نۇروتاندىقتارعا ەرەكشە جاۋاپكەرشىلىك جۇكتەلەدى
جۇما, 8 اقپان 2013 7:31
«نۇر وتان» حالىقتىق-دەموكراتيالىق پارتياسى توراعاسىنىڭ ءبىرىنشى ورىنباسارى باۋىرجان بايبەك وسى قىزمەتكە تاعايىندالعاننان كەيىنگى العاشقى جۇمىس ساپارىن قىزىلجار وڭىرىنەن باستاپ, بىرقاتار مەكەمەلەردە بولدى.
جۇما, 8 اقپان 2013 7:31
«نۇر وتان» حالىقتىق-دەموكراتيالىق پارتياسى توراعاسىنىڭ ءبىرىنشى ورىنباسارى باۋىرجان بايبەك وسى قىزمەتكە تاعايىندالعاننان كەيىنگى العاشقى جۇمىس ساپارىن قىزىلجار وڭىرىنەن باستاپ, بىرقاتار مەكەمەلەردە بولدى.
ب.بايبەك العاشقى كۇنى ايماق باسشىسى سامات ەسكەندىروۆپەن بىرگە پەتروپاۆل قالاسىنداعى №1 قالالىق اۋرۋحاناعا سوعىپ, وسىندا ەمدەلىپ جاتقان ناۋقاستاردىڭ حال-جاعدايىمەن تانىستى. جايلى پالاتالاردىڭ وزىق مەديتسينالىق قۇرال-جابدىقتارمەن جابدىقتالعانىن كوردى. ەمدەۋ مەكەمەسىنىڭ باس دارىگەرى عاليا مامەتوۆا 150 ورىنعا لايىقتالعان اۋرۋحانادا تەراپيا, نەۆرولوگيا جانە ەرەسەكتەرگە ارنالعان جۇقپالى اۋرۋلار بولىمشەلەرى ورنالاسقانىن, ەمدەلۋشىلەرگە قالىپتى ەم-دوم كورسەتىلەتىنىن, ءدارى-دارمەك جەتكىلىكتى ەكەنىن جەتكىزدى. مۇندا ينسۋلت, وستەوحاندروز دەرتىنە دۋشار بولعاندار دا اۋرۋىنان ايىعادى. مەديتسينالىق قوندىرعىلاردى جاڭارتۋ ماقساتىمەن بيىل جەرگىلىكتى قازىنادان 400 ميلليون تەڭگە قاراستىرىلعان. جوعارى ءبىلىمدى دارىگەرلەردىڭ ورتاشا ايلىق جالاقىسى 160 مىڭ تەڭگەدەن اينالسا, مەيىربيكەلەردىڭ قولىنا 71 مىڭ تەڭگە تيەدى.
اق حالاتتى ابزال جاندار «نۇر وتان» حدپ توراعاسىنىڭ ءبىرىنشى ورىنباسارىنا ەگدە ادامداردىڭ فيزيوتەراپيالىق ەم-دوم الاتىن ارنايى قۇرال-جابدىققا زارۋلىگىن ايتىپ, قولۇشىن بەرۋدى ءوتىندى. ب.بايبەك ءوز كەزەگىندە ماسەلەنى جەرگىلىكتى ماسليحاتتاعى فراكتسيامەن اقىلداسا وتىرىپ, بيۋدجەتتەن قارجى ءبولۋ مۇمكىندىكتەرىن قاراستىراتىنىن ايتتى.
ەكىجاقتى اشىق اڭگىمە «قازاقستان-2050» ستراتەگياسى تالاپتارىنان تۋىندايتىن باسىم باعىتتار توڭىرەگىندە ءوربىپ, جۇزەگە اسىرۋ جولدارى كەڭىنەن ءسوز ەتىلدى.
وسى كۇنى ب.بايبەك «نۇر وتان» حدپ وبلىستىق فيليالى عيماراتىندا ءوز وتىنىشتەرىن ايتا كەلگەن ءبىر توپ سولتۇستىكقازاقستاندىق ازاماتتاردى قابىلداپ, مال شارۋاشىلىعىن سۋبسيديالاۋ, حالىق ميگراتسياسى, كوپ بالالى وتباسىلاردى تۇرعىن ۇيمەن قامتاماسىز ەتۋ, يننوۆاتسيالىق جوبالاردى قارجىلاندىرۋ جايلى وي-پىكىرلەرىن تىڭدادى.
