ونداعى ماقسات – «وڭتۇستىكتەن – سولتۇستىككە» اتتى ىشكى كوشى-قون باعدارلاماسىنىڭ ورىندالۋىمەن تانىسۋ. تۇركىستان وبلىستىق قوعامدىق دامۋ باسقارماسىنىڭ باستاماسىمەن وتكەن كوشپەلى جيىن قۇرامىندا وبلىستىق ءماسليحاتتىڭ دەپۋتاتى جاڭاباي اعابەكوۆ, قوعامدىق دامۋ باسقارماسى باسشىسىنىڭ ورىنباسارى د.ءجۇنىسوۆ, حالىقتى جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى نۇرجان نۇراشەۆ, جۋرناليستەر بولدى.
دەلەگاتسيانى ايماق باسشىسىنىڭ ورىنباسارى اسقار ساقىپكەرەەۆ قابىلداپ, تەرىسكەيگە قونىس اۋدارعان اعايىنداردىڭ تىنىس-تىرشىلىگى جايلى ايتىپ بەردى.
«بۇگىنگە دەيىن تۇركىستان وبلىسىنان 94 وتباسى كەلىپ, ورنالاستىرىلدى. جەكە كاسىپپەن اينالىساتىندارعا بارلىق قاجەتتى جاعداي جاسالىپ وتىر. جەر تەلىمدەرى, جەڭىلدىكتى نەسيەلەر, گرانتتار, سۋبسيديالار بەرىلەدى», دەدى اسقار جولامان ۇلى.
ءباسپاسوز ءماسليحاتىندا 2015 جىلدان باستاپ قولدانىلا باستاعان باعدارلامانىڭ ءمان-ماڭىزى ەرەكشە اتاپ ءوتىلدى. سوعان وراي ەلىمىزدىڭ جۇمىس كۇشى از سولتۇستىك وڭىرلەرىنە حالقى تىعىز ورنالاسقان وڭتۇستىك ايماقتاردان حالىقتى ءوز ەركىمەن قونىستاندىرۋ, ولارعا قاجەتتى جاعداي جاساۋ تۋرالى ۇكىمەتتىڭ ارنايى قاۋلىسى قابىلدانىپ, قىزىعۋشىلىق ارتا تۇسكەن. بۇگىنگە تاڭعا دەيىن قونىس اۋدارعانداردىڭ باسىم بولىگى تۇرعىن ۇيمەن, جۇمىسقپەن قامتاماسىز ەتىلگەن. ءوز كاسىبىن اشامىن دەۋشىلەرگە ەگىن, مال شارۋاشىلىعىمەن شۇعىلدانۋشىلارعا جان-جاقتى قولداۋ جاسالادى. اتالمىش باعدارلاماعا قاتىسۋشىلاردىڭ 60 پروتسەنتىن تۇركىستاندىقتار قۇرايدى. اتالعان جۇمىستاردى جانداندىرۋ ماقساتىندا جەتىساي اۋدانىندا سولتۇستىك وبلىسىنان كەلگەن جۇمىس بەرۋشىلەردىڭ قاتىسۋىمەن «وڭىرارالىق بوس جۇمىس ورىندارى» جارمەڭكەسى وتكىزىلدى. وعان 650-دەن استام نيەت ءبىلدىرۋشى ازامات قاتىسىپ, 3 مىڭنان استام بوس جۇمىس ورنى ۇسىنىلدى. سونىمەن قاتار دەمەۋشىلەر ەسەبىنەن 150-گە جۋىق نيەت ءبىلدىرۋشى سولتۇستىك وڭىرلەردىڭ جەرىمەن, تۇرمىس-تىرشىلىگىمەن تانىسىپ, ءوز كوزدەرىمەن كورىپ قايتتى.
سولتۇستىك قازاقستان وبلىسى
