دەپۋتاتتار ناسيحاتى ناتيجەلى ءوتتى
سەيسەنبى, 22 قاڭتار 2013 7:07
قازاقستان رەسپۋبليكاسى پرەزيدەنتى ن.ءا.نازارباەۆتىڭ «قازاقستان 2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» جولداۋى مەن «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» ماقالاسىندا كورسەتىلگەن حالىققا قولجەتىمدى ءارى ساپالى كاسىپتىك جانە تەحنيكالىق ءبىلىم بەرۋ ماسەلەلەرى بويىنشا ءماجىلىس دەپۋتاتتارى د.نازارباەۆا, گ.يسىمباەۆا جانە گ.يقسانوۆانىڭ قاتىسۋىمەن الماتى قالاسىنىڭ اۋەزوۆ اۋدانىنداعى كاسىپتىك-تەحنيكالىق وقۋ ورىندارىنىڭ باسشىلارىمەن جانە «نۇر وتان» حدپ اۋەزوۆ اۋداندىق فيليالىنىڭ باستاۋىش پارتيا ۇيىمىنىڭ مۇشەلەرىمەن دوڭگەلەك ۇستەل ءوتتى.
سەيسەنبى, 22 قاڭتار 2013 7:07
قازاقستان رەسپۋبليكاسى پرەزيدەنتى ن.ءا.نازارباەۆتىڭ «قازاقستان 2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» جولداۋى مەن «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» ماقالاسىندا كورسەتىلگەن حالىققا قولجەتىمدى ءارى ساپالى كاسىپتىك جانە تەحنيكالىق ءبىلىم بەرۋ ماسەلەلەرى بويىنشا ءماجىلىس دەپۋتاتتارى د.نازارباەۆا, گ.يسىمباەۆا جانە گ.يقسانوۆانىڭ قاتىسۋىمەن الماتى قالاسىنىڭ اۋەزوۆ اۋدانىنداعى كاسىپتىك-تەحنيكالىق وقۋ ورىندارىنىڭ باسشىلارىمەن جانە «نۇر وتان» حدپ اۋەزوۆ اۋداندىق فيليالىنىڭ باستاۋىش پارتيا ۇيىمىنىڭ مۇشەلەرىمەن دوڭگەلەك ۇستەل ءوتتى.
دەپۋتاتتار جاڭا تەحنولوگيالار كوللەدجىنىڭ بىرنەشە كاسىپتىك-تەحنيكالىق بازاسىن ارالاپ, وقىتۋشىلار مەن ستۋدەنت-جاستار قۇرامىنىڭ جۇمىسىمەن تانىستى. مۇندا ۇكىمەت تاراپىنان كاسىپتىك باعىتتا اتقارىلعان ناتيجەلى جۇمىستار مەن وقۋ ورنىنىڭ زامان تالابىنا ساي مامانداردى دايىنداۋداعى جاڭاشىلدىعى مەن ىسكەرلىگى ءىس جۇزىندە تولىق كورسەتىلدى. سونداي-اق جۇزدەسۋدە «قازاقستان-2050» ستراتەگياسىنىڭ اياسىندا جاڭادان جاسالاتىن الەۋمەتتىك ستاندارتتاردىڭ ءمانى, ولاردى ءتيىمدى قولدانىسقا ەنگىزۋدى قامتاماسىز ەتەتىن زاڭ قابىلداۋ قاجەتتىگى ايرىقشا اتالدى.
«نۇر وتان» حدپ اۋەزوۆ اۋداندىق فيليالى توراعاسىنىڭ ءبىرىنشى ورىنباسارى مۇرات وماروۆ جاڭا تەحنولوگيا كوللەدجىنىڭ بەلسەندى ازاماتتارىن پارتيا مۇشەلىگىنە قابىلداۋ مەن العىس حاتتارمەن ماراپاتتاۋ ءراسىمىن ءماجىلىس دەپۋتاتى داريعا نازارباەۆاعا تاپسىردى. سالتاناتتى راسىمنەن كەيىن داريعا نازارباەۆا ەلباسىنىڭ قازاقستان حالقىنا ارناعان ءاربىر جولداۋى ەلىمىز ازاماتتارىنىڭ الەۋمەتتىك تولىسۋى مەن ءومىرىن جاقسارتۋدى كوزدەيتىنىن اتاپ ءوتتى. جانە ەل حالقىنىڭ بىرلىگىن, قوعامدىق كەلىسىم مەن تولەرانتتىلىقتى نىعايتۋدا ەلباسى اينالاسىنا توپتاسۋىنىڭ نەگىزى بولىپ تابىلادى. سوندىقتان بىزدە ماقسات تا, جوسپار دا, تاپسىرما دا بار, دەدى دەپۋتات.
***
پارلامەنت ءماجىلىسىنىڭ دەپۋتاتى, «اق جول» قدپ فراكتسياسىنىڭ توراعاسى ازات پەرۋاشەۆ شىمكەنتكە كەلدى. العاشقى كەزدەسۋىن پارتيانىڭ وبلىستىق فيليالىنىڭ كەڭسەسىندە وتكىزگەن ول جينالعان پارتيا اكتيۆىنە ەلباسى ن.نازارباەۆتىڭ جولداۋى جونىندە جان-جاقتى ايتىپ بەردى.
«قازاقستان-2050» ستراتەگياسى – ەلىمىزدىڭ قۋاتتى مەملەكەتكە اينالىپ كەلە جاتقانىن ايقىندايتىن قۇجات. ماسەلەن, سالىق جۇيەسىندەگى ءبىزدىڭ ايتىپ جۇرگەن ويلارىمىز جولداۋدا كورىنىس تاپقان. ەلىمىزدىڭ مۇددەسىنە جۇمىس ىستەۋىمىز كەرەك. باي مەن كەدەي اراسىنداعى الشاقتىقتى جويۋ جولدارىن ۇلت زيالىلارى دا ويلاستىرۋلارى قاجەت. دەموگرافيا ماسەلەسى كۇردەلى كۇيىندە قالىپ وتىر, دەدى ا.پەرۋاشەۆ.
كۇن تارتىبىندەگى ماسەلەنى تالقىلاۋعا «اق جول» قدپ وڭتۇستىك قازاقستان وبلىستىق فيليالىنىڭ (وقوف) ءتوراعاسى ا.ورمان, وقوف ءتوراعاسىنىڭ ورىنباسارى ا.قاراجانوۆ, وقوف كوميسسيا ءتوراعاسى و.وماروۆ, وبلىستىق ءماسليحاتتىڭ دەپۋتاتى ق. تۇرلىبەك, «قازبىلىمجابدىقتاۋ» جشس ديرەكتورى ءا.سىزدىقوۆ, «سۋ رەسۋرستارى ماركەتينگ» جشس جاۋاپتى قىزمەتكەرلەرى ب.قۇلبەك, ب.جولداروۆ قاتىستى. ولار ەلباسىنىڭ «قازاقستان-2050» ستراتەگياسىن قىزۋ قولدايتىندىقتارىن, الدا تۇرعان ۇلكەن مىندەت دامىعان 30 ەلدىڭ قاتارىنا قوسىلۋ ەكەنىن ءبىلدىردى.
ازات تۇرلىبەك ۇلى قويىلعان سۇراقتارعا جاۋاپ بەرىپ, وزەكتى ماسەلەلەرگە قاتىستى ءوز وي-پىكىرلەرىن ءبىلدىرىپ, ونى شەشۋدىڭ جولدارىن ايتتى. كەزدەسۋدى قورىتىندىلاي كەلە, وسىندا كوتەرىلگەن ماسەلەلەردىڭ بارلىعى ساراپتالىپ, ءتيىستى شەشىمدەر قابىلداناتىنىن جەتكىزدى. پارتيا جەتەكشىسى قاتىسۋشىلارمەن قۋانىشتى ءجايتتى ءبولىستى. 2012 جىلدىڭ قورىتىندىسى بويىنشا وڭتۇستىك قازاقستان وبلىستىق فيليالى ۇزدىك فيليال دەپ تانىلعان. پارتيا توراعاسى ارنايى ديپلومدى فيليال توراعاسى اناربەك ورمانعا سالتاناتتى تۇردە تابىس ەتتى. سونىمەن قاتار, پارتيا بەلسەندىسى مۇسا پاتەەۆكە «ەرەن ەڭبەگى ءۇشىن» مەدالى تابىستالدى.
***
ەلباسى ن. نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىن ءتۇسىندىرۋ ماقساتىندا ماڭعىستاۋ وبلىسىنا كەلگەن ءماجىلىس دەپۋتاتتارى – قكحپ فراكتسياسىنىڭ مۇشەسى ج.احمەتبەكوۆ جاڭاوزەن قالاسىندا, س.وسپانوۆ جىڭعىلدى اۋىلىندا بولدى.
ج.احمەتبەكوۆ جاڭاوزەن قالاسىمەن جاپسارلاس ورنالاسقان تەڭگە جانە قىزىلساي اۋىلدارىندا بولىپ, تۇرعىندارمەن كەزدەستى. وقىرماندارىمىز گازەت ارقىلى حاباردار بولعانداي, جۋىردا عانا بۇل ەكى اۋىلدىڭ ارقايسىسىندا 300 ورىندىق جاڭا مادەنيەت ءۇيى, سونداي-اق تەڭگەدە دارىگەرلىك امبۋلاتوريا پايدالانۋعا بەرىلىپ, قۋانىش قۇشاعىندا وتىرعان ەدى.
كەزدەسۋدە ەلباسى جولداۋى جايلى, «حالىق كوممۋنيستەرى» فراكتسياسىنىڭ جۇمىسى, پارلامەنت ءماجىلىسىنىڭ دەپۋتاتى رەتىندەگى ءوزىنىڭ اتقارعان قىزمەتى تۋرالى بايانداعان ج.احمەتبەكوۆ ءوزى العاش كەلىپ تۇرعان جاڭاوزەن قالاسى تۋرالى وڭ پىكىرىن ءبىلدىردى.
ال دەپۋتات س.وسپانوۆتىڭ ساپارى ماڭعىستاۋ اۋدانىندا ءوربىدى. «مەملەكەت باسشىسى نۇرسۇلتان نازارباەۆتىڭ 2030 جىلعا دەيىنگى دامۋ ستراتەگياسىن قابىلداۋى – جاس مەملەكەتىمىز ءۇشىن تاريحي وقيعا بولدى. ءبىز بۇگىن اتالمىش ستراتەگيادا بەلگىلەنگەن نەگىزگى مىندەتتەردىڭ ءوز مەرزىمىنەن بۇرىن ورىندالعانىنا كۋا بولىپ وتىرمىز. «قازاقستان-2050» ستراتەگياسى – ەلدى ەڭسەلى ىستەرگە باستايتىن باستى باعدارلاماعا اينالاتىن بولادى», دەگەن سەرىك جامەك ۇلى جىڭعىلدى اۋىلىنا ۇلكەن سىيمەن كەلىپتى. جۇرتشىلىقپەن جۇزدەسۋ بارىسىندا دەپۋتات وسى جاڭالىقتى جەتكىزىپ, جەرلەستەر قۋانىشىن ءبولىستى.
جىڭعىلدىداعى وبلىستاعى از قامتىلعان وتباسىلار بالالارى تاربيەلەنەتىن ينتەرناتتىڭ ىرگەتاسى 1961 جىلى قالانعان. توزىعى جەتكەن نىساننىڭ وسىدان ەكى جىل بۇرىن جۇرگىزىلگەن ساراپتاما قورىتىندىسى بويىنشا اپاتتى جاعدايدا ەكەندىگى انىقتالعان. 2012 جىلى وسى اۋدانعا كەلگەندە كونە مەكتەپ ماسەلەسىمەن تانىسقان س.وسپانوۆ ونى ءتيىستى ورىندار قۇزىرىنا ۇسىنعان بولاتىن. ەندى, مىنە, بۇل مەكتەپ بۇزىلىپ, رەسپۋبليكالىق بيۋدجەتتەن قارالعان قاراجاتقا جاڭا مەكتەپ تۇرعىزىلادى ەكەن.
***
پارلامەنت ءماجىلىسىنىڭ دەپۋتاتى, «اق جول» دەموكراتيالىق پارتياسىنىڭ مۇشەسى ازامات ابىلداەۆ الماتى وبلىسىنىڭ بالقاش اۋدانىندا حالىقپەن كەزدەستى.
