قىڭىرايعان قاباقتار
بەيسەنبى, 30 مامىر 2013 2:49
وعان نە سەبەپ بولىپ وتىر؟
بۇل كۇندە كومىرشىلەردىڭ « قورعاۋ» كاسىپوداعى مەن «ارسەلور ميتتال تەمىرتاۋ» اق اراسىندا كەزەكتى ۇلكەن داۋ تۋىپ جاتىر. ەڭبەككەرلەر مۇددەسىن قورعاۋشى ۇيىم جانە اتالعان كومپانيا تاراپتارىنان كەيىنگى كەزدە ءبىر-ءبىرىن تۇسىنبەۋشىلىك, كەلىسپەۋشىلىك جايلار جيىلەپ تۇرسا, وسى جولعى تەكەتىرەس تە ەكى جاق جۇيكەسىن ءبىراز توزدىراتىن سىڭايلى. ەندىگى تارتىس تا قيقۋسىز ەمەس. كاسىپوداقشىلاردىڭ مالىمدەۋىنشە, ايماقتاعى ءوندىرىس الپاۋىتى بۇعان دەيىن قاناتى استىنا الىپ كەلگەن الەۋمەتتىك-تۇرمىستىق نىسانداردىڭ بىرقاتارىنان باس تارتقىسى بار.
بەيسەنبى, 30 مامىر 2013 2:49
وعان نە سەبەپ بولىپ وتىر؟
بۇل كۇندە كومىرشىلەردىڭ « قورعاۋ» كاسىپوداعى مەن «ارسەلور ميتتال تەمىرتاۋ» اق اراسىندا كەزەكتى ۇلكەن داۋ تۋىپ جاتىر. ەڭبەككەرلەر مۇددەسىن قورعاۋشى ۇيىم جانە اتالعان كومپانيا تاراپتارىنان كەيىنگى كەزدە ءبىر-ءبىرىن تۇسىنبەۋشىلىك, كەلىسپەۋشىلىك جايلار جيىلەپ تۇرسا, وسى جولعى تەكەتىرەس تە ەكى جاق جۇيكەسىن ءبىراز توزدىراتىن سىڭايلى. ەندىگى تارتىس تا قيقۋسىز ەمەس. كاسىپوداقشىلاردىڭ مالىمدەۋىنشە, ايماقتاعى ءوندىرىس الپاۋىتى بۇعان دەيىن قاناتى استىنا الىپ كەلگەن الەۋمەتتىك-تۇرمىستىق نىسانداردىڭ بىرقاتارىنان باس تارتقىسى بار. تۇيىپ ايتقاندا, بۇرىنعى كومەك-قولداۋدى توقتاتپاق نيەتتە. ولاي بولا قالسا شاحتەرلەردى كاسىپتىك اۋرۋدان ەمدەيتىن قاراعاندىداعى مەديتسينالىق بولىمشە, قارقارالىداعى «شاحتەر» دەمالىس ءۇيى, توپارداعى «جارتاس» شيپاجايى باسقاعا ىسىرىلىپ, جەكە مەنشىككە ساتىلۋى مۇمكىن. كومىر وندىرۋشىلەردىڭ, بولات دايىنداۋشىلاردىڭ بالالارى دەمالاتىن نۇرا وزەنى بويىنداعى «ورلەنوك» لاگەرىنىڭ دە وسى جاز قۇشاق اشۋى-اشپاۋى بەيمالىم.
