• 18 مامىر, 2013

كۇركەتاۋىق ءوسىرۋ

3012 رەت

كورسەتىلدى

8 مين

وقۋ ءۇشىن

Egemen Qazaqstan

كۇركەتاۋىق ءوسىرۋ

سەنبى, 18 مامىر 2013 1:23

اۋىلدى جەردە تۇراتىن وتباسىلار ءۇشىن ەڭ ءتيىمدى بيزنەستىڭ ءبىر ءتۇرى كۇركەتاۋىق ءوسىرۋ بولسا كەرەك. مۇنى بالا كەزىمىزدە ءوزىمىز دە كوردىك. ءبىزدىڭ ۇيىمىزدە كۇزدى كۇنى 50-60-قا دەيىن كۇركەتاۋىق بولاتىن. سودان قالعان تاجىريبەمىز بويىنشا ايتساق, كۇركەتاۋىق كوپ باپ تالعامايدى. ونى جەمدەۋ ىسىمەن 7-8 جاستاعى بالا دا شۇعىلدانا الادى. ءبىزدىڭ ويىمىزشا, بۇل ءىس تاۋىق, قاز, ۇيرەك سەكىلدى قۇستاردى وسىرۋدەن دە جەڭىلىرەك جانە تيىمدىرەك بولسا كەرەك.

سەنبى, 18 مامىر 2013 1:23

ادەتتە بۇل ءىستى ەڭ الدىمەن كۇركەتاۋىق تۇقىمىن تاڭداۋدان باستايدى. ءبىزدىڭ ەلىمىزدە ونىڭ نەگىزىنەن ەكى ءتۇرى بار. سونىڭ ءىشىندە قالايى ءتۇستى كەلگەن كەڭ كەۋدەلى كۇركەتاۋىقتاردىڭ سالماعى 11-12 كيلوعا دەيىن تارتادى.

ەكىنشىسى اق ءتۇستى, كەڭ كەۋدەلى كۇركەتاۋىقتار ەتىنىڭ ساپاسىمەن ەرەكشەلەنەدى جانە ول تەز جەتىلەدى.

كۇركەتاۋىقتاردى كۇتۋ. كۇركەتاۋىقتاردى باسقا قۇستاردان جەكە ۇستاپ, جەكە كۇتىمگە العان دۇرىس. سەبەبى, ولاردىڭ باسقا قۇستاردان تۇرقى ءىرى بولىپ كەلەدى. ادەتتە كۇركەتاۋىقتى جەكە تاۋىق قورادا باعادى. شامامەن العاندا ەكى كۇركەتاۋىق ءۇشىن ءبىر شارشى مەتر جەر قالدىرادى. بالاپاندارىن جەكە كۇتىمگە الادى. كۇركەتاۋىققا ارنالعان قورانىڭ بەرىك تە بىتەۋ بولعانىن ەسكەرگەن ءجون. ويتكەنى, تاۋىقتىڭ بۇل ءتۇرى ايازعا شىدامسىز, سونداي-اق ىلعال مەن جەل ءوتىن دە ونشا جاقتىرمايدى.

كۇركەتاۋىقتى ازىقتاندىرۋ.

كۇركەتاۋىقتاردى ازىقتاندىرۋ ءۇشىن بەلوكتىق تاعامدار كوبىرەك قاجەت ەتىلەدى. قىستى كۇنى ءۇش رەت ازىقتاندىرىلسا, كۇزدە 4-5 رەت ازىقتاندىرعان ءجون. ازىق قۇرامىندا كۇنىنە 250-300 گرامم شاماسىندا استىق ءدانىن بەرىپ وتىرعان دۇرىس بولادى.

جالپى, كۇركەتاۋىق كوپ تاماق تالعامايدى. كارتوپ, قىزىلشا, قىرىققابات, اسقاباق, سۇرلەم, جۇگەرى, بيداي قالدىقتارىن ارالاستىرىپ بەرە بەرۋگە بولادى. بۇرشاق داقىلداس, كوك ءشوپ تۇرلەرىن دە جەي بەرەدى.

