كانادالىقتاردىڭ تەحنيكاسى دا, تاجىريبەسى دە كەرەك
جۇما, 24 مامىر 2013 2:06
قوستاناي وبلىسىنا كانادانىڭ البەرتا پروۆينتسياسىنان دەلەگاتسيا كەلدى. ونىڭ قۇرامىندا البەرتا ۇكىمەتىنىڭ جانە ىسكەرلىك ورتا وكىلدەرى, ياعني اسىل تۇقىمدى مال وسىرەتىن, گەنەتيكالىق ماتەريال, مال شارۋاشىلىعى كەشەندەرى ءۇشىن قۇرال-جابدىق وندىرۋگە جانە ەكسپورتقا شىعارۋعا ماماندانعان كومپانيا مەنەدجەرلەرى مەن «گەرەفورد», «انگۋس» اسىل تۇقىمدى ءىرى قارا شارۋاشىلىقتارىنىڭ جەتەكشىلەرى بار. وبلىس باسشىلىعى مەن كاسىپكەرلەرى جانە كانادالىق دەلەگاتسيا كەزدەسۋىندە ەكى جاق تا ىنتىماقتاسا جۇمىس ىستەۋگە دايىن ەكەندىگىن ءبىلدىردى.
جۇما, 24 مامىر 2013 2:06
قوستاناي وبلىسىنا كانادانىڭ البەرتا پروۆينتسياسىنان دەلەگاتسيا كەلدى. ونىڭ قۇرامىندا البەرتا ۇكىمەتىنىڭ جانە ىسكەرلىك ورتا وكىلدەرى, ياعني اسىل تۇقىمدى مال وسىرەتىن, گەنەتيكالىق ماتەريال, مال شارۋاشىلىعى كەشەندەرى ءۇشىن قۇرال-جابدىق وندىرۋگە جانە ەكسپورتقا شىعارۋعا ماماندانعان كومپانيا مەنەدجەرلەرى مەن «گەرەفورد», «انگۋس» اسىل تۇقىمدى ءىرى قارا شارۋاشىلىقتارىنىڭ جەتەكشىلەرى بار. وبلىس باسشىلىعى مەن كاسىپكەرلەرى جانە كانادالىق دەلەگاتسيا كەزدەسۋىندە ەكى جاق تا ىنتىماقتاسا جۇمىس ىستەۋگە دايىن ەكەندىگىن ءبىلدىردى. نەگىزى اۋىل شارۋاشىلىعى جوعارى دامىعان كانادامەن قوستاناي وبلىسى ساۋدا-ساتتىقتى سوناۋ 90-شى جىلداردىڭ ورتاسىندا-اق باستاپ جىبەرگەن. اۋا-رايى, تابيعاتى قازاقستاننىڭ سولتۇستىك وڭىرىمەن تىم ۇقساس كانادادان ءبىزدىڭ كاسىپكەرلەر اۋىلشارۋاشىلىق تەحنيكالارى مەن اسىل تۇقىمدى مال ساتىپ الدى. قوستانايلىق كاسىپكەرلەر, اسىرەسە ساسكاچەۆان پروۆينتسياسىمەن الىس-بەرىستى دامىتقان ەدى.
دەلەگاتسيانى باستاپ كەلگەن البەرتا پروۆينتسياسىنىڭ اۋىل شارۋاشىلىعىن جانە سەلولىق ءوڭىردى دامىتۋ ءمينيسترى ۆەرلين ولسون وزدەرىنىڭ قوستانايلىقتارعا ءتيىمدى ارىپتەس بولاتىنىن ايتتى. بۇل پروۆينتسيانىڭ ۇشتەن ءبىرى دامىعان اۋىل شارۋاشىلىعىنىڭ ۇلەسىنە تيەدى. وندا 5 ميلليون باس ءىرى قارا وسىرىلەدى. بۇل بۇكىل كاناداداعى ءىرى قارا سانىنىڭ 40 پايىزى بولىپ تابىلادى. ەلدەگى ەتتىڭ 70 پايىزىن وسى پروۆينتسيا وندىرەدى. البەرتا مال ازىعىن دايىنداپ, ساتۋدا دا الدىنا ەشكىمدى سالا بەرمەيدى. بۇل قوستانايلىق كاسىپكەرلەردىڭ قىزىعۋشىلىعىن تۋدىراتىنىنا وبلىس اكىمى نۇرالى سادۋاقاسوۆ سەنىم ءبىلدىردى.