دەپۋتات ميالى اۋىلدىق وكرۋگىندە وتكىزگەن كەزدەسۋىندە سايلاۋشىلارعا الدىمەن ەلباسىنىڭ جولداۋىندا ايتىلعان قازاقستاننىڭ وسى كۇنگە دەيىن باعىندىرعان بەلەستەرىن جانە قازىرگى جاعدايىن تەرەڭنەن تالداپ, ەلىمىزدىڭ دامۋ پەرسپەكتيۆالارىنا جەكە-جەكە توقتالدى. حالىق وزدەرىنە جاسالىپ جاتقان قامقورلىققا ريزاشىلىقتارىن ءبىلدىردى. كەزدەسۋگە اۋدان اكىمىنىڭ ورىنباسارى س.سماعۇلوۆ, «اق جول» پارتياسى الماتى وبلىستىق فيليالى توراعاسىنىڭ ورىنباسارى ق.قاڭتارباەۆ جانە 300-دەن اسا ادام قاتىستى.
ا.ابىلداەۆ كەلەسى كەزەكتە اتباسىن باقاناس اۋىلىنا بۇردى. دەپۋتات بۇل اۋىلدا «وتەس» اگروفيرماسى ۇجىمىمەن كەزدەستى. ۇجىمنىڭ اتقارىپ جاتقان جۇمىستارىمەن, «قازاگروقارجى» اق قولداۋىمەن 5000 باس ءىرى قارانى بورداقىلاۋعا ارنالىپ سالىنعان كەشەنمەن جانە ارنايى مال سوياتىن تسەحتارمەن تانىستى. قازىرگى ۋاقىتتا بۇل كەشەندە 2000-عا جۋىق ءىرى قارا بورداقىلانۋدا.
دەپۋتات اقجار ەلدى مەكەنىندە دە جەرگىلىكتى تۇرعىندارمەن ءجۇزدەستى. كەزدەسۋ بارىسىندا حالىق قالاۋلىسى ەلباسىنىڭ حالىققا جولداۋىنداعى باسىمدىقتار تۋرالى كەڭىنەن اڭگىمە قوزعادى. ەندى ءبىز ەلباسى جۇكتەگەن مىندەتتەردى ورىنداۋ ماقساتىندا جۇمىلا ەڭبەك ەتۋگە ءتيىسپىز, دەدى ول.
ا.ابىلداەۆتىڭ حالىقپەن جۇزدەسۋى الماتى وبلىسىنداعى قاپشاعاي قالاسىندا دا ءوتتى.
***
پارلامەنت ءماجىلىسىنىڭ دەپۋتاتى, حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى قايىربەك سۇلەيمەنوۆ استانا قالالىق ارداگەرلەر ۇيىمى بەلسەندىلەرىنىڭ وتىرىسىنا قاتىستى.
وتىرىستا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىنا بايلانىستى ماسەلەلەر قاراستىرىلىپ, ونىڭ شەڭبەرىندە قايىربەك سۇلەيمەنوۆ بايانداما جاسادى.
ءىس-شارانىڭ ناتيجەسىندە پرەزيدەنت جولداۋىن قولدايتىن بەلسەندىلەر شەشىمى قابىلداندى.
باسقوسۋعا 200-دەن استام ارداگەر مەن استانا قالاسى اكىمىنىڭ ورىنباسارى ايدا بالاەۆا قاتىستى.
***
پارلامەنت ءماجىلىسىنىڭ دەپۋتاتى, «نۇر وتان» حدپ فراكتسياسىنىڭ ءمۇشەسى قۇرالاي قاراكەن قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ «قازاقستان – 2050» ستراتەگياسىن, ياعني قازاقستان حالقىنا جولداۋىن ناسيحاتتاۋ جانە ءتۇسىندىرۋ ماقساتىندا اقتوبە قالاسىنىڭ جەدەل مەديتسينالىق جاردەم اۋرۋحاناسىنىڭ جانە اقتوبە قالالىق №1 ەمحاناسىنىڭ ۇجىمدارىمەن كەزدەسىپ, سۇراقتارىنا جاۋاپ بەردى.
ودان ءارى دەپۋتات وبلىستا «قولجەتىمدى باسپانا-2020» مەملەكەتتىك باعدارلاماسىن جۇزەگە اسىرۋ بارىسىندا «نۇر وتان» حدپ اقتوبە قالالىق فيليالى جانىنداعى پارتيالىق باقىلاۋ كوميسسياسى «نۇر اقتوبە» شاعىن اۋدانىندا قۇرعان پارتيالىق باقىلاۋ بەكەتىنىڭ اشىلۋىنا قاتىستى.