كۇركەتاۋىق جاز ايلارىندا كوبىرەك جايىلادى. وسى كەزدە ول ءارتۇرلى شوپتەردى, قۇرت-قۇمىرسقا, شاعىن وزەندەردەن ۇساق بالىقتار ۇستاپ جەي بەرەدى. ەگەر جايىلىستا مۇنداي مۇمكىندىك بولماعان جاعدايدا ولاردى قوسىمشا ازىقتاندىرىپ وتىرۋ قاجەت. تاماق قالدىقتارىن جانە سۋ بەرىپ وتىرعان ءجون. ال قىستى كۇنى ارناۋلى الاڭشادا جەم بەرىپ, قىدىرتىپ العان دۇرىس. الاڭشانى قاردان تازارتىپ, جەمدى شاشىپ تاستايدى. سەبەبى كۇركەتاۋىققا قىستى كۇنى قيمىل-قوزعالىس قاجەت بولادى. شاشىلعان جەمدى تەرىپ جەۋ ارقىلى ول جاقسى قيمىلداپ, قان تاراتادى. ەگەر دالانىڭ تەمپەراتۋراسى 10 گرادۋستان سۋىق بولسا, وندا كۇركەتاۋىقتاردى دالاعا شىعارماعان ءجون.

كۇركەتاۋىق ءوسىرۋ.

كۇركەتاۋىقتى مىنانداي تاسىلدەرمەن وسىرۋگە بولادى. ادەتتە كۇركەتاۋىق 27-30 كۇن ارالىعىندا ءوز جۇمىرتقاسىن باسىپ شىعارادى. جۇمىرتقانى نەمەسە بالاپانداردى قۇس فابريكالارىنان ساتىپ الۋعا دا بولادى.

بالاپانداردى ءبىر قابىرعاسىنا پوليەتيلەن پلەنكالار تارتىلعان جىلى دا جارىق شاعىن قورالاردا كۇتىمگە العان ءجون. ونى جىلىتۋ ءۇشىن 250 ۆاتتىق لامپا ءىلىپ قويۋعا بولادى. ازىق پەن سۋدى كلەتكانىڭ نەعۇرلىم سالقىنداۋ جەرىنە قويادى. بالاپانداردىڭ استىنا ءشوپ پەن سابان توسەۋگە بولادى. بىراق ولاردى كۇن سايىن اۋىستىرىپ وتىرۋ قاجەت. 2-2,5 اي شاماسىندا ءوسىپ-جەتىلگەن بالاپانداردى مۇنان ءارى تاۋىق قوراعا اپارادى. وسى كەزدە ول قورالاردا جەلدىڭ بولماعاندىعىن ەسكەرگەن دۇرىس. قورا جارىق بولۋ ءۇشىن وعان دا جىلۋ شاشاتىن لامپا ىلەدى.

بالاپانداردى العاشقى كۇندەرى پىسىرىلگەن جۇمىرتقامەن ازىقتاندىرادى. جۇمىرتقانى ۇساقتاپ, بولشەكتەگەن دۇرىس. بەس كۇننەن كەيىن ۇساقتالعان نەمەسە تارتىلعان ەت, ىرىمشىك, پياز بەرگەن دۇرىس. ون كۇننەن كەيىن پىسىرىلگەن كارتوپ پەن ءسۇت ارالاستىرىلىپ ۇنتاقتالعان بيداي مەن ارپا, ءارتۇرلى تاعام قالدىقتارىمەن ازىقتاندىرىلا باستايدى. سۋعا جاس جۇمىرتقانىڭ سارى ۋىزىن قوسۋ, سونداي-اق سۇتپەن سۋارۋ ءجون بولادى.