«قورعاۋ» كاسىپوداعى وڭتايلاندىرۋ دەلىنەتىن وسىناۋ شارالارعا قارسى, ارينە. ەڭبەككەرلەردىڭ ازىن-اۋلاق جەڭىلدىكپەن دەنساۋلىقتارىن ساۋىقتىراتىن, شاحتالار لاۆالارى قاپىرىعىنداعى, دومنا پەشتەرى تۇبىندەگى اۋىر جۇمىستان از دا بولسا تىنىستاپ, ءال جينايتىن ورىندارىنان مۇلدەم ايىرىلىپ قالۋى قاۋىپتەندىرەدى. بۇلاردىڭ وزگەلەر يەلىگىنە وتكىزىلۋى جۇزدەگەن كەنشىنىڭ, مەتاللۋرگتىڭ مۇنداي مۇمكىندىككە بۇدان بۇلاي قاراي قولى جەتپەۋىنە اكەلىپ سوقتىراتىندىعىنا كونگىسى كەلمەيدى.
بىلتىرعى ەڭبەك داۋىنىڭ ازەر تارقاتىلۋى ۇمىتىلا قويماعان شاقتا «ارسەلور ميتتال تەمىرتاۋدىڭ» تاعى ءبىر ارەكەتى سان مىڭ ۇجىم مۇشەلەرىنە ۇناپ وتىرعان جوق. نەگە بۇلاي دەپ بىلگىلەرى كەلسە, سوڭعى ۋاقىتتاردا پايدا بولعان ۇيرەنشىكتى سىلتاۋ الدان شىعادى. الەمدىك قارجىلىق داعدارىسقا بايلانىستى ونىمدەر وتىمدىلىگىنىڭ تومەندەۋى, تابىستىڭ ازايۋى سەبەبىنە قيىستىرىلادى. سولاي-اق بولعاندا, بۇعان سەندىرەرلىكتەي ناقتى ايعاق اشىق ايتىلمايدى. ويتكەنى ساراپشىلار بولجامى بويىنشا, جاعدايدىڭ سونشالىقتى جاداۋ ەمەستىگى ءبىلىنىپ قالادى.
اتى دارداي كومپانيا بۇرىندارى دا جومارت قولدى ەمەس ەدى, ال بۇگىندە ودان سايىن قالتىراۋىق بولۋدان قىسىلمايدى. دەنساۋلىقتارىن ءوندىرىسكە سارپ ەتىپ, ەڭبەككە جارامسىز بولىپ قالعان عارىپتەرگە ءتيىستىلى وتەماقى تولەۋدى جىلدان-جىلعا سوزىپ كەلە جاتۋى سونى كورسەتەدى. ءتىپتى ونى وڭايلىقپەن بەرمەۋ ءۇشىن شاحتەر-رەگرەسنيكتەردىڭ ءبىرازى مۇگەدەكتىك تۋرالى جالعان انىقتامالار الىپتى-مىس دەگەن ءسوزدەردىڭ ايتىلۋىن قايتەرسىز. كىم بىلەدى, بولجاۋسىز, ەسەپتەن تىس شىعىنداردان قاشقاقتاۋدىڭ ىشقىنعاندا تاعى ءتۇرلى تاسىلدەرى تابىلار ءالى. باسقا-باسقا, سونىڭ ءبىرى ارناۋلى جۇمىس كيىمىمەن مەزگىل-مەزگىل قامتاماسىز ەتۋدى سوزبالاققا سالۋ, ابدەن توزعانشا الماستىرماۋ الەمگە ايان الىپتىڭ اتاعىنا جاراسار ما. ۇنەمدەۋدىڭ دە ۇنەمدەۋى بار ەمەس پە؟..
ايتا كەتەر ءجايت, كومپانيانىڭ مالىمدەۋى بويىنشا, الەۋمەتتىك نىسانداردان ارىلۋ تۋرالى ماسەلە ويلاستىرىلعان ەمەس, ول «قورعاۋدىڭ» ورىنسىز داۋى. ال كاسىپوداقتار ءوز پىكىرلەرىنەن تايعىسى جوق. كىمدىكى دۇرىس, كىمدىكى بۇرىس ەكەنىن انىقتاۋ ءبىر-بىرىمەن سوتتاسۋعا دەيىن شيەلەنىسەتىن ءتارىزدى.
ايقىن نەسىپباي,
«ەگەمەن قازاقستان».
قاراعاندى.
