ساياسات • 31 شىلدە، 2019

شەتەلدىكتەردى مويىنداتقان شەبەرلەر

234 رەت كورسەتىلدى

تۇركىستانعا كەلگەن تۋريستەردىڭ ەستەلىك رەتىندە ءوز ەلىنە كادەسىي اكەتىپ جاتاتىنى زاڭدى. ەلىمىزدىڭ وزگە وڭىرلەرىنەن زيارات جاساۋعا كەلگەندەر دە قۇرقول قايتپايدى. وسى ورايدا اسىرەسە شەتەلدىكتەردىڭ تەرراكوت (كۇيدىرىلگەن بالشىق) كادەسىيلارعا اڭسارى كوبىرەك اۋادى ەكەن. شەتەلدىكتەر قىزىعاتىن، سازدان جاسالعان بالبال، سازسىرناي، قۇمىرالار الىستان اكەلىنبەيدى، ارينە كيەلى قالاداعى شەبەرلەر ورتالىعىندا جاسالادى.

قازاقستان قولونەرشىلەر وداعى­نىڭ مۇشەسى ابايحان رىسباەۆتىڭ ايتۋىنشا، شەبەرلەر ورتالىعىنا شەتەلدىكتەر ءجيى كەلەدى. ولارعا قولونەرشىنىڭ ءمىنسىز جاساعان ونى­مىنە قاراعاندا، ايقىش-ۇيقىش بولسا دا ءوزى جاساعان بۇيىم تاڭ­سىق. «قۇمىرا جاسايتىن ۇرشىق­قا وتىرىپ، سازدان بۇيىم شى­عار­عىسى كەلەدى. باسىم بولىگى كە­سەنىڭ ءپىشىمىن شىعارۋعا تىرىسادى. كوپتەگەن مەملەكەتتەردە ارت-تە­راپيا كەڭ تاراعان. ياعني، ادامنىڭ پسي­حيكاسىنداعى كۇيزەلىستى ونەر ارقىلى جەڭۋگە تىرىسادى، گلينوتەراپيا شەتەلدىكتەردى ەرەكشە قىزىقتىرادى. ساز-توپىراقپەن فيزيولوگيالىق ەمدەلۋ دە پايدالى. كورمەلەرگە شا­قىر­تۋ الىپ، فرانتسيا، تايلاند سەكىلدى ەلدەرگە بارعانىمدا ارحي­تەكتۋرالىق ەسكەرتكىشتەن تىس ادامداردى قول­ونەر بۇيىمدارى قاتتى قى­زىق­تىراتىنىن اڭعاردىم. قۇمىرا جاسايتىن ۇرشىعىمدى ءوز دۇڭگىر­شەگىمە قويامىن دا، قوناق­تار­دىڭ كوزىنشە ىدىس جاسايمىن. شەتەل­دىكتەر ەرەكشە ىقىلاسى اۋىپ، قىزىعۋشىلىق تانىتادى»، دەيدى شەبەر.

الماتى كوركەمسۋرەت ۋچيلي­ششەسىنىڭ كەراميكا فاكۋلتەتىن بىتىر­­گەن ابايحان اعا قايتا جاڭ­عىرتۋ شەبەرحاناسىندا، ياعني رەستاۆراتسيا سالاسىندا جۇمىس ىستەپ كەلەدى. رەستاۆراتسيامەن قاتار قۇ­مىرا جاسايدى. شەبەردىڭ ايتۋىنشا، ءار ۇلتتىڭ وزىنە ءتان مى­نەزى، مەنتاليتەتى قولونەردە اي­قىن كورىنەدى. «تۇركىستانداعى قازبا جۇ­مىستارى كەزىندە تابىلعان ىدىس­تار فورمالىق تۇرعىدا ەرەكشە. قازبا جۇمىستارىنان تابىلعان تۇرمىستىق بۇيىمداردان تالعامدى بايقايمىز. بۇيىمدار تەرراكوت كۇيىنشە قالادى. نەمەسە اڭدار مەن وسىمدىكتەر بەينەلەنەدى. كا­دەسىي جاساعاندا باعزى زامانعى شەبەرلەردىڭ تالعامىمەن ساناسامىن. ۇلتتىڭ بولمىسىنان، تاريحىنان دەرەك بەرەتىن كادەسىي ارقاشان ترەندتتە»، دەيدى ا. رىسباەۆ.

قولونەر ادامدى ىشكى بولمىستىڭ ۇيلەسىمدىلىگىنە جەتەلەيدى دەپ ەسەپ­تەيتىن شەبەردىڭ ايتۋىنشا، كىلەم توقۋ، كوزە، قۇمىرا، كيىزدەن ءتۇر­لى بۇيىم جاساۋ شەتەل ازاماتتارىنا قىزىقتى.

 

تۇركىستان وبلىسى

 

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار