ونىڭ ايتۋىنشا, ع. ءابدىراحىموۆ حالىق الدىنداعى جاۋاپكەرشىلىگىن تولىق ۇعىنعان جوق.
«ەل پرەزيدەنتى قاسىم-جومارت توقاەۆ ايتقانداي, قازىرگى باستى مىندەت – حالىقتىڭ سەنىمى, حالىق پەن بيلىك اراسىندا ديالوگ ورناتۋ. وزدەرىڭىز جاقسى بىلەسىزدەر, عابيدوللا ءابدىراحىموۆ ەل بيلىگىنەن قولداۋ تاۋىپ, تاۋداي سەنىم ارقالادى. ونى ەلىمىزدەگى ەڭ لاۋازىمدى ءارى جاۋاپتى قىزمەتتەرگە تاعايىندادى. وكىنىشكە قاراي, مۇنى ءوزى جەتكىلىكتى تۇردە ۇعىنعان جوق», دەدى ق. كوشەرباەۆ شىمكەنت قالالىق ءماسليحاتىنىڭ سەسسياسىندا. پرەزيدەنت اكىمشىلىگىنىڭ جەتەكشىسى ەكس-اكىمنىڭ ۇنامسىز قىلىقتارىن اتاپ ءوتتى.
«ونىڭ قىلىقتارى باق پەن الەۋمەتتىك جەلىلەردە ەگجەي-تەگجەيلى جاريالانىپ ءجۇردى. مۇنىڭ ءبارى ءدال قازىرگى ۋاقىتتا – حالىق مەملەكەت قولداۋىنا مۇقتاج بولىپ وتىرعاندا, ارىس ەندى عانا ەڭسەسىن تىكتەپ, تۇركىستان جاڭارىپ, ەلىمىز جاڭا زاماننىڭ سىن-قاتەرىنە جاۋاپ ىزدەپ جاتقاندا بولدى. بۇل - مەملەكەت باسشىسىنىڭ تاپسىرمالارىنا كەرەعار, بيلىكتىڭ ابىرويىن تۇسىرەتىن جاعداي. بۇگىندە عابيدوللا ابدىراحىموۆقا ارتىلعان ساياسي سەنىم شەگىنە جەتتى. حالىق بيلىكتىڭ بارلىق تارماعىنىڭ ادال جۇمىسىنا لايىق. وسىعان بايلانىستى ءوڭىر باسشىلارى حالىققا قالتقىسىز قىزمەت ەتىپ, وزدەرىن كەلىستى ۇستاۋى كەرەك», دەپ تۇيىندەدى ءسوزىن قىرىمبەك كوشەرباەۆ.
ەسكە سالا كەتسەك, بۇگىن مەملەكەت باسشىسىنىڭ جارلىعىمەن عابيدوللا ءابدىراحىموۆ شىمكەنت قالاسىنىڭ اكىمى لاۋازىمىنان بوساتىلدى. ونىڭ ورنىنا وسى كۇنگە دەيىن وتىرار اۋدانىن باسقارىپ كەلگەن ەرلان ايتاحانوۆ تاعايىندالدى.
