تاياۋدا وبلىستىڭ اقتوعاي اۋدانىنا ارىس قالاسىنان 200 وقۋشى بالا دەمالۋعا كەلدى. ولار تابيعاتى تامىلجىپ تۇرعان بەكتاۋاتا باۋرايىنداعى «فاكەل» دەمالىس لاگەرىنە ورنالاستىرىلدى.
ارىستان كەلگەن بالاقايلاردى اقتوعاي اۋدانىنىڭ اكىمى سالتانات ابەۋوۆا, پريوزەرسك قالاسىنىڭ اكىمى قايرات قامزين باستاعان توپ سارىشاعان ستانساسىنىڭ تەمىر جول ۆوكزالى باسىنان سالتاناتتى تۇردە قارسى العان بولاتىن.
ارىستىڭ كىشكەنتاي تۇرعىندارى بەكتاۋاتا باۋرايىنداعى اتاقتى دەمالىس وشاعىندا ءبىر ايعا جۋىق ۋاقىت تىنىعاتىن بولادى. ولار ءۇشىن نەشە ءتۇرلى قىزعىلىقتى باعدارلامالار دا ويلاستىرىلىپ قويىلعان. مىسالى, بالالار تازا اۋادا سپورتتىق-بۇقارالىق ويىندار ويناپ, روبوت تەحنيكاسى مەن قولمەن مودەلدەۋ شىعارماشىلىق زەرتحانالارىندا تانىمدىق ساباقتار الاتىن بولادى. سونداي-اق, ولار ءۇشىن تۋريستىك جورىقتاردىڭ باعدارلاماسى دا ۇيىمداستىرىلعان. لاگەردە بالالار التى مەزگىل تاماق ءىشىپ, قىمىزدىڭ دا ءدامىن تاتاتىن بولادى.
ايتا كەتۋ كەرەك, بۇعان دەيىن دە ارىس قالاسىنىڭ وقۋشى بالالارى وبلىستىڭ قارقارالى ۇلتتىق تابيعي پاركىندەگى دەمالىس بازاسىندا جارتى اي دەمالعان بولاتىن. قاراعاندى مەملەكەتتىك تەحنيكالىق ۋنيۆەرسيتەتىنە قاراستى «پوليتەحنيك» دەمالىس بازاسىندا تىنىققان 30 بالا ەكسكۋرسيالار مەن تۋريستىك جورىقتارعا شىعىپ, سپورتتىق جارىستار مەن زياتكەرلىك ويىندارعا قاتىسىپ, جازعى كانيكۋلدى مازمۇندى وتكىزدى.