رەسەيدەن كوشىپ كەلىپ, بايتەرەك اۋىلىنا قونىستانعان جانات وتىنشيەۆ «جۇمىسپەن قامتۋ-2020» باعدارلاماسى بويىنشا جەڭىلدەتىلگەن نەسيە الىپ, جەكە كاسىپكەرلىكپەن اينالىساتىنىن, ەندى اعاش تسەحىن اشۋعا جەر تەلىمدەرىن رەسىمدەۋ قيىندىق تۋعىزىپ وتىرعانىن, اۋىلداعى ەلەكتر ەنەرگياسى قۋاتتىلىعىنىڭ جەتىمسىزدىگىن, ول ءۇشىن ارالىق ستانسا سالۋ قاجەتتىگىن العا تارتتى. «بلوك» جشس-نىڭ ديرەكتورى يۆان شەفەر ءوندىرىستى ودان ءارى كەڭەيتۋ ماقساتىمەن شاعىن جانە ورتا بيزنەستى قولداۋ باعدارلاماسى شەڭبەرىندە نەسيە الۋ نيەتىندە ءجۇر ەكەن. اينالىم قاراجاتىنا كومەك بەرىلسە, 10 جاڭا جۇمىس ورنىن اشىپ, ءوندىرىس كولەمىن 50 پايىزعا ارتتىرۋعا ۋادە ەتتى. نۇروتاندىقتارمەن, جاستار اكتيۆىمەن جۇزدەسۋلەر دە ەمەن-جارقىن ءوتىپ, وي-پىكىرلەر الماسىلدى.
ب.بايبەك كەلەسى كۇنى وبلىستىق فيليالدىڭ كەزەكتەن تىس ءحVى كونفەرەنتسياسىنا قاتىسىپ, مەملەكەت باسشىسى, «نۇر وتان» حدپ توراعاسى نۇرسۇلتان نازارباەۆ جەرگىلىكتى فيليال توراعالىعىنا ايماق باسشىلىعىنا جاڭادان تاعايىندالعان سامات ەسكەندىروۆتىڭ كانديداتۋراسىن ۇيعارعانىن جەتكىزدى. دەلەگاتتار بۇل ۇسىنىستى ءبىراۋىزدان قولداپ, داۋىس بەردى. جينالعاندار الدىندا سويلەگەن سوزىندە ب. بايبەك فيليالدىڭ جاڭا جەتەكشىسىنە تابىس تىلەدى. پارتيانىڭ الدا اتقارىلاتىن جۇمىس جۇيەسىن بايانداپ بەردى.
جۇمىس ساپارىنىڭ ەكىنشى كۇنى ب. بايبەك قىزىلجار اۋدانىنا قاراستى اسانوۆ ستانساسىنا اتباسىن تىرەدى. مۇندا «ءابي جەر» جشس-ىندە جۇزەگە اسىرىلىپ جاتقان وزىق جوبالارمەن تانىسىپ, تۇرعىندارمەن, ارداگەرلەر, جاستار وكىلدەرىمەن كەزدەستى. اۋىلدىقتاردىڭ پرەزيدەنتتىڭ ساياساتىن قولدايتىندارى ايقىن سەزىلىپ تۇردى. دەسە دە, تۇرعىندار پارتيا توراعاسى ءبىرىنشى ورىنباسارىنىڭ نازارىن كەيبىر ماسەلەلەرگە اۋداردى. مىسالى, ارداگەر ۇستاز كۇلپاش قاپاروۆا اۋىز سۋ جايى قاتتى قيناپ تۇرعانىن قىنجىلا اڭگىمەلەدى. تاسىپ جەتكىزىلەتىندىكتەن, ساپاسى كوڭىل كونشىتە بەرمەيتىن كورىنەدى. «اق بۇلاق» باعدارلاماسىن تەزدەتۋدى ءوتىندى. بۇدان باسقا, تۇرعىندار سانى 2 مىڭعا جەتپەيتىن ەلدى مەكەندەردە امبۋلاتوريالىق پۋنكتتەردى قالدىرۋ, «ديپلوممەن – اۋىلعا!» باعدارلاماسى اياسىندا جۇمىس ىستەيتىن جاس مامانداردىڭ بىرجولعى جاردەماقىسىن كوتەرۋ, تاعى باسقا ماسەلەلەر كوتەرىلدى. ساۋالدارعا وبلىس اكىمى سامات ەسكەندىروۆ ىقتياتتى جاۋاپ بەرىپ, پروبلەمالارمەن جاقسى تانىس ەكەنىن, بارىنشا وڭ شەشۋگە ىقپال جاسايتىنىن ايتتى.
باۋىرجان قىدىرعالي ۇلى ءوز سوزىندە اۋىل اكىمدەرىنىڭ ءرولى مەن جاۋاپكەرشىلىگىن ارتتىرۋ, دەربەستىگىن كۇشەيتۋ, بيزنەس پەن بيلىك ورىندارىنىڭ الەۋمەتتىك ارىپتەستىگى, قوردالانعان پروبلەمالاردى بىرلەسىپ شەشۋ, بيۋدجەت قارجىسىن ورىندى جۇمساۋ, جەمقورلىقپەن كۇرەس, پارتيالىق باقىلاۋدىڭ پارمەندىلىگىن ارتتىرۋ ماسەلەلەرىنە ەرەكشە ەكپىن ءتۇسىردى. ءوز ءسوزىن ەلباسى تاپسىرمالارىن بۇلجىتپاي ورىنداۋدىڭ الدىڭعى شەبىندە نۇروتاندىقتار ءجۇرۋى ءتيىس, دەپ قورىتىندىلادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