كۇركەتاۋىق ونىمدەرىن وتكىزۋ. ادەتتە كۇركەتاۋىقتى ەت پەن جۇمىرتقاسى ءۇشىن باعادى. سونىمەن قاتار, ونىڭ ءجۇنى مەن مامىعى دا قاجەتكە جارايدى. ەڭ الدىمەن, وسى ونىمدەردى قايدا وتكىزۋگە بولاتىندىعىن انىقتاپ العان ءجون. كۇركەتاۋىقتىڭ ەتى وتە ءوتىمدى كەلەدى. ول ادەتتە قالالى جەردە جاقسى وتەدى. سونىمەن قاتار, اۋىل ادامدارى دا ونى تاعام ءۇشىن جاقسى پايدالانادى. دەمەك, سىزگە وسى ىستەن تۇراقتى پايدا قاراتىپ وتىرۋ ءۇشىن قالىپتاسقان رىنوكتى ءبىراز زەرتتەپ العان ءجون.

شىعاتىن مولشەرلى شىعىندار.

ينكۋباتوردان جۇمىرتقا ساتىپ الۋعا (150 دانا ح 80 تەڭگە) = 12 مىڭ تەڭگە.

ينكۋباتور ساتىپ الۋعا – 20 مىڭ تەڭگە.

جىلدىق ازىق ساتىپ الۋعا – 30 مىڭ تەڭگە.

سوندا بارلىق شىعىن 62 مىڭ تەڭگە تۇرادى.

كىرەتىن كىرىس كولەمى.

ادەتتە ءبىر كۇركەتاۋىق جىلىنا 50 مەن 100 دانا ارالىعىندا جۇمىرتقا بەرەدى. ەگەر ءسىز 50 كۇركەتاۋىق وسىرەتىن بولساڭىز, ولاردان كەم دەگەندە 2500 دانا جۇمىرتقا الىپ, ساتۋعا بولادى. دەمەك, ءسىز بۇل ىستەن كەمىندە 200 مىڭ تەڭگە پايدا تاباسىز.

ءبىر كۇركەتاۋىق ورتاشا العاندا 5-7 كيلو ەت بەرەدى. كۇركەتاۋىقتىڭ 1 كيلو ەتىنىڭ باعاسى 1200 تەڭگەدەن. كەيبىر جەرلەردە بۇدان ارزان دا, قىمبات تا بولۋى مۇمكىن. سوندا شامامەن العاندا, ءبىر كۇركەتاۋىق ساتساڭىز, ودان سىزگە 6 مىڭ تەڭگە كىرىس كىرەدى. ەگەر 10 كۇركەتاۋىق ساتساڭىز, 60 مىڭ تەڭگە كىرىس كىرگىزەسىز. بىراق بۇل ىسپەن اينالىسقان ادام ەڭ كەمى ءبىر جىلدىڭ ىشىندە 50 نەمەسە ودان دا كوپ كۇركەتاۋىقتى ءوسىرىپ, ساتاتىندىعى انىق. سوندا ءسىز 50 كۇركەتاۋىق ءوسىرىپ, ساتاتىن بولساڭىز 300 مىڭ تەڭگە پايدا قاراتاسىز. كۇركەتاۋىق ءوسىرۋدى بيزنەس جۇرگىزۋ ماقساتىندا قولعا العان وتباسى ءۇشىن 50 كۇركەتاۋىقتىڭ ءوزى تۇككە تۇرمايتىندىعى, ولار كەمىندە 200-300 كۇركەتاۋىق وسىرەتىندىگى انىق. سوندا ءسىز بۇل ىستەن ءبىر جىلدىڭ ىشىندە كەم دەگەندە 1 ميلليون تەڭگەگە جۋىق پايدا قاراتا الاسىز. تەك قانا ونى دۇرىس ۇيىمداستىرىپ, جولعا قويۋ جاعىن ەسكەرىڭىز. جىل وتكەن سايىