بۇل جۇيە جىلدامدىقتى ارتتىرعان, باعدارشامنىڭ قىزىل تۇسىنە جۇرگەن, قىزىل سىزىقتان اسىپ كەتكەن جانە اۆتوبۋس جولاعىمەن جۇرگەن كولىكتەردى بىردەن سۋرەتكە تۇسىرەدى. بۇدان وزگە, جاڭا تەحنولوگيانى پايدالانۋ قىلمىستىڭ ءىزىن سۋىتپاي, جەدەل اشۋعا ىقپال ەتەدى.
پوليتسيا دەپارتامەنتى وكىلدەرىنىڭ پىكىرىنشە, مۇنداي بەكەتتەردىڭ كوپ بولۋى كولىك جۇرگىزۋشىلەردى تارتىپكە شاقىرادى. ايىپپۇل تولەۋ كەزىندە ادامي فاكتورلار جويىلادى. ءتارتىپ بۇزۋشىلىق اۆتوماتتى تۇردە بىردەن مالىمەتتەر بازاسىنا تۇسەدى جانە كولىك يەسىنە جىبەرىلەدى.
ەسكە سالساق, بۇل جۇيە اعىمداعى جىلدىڭ ناۋرىز ايىنا دەيىن 8 اي بويىنا تەستىلىك رەجىمدە جۇمىس جاساعان. وسى كەزەڭ ىشىندە قالانىڭ بارىنشا قاۋىپتى ايماقتارى انىقتالدى, ەندى «سەرگەك» سول جەرلەرگە ورناتىلادى.
ايتا كەتەرلىگى, نۇر -سۇلتاندا «سەرگەكتى» قولدانۋ ونىڭ ءتيىمدى ەكەنىن كورسەتتى. استانالىق اۆتوموبيليستەر مەن قالا قوناقتارىنىڭ جۇرگىزۋشىلىك مادەنيەتىنىڭ ارقاسىندا 2017 جىلمەن سالىستىرعاندا جولداعى ءولىم ەكى ەسە تومەندەگەن. ەگەر ەلوردادا 2017 جىلى جول اپاتتارىنان 60 ادام كوز جۇمسا, 2018 جىلى 34 ادام اجال قۇشقان.
