وعان 2 بۇزاۋلى سيىر ساتىپ الىپتى.

 «قازىر اۋزىمىز اققا جارىدى. ايران-ءسۇت ءىشىپ، ماي-قايماق جەپ جۇرگەن بالالارىما قاراپ، شۇكىرشىلىك ەتەمىن. ارتىلعان اعارعاندى ساۋدا ورىندارىنا وتكىزىپ، اقشاسىن بالالاردىڭ كەرەك-جاراعىنا جۇمسايمىن. الداعى ۋاقىتتا دا وسىنداي قارجىلاي قولداۋ ارقىلى ۇساق مال الىپ، جاعدايىمىزدى ءبىرشاما جاقسارتىپ الامىن دەگەن ويدامىن»، دەيدى كوپ بالالى انا. ت.رىسقۇلوۆ اۋىلىنىڭ تۇرعىنى، 6 بالانىڭ اناسى رايحان جاسۇزاقوۆا دا اتاۋلى الەۋمەتتىك كومەكتىڭ يگىلىگىن كورىپ، قازىرگى تاڭدا سۇيىكتى كاسىبىمەن اينالىسۋدا.  «مەملەكەت تاراپىنان كوپ بالالى انالارعا اتاۋلى الەۋمەتتىك كومەك بەرىلەدى دەگەندى ەستىپ، جۇمىسپەن قامتۋ ورتالىعىنا قۇجاتتارىمدى وتكىزگەنمىن. بۇگىنگى تاڭدا تاعايىندالعان 621 مىڭ تەڭگەنىڭ 380 مىڭ تەڭگەسىن الدىم. ءسويتىپ كوپتەن بەرى ارمانداپ جۇرگەن كاسىبىمە  كىرىستىم دەسەم دە بولادى. ياعني، شاشتاراز رەتىندە اۋدان ورتالىعىندا ورنالاسقان اسەمدىك سالونىنان ءبىر ورىندى جالعا الىپ، قاجەتتى قۇرال-سايماندارىمدى دا تولىقتىردىم. قازىرگى تاڭدا سول جەردە سۇيىكتى كاسىبىممەن شۇعىلدانىپ، تابىس تابۋدامىن»، دەيدى رايحان جاسۇزاقوۆا. كوپ بالالى انا كەلەشەكتە مەملەكەت تاراپىنان كورسەتىلگەن قولداۋدى پايدالانا وتىرىپ، سۇلۋلىق سالونىن اشۋدى جوسپارلاپ وتىر. ايتا بەرسەك، بۇل اۋداندا مۇنداي مىسالدار جەتەرلىك. ءبىر عانا تۇلكىباس اۋدانى بويىنشا 3 081 وتباسىنداعى 17 989  ادامعا  2 788 090 مىڭ تەڭگە اتاۋلى الەۋمەتتىك كومەك تاعايىندالىپتى.

وتباسىنىڭ الەۋمەتتىك بەلسەندىلىگىن ارتتىرۋ باعىتىندا كەلىسىمشارت جاساسۋ ارقىلى مەملەكەتتىك شارتتى اقشالاي كومەك كورسەتۋ باعدارلاماسى دا كوپشىلىكتىڭ كوڭىلىنەن شىعىپ وتىر. وسى «ورلەۋ» جوباسى ارقىلى تۇراقتى جۇمىس تاۋىپ، تۇرمىسىن تۇزەپ العاندار جەتەرلىك. مىسالى، شاردارا قالاسىنىڭ تۇرعىنى روزا دجاۆكاەۆا بۇگىندە ەشكى باعىپ، ءسۇتىن ساتىپ كاسىبىن جانداندىرۋدا. بىرنەشە اۋرۋعا ەم سانالاتىن ەشكى سۇتىنە دەگەن سۇرانىس تا ارتىپ كەلەدى. بۇعان دەيىن ءۇي شارۋاسىمەن، بالا تاربيەسىمەن اينالىسىپ كەلگەن 7 پەرزەنتتىڭ اناسى «ورلەۋ» باعدارلاماسى اياسىندا قارجى الىپ، ەشكى شارۋاشىلىعىن دامىتۋدا. «ەشكى ءسۇتىنىڭ كوپتەگەن ەمدىك قاسيەتى بار. اسىرەسە، اسقازان اۋرۋلارىنا، انەميا، كوزدىڭ ناشار كورۋىنە، دياتەزگە وتە پايدالى. ەمىزۋلى بالالارىنا ساتىپ الاتىندار دا كوپ»، دەيدى روزا دجاۆكاەۆا. وسىلايشا «ورلەۋ» باعدارلاماسى ارقىلى شارۋاسىن دوڭگەلەتىپ وتىرعان روزا بيىل مەملەكەتتىك اتاۋلى الەۋمەتتىك كومەك الىپ، مال باسىن ارتتىرعان. قوراسىندا 30-عا تارتا ەشكى-لاعى، 20-عا جۋىق قويى بار كوپ بالالى انانىڭ ۇيىنە ەشكى ءسۇتىن ىزدەپ كەلۋشىلەردىڭ دە قاتارى ارتىپتى. وتكەن جىلى 379 مىڭ تەڭگە الەۋمەتتىك كومەك العان كوپ بالالى انا بيىل ناۋرىزدا تاعايىندالعان 776 200 تەڭگەنى الىسىمەن ساۋىن ەشكىنىڭ سانىن ارتتىرماق. ەشكى دەمەكشى، بۇگىندە ورداباسى اۋدانىنداعى «ورداباسى ەشكى ءسۇتى ونىمدەرى» وندىرىستىك كووپەراتيۆى كۇنىنە 600 ليتر ءسۇت وندىرۋدە.  ەكى جىل بۇرىن گوللانديادان 330 «زاانەنسكي» اسىل تۇقىمدى ەشكى اكەلگەن  وندىرىستىك كووپەراتيۆ قازىرگى تاڭدا ونى 800 باسقا جەتكىزگەن. ونىڭ 300-گە جۋىعى ساۋىلادى. اۆتوماتتاندىرىلعان ءسۇت ساۋ قوندىرعىلارىمەن جابدىقتالعان كووپەراتيۆ  الداعى ۋاقىتتا ەشكىلەردىڭ سانىن 2 مىڭعا جەتكىزىپ، سۇتىنەن بالمۇزداق تسەحىن اشۋدى كوزدەپ وتىر. «اگرارلىق نەسيە كورپوراتسياسى» ارقىلى 5،5 پايىزدىق نەسيە قارجىسىنا ەشكى ءسۇتىن ساۋاتىن يتاليالىق قۇرىلعى جانە ەشكى ءسۇتىن وڭدەيتىن زاۋىت ساتىپ الدىق. قازىرگى تاڭدا شيكى ءسۇت، پاستەرلەنگەن ءسۇت، ايراننىڭ مايلىلىعىنا قاراي 4 ءتۇرىن، شۇبات، قايماق، سىر، كىلەگەي، يوگۋرت، ىرىمشىك، قۇرت سىندى ونىمدەردى شىعارۋدامىز. سۇرانىس جاقسى، ونىمدەرىمىز شىمكەنت قالاسى مەن تۇركىستان وبلىسىنا جولدانۋدا»، دەيدى وندىرىستىك كووپەراتيۆ قۇرىلتايشىسى مەيىرحان ابەنوۆ. وندىرىستىك كووپەراتيۆتە بۇگىندە 21 ادام جۇمىسپەن قامتىلعان، ونىڭ 7-ءۋى "ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ" باعدارلاماسى ارقىلى قابىلدانىپتى.

اتاۋلى الەۋمەتتىك كومەكتىڭ شاراپاتىن كورىپ وتىرعان وتباسىلاردىڭ تاعى ءبىرى – كەلەس اۋدانى، اباي اۋىلىندا تۇرادى. جەتى بالانىڭ اكەسى بەرىك بەكنازاروۆ «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىمەن» بىرتىلەك اۋىل وكرۋگىندەگى «نۋرمۋحامەدوۆ ب.ا.» شارۋا قوجالىعىنا تۇراقتى جۇمىس ورنىنا جولدانىپ، وتباسىنا 1083276 تەڭگە كولەمىندە شارتتى اقشالاي كومەك تاعايىندالعان. وتاعاسى جەكە قوسالقى شارۋاشىلىعىن دامىتۋ ماقساتىندا، شارتتى اقشالاي كومەكتىڭ ءبىر جولعى تولەمىنە ءوتىنىش ءبىلدىرىپ، 541638 تەڭگەگە 10 قوزىلى قوي الىپ، قوسىمشا جالعا ازىق-ت ۇلىك دۇكەنىن اشىپتى. بۇگىنگى تاڭدا بەكنازاروۆتار اۋلەتىنىڭ وتاناسى «التىن القا» يەگەرى، كىشكەنتاي بالاسىن اۋىلداعى بالاباقشاعا بەرىپ، اتالعان دۇكەن ساۋداسىن جۇرگىزۋدى قولعا العان.

وسىلايشا اتاۋلى الەۋمەتتىك كومەكتى ءتيىمدى پايدالانۋدىڭ جولىن تاۋىپ، شاعىن كاسىبىن كەڭەيتە ءتۇسۋدى كوزدەپ وتىرعان وتباسىلار وڭىردە كوبەيىپ كەلەدى.

تۇركىستان وبلىسى

 

سوڭعى جاڭالىقتار

الماتى قالاسى «سارى» ايماقتا

كوروناۆيرۋس • بۇگىن، 10:28

ارقالىقتا مىڭ ادام كۇي تارتتى

ايماقتار • بۇگىن، 08:45

كوشباسشى وزگەرگەن جوق

سپورت • بۇگىن، 08:44

قالا كۇنىندەگى بايگە جارىسى

سپورت • بۇگىن، 08:42

يسپانيادا ولجالى بولدى

تەننيس • بۇگىن، 08:40

ورگانيكالىق قالدىقتاردى وڭدەيدى

قازاقستان • بۇگىن، 08:38

جاسىل مەتاللۋرگيا قازىر دە بار

قازاقستان • بۇگىن، 08:37

ۇقساس جاڭالىقتار