– ءبىز كانادانىڭ اۋىل شارۋاشىلىعى ساياساتىنا ىقپالى زور پروۆينتسيامەن ىنتىماقتاستىعىمىزدى كەڭەيتكىمىز كەلەدى, – دەدى قوناقتارعا نۇرالى مۇستافا ۇلى.
ەكىجاقتى كەزدەسۋدە قوستانايلىق كاسىپكەرلەر مەن شارۋاشىلىق ۇيىمداستىرۋشىلار دا ءسوز الدى. وبلىستاعى «اگروفيرما ديەۆ» جانە «قايرات» وكف» جاۋاپكەرشىلىگى شەكتەۋلى سەرىكتەستىكتەرى كانادادان اكەلىنگەن اسىل تۇقىمدى ءىرى قارانى ءوسىرىپ جانە اۋىلشارۋاشىلىق تەحنيكالارىن پايدالانىپ وتىرعان شارۋاشىلىقتاردىڭ ءبىرى. «ديەۆ» شارۋاشىلىعى جەرگىلىكتى اۋليەكول تۇقىمىنىڭ ونىمدىلىگىن بۇرىنعىدان دا ارتتىرۋ ءۇشىن كانادادان ءۇش ءجۇز باستىڭ سىرتىندا «شارولە» اسىل تۇقىمدى ءىرى قارانىڭ قاشارى مەن وگىزشەسىن اكەلگەن بولاتىن. شارۋاشىلىق ديرەكتورى ولەگ دانيلەنكو كانادادان اكەلىنگەن ءىرى قارانىڭ قوستانايدىڭ سۋىعىنا تەز كوندىگىپ كەتكەنىن, سالماقتى دا جاقسى قوساتىنىن ايتتى. الايدا, كانادالىق سيىرلار جەرگىلىكتى تۇقىمداسى سياقتى جايىلمايدى, ولاردى قىسى-جازى قورادا ۇستاپ, باعۋ كەرەك. بۇل, ارينە, جەرگىلىكتى مالعا قاراعاندا قىمباتقا تۇسەتىنىن دە جاسىرعان جوق.
قوستانايلىق اۋىلشارۋاشىلىق تاۋارلارىن وندىرۋشىلەر تەحنيكا پاركىن كانادالىق قۋاتتى تەحنيكالارمەن جاڭارتىپ جاتىر. مىسالى, قامىستى اۋدانىنداعى «قايرات» وكف» جشس-نىڭ بۇكىل تەحنيكاسى كانادادان الىنعان. شارۋاشىلىق جەتەكشىسى تورەمۇرات وتەپوۆ كانادالىق كاسىپكەرلەرگە اۋىلشارۋاشىلىق تەحنيكالارىن قوستانايدا قۇراستىرۋدى ۇسىندى. جالپى, شەتەلدىك تەحنيكالاردىڭ سەرۆيستىك قىزمەتىن جەتىلدىرۋ وبلىستاعى اۋىلشارۋاشىلىق تاۋارلارىن وندىرۋشىلەر ءۇشىن وزەكتى ماسەلەنىڭ ءبىرى.
كانادالىق دەلەگاتسيا وبلىستىڭ قارابالىق جانە قوستاناي اۋداندارىنداعى شارۋاشىلىقتاردى ارالادى. كەزدەسۋدە دەلەگاتسيا مۇشەسى, البەرتا پروۆينتسياسىنداعى مال شارۋاشىلىعى جانە ەت ونەركاسىبى قاۋىمداستىعىنىڭ توراعاسى دەيۆ چالاك ايتقانداي, ەكونوميكالىق بايلانىس مىقتى بولۋى ءۇشىن ەكى جاق تا وبلىس اۋىل شارۋاشىلىعىنىڭ قاجەتىن ءبىلۋى ءتيىس. يننوۆاتسيالىق-ينۆەستيتسيالىق جوبالاردى ءجۇزەگە اسىرىپ جاتقان قوستاناي وبلىسىنداعى اۋىل شارۋاشىلىعى كاسىپكەرلەرىنىڭ كانادالىق ءارىپتەستەردەن ۇيرەنەرى دە, الارى دا بار. مۇنى قارىم-قاتىناس جيىلەي كەلە ۋاقىت تا كورسەتەدى.
ءنازيرا جارىمبەتوۆا,
«ەگەمەن قازاقستان».
قوستاناي.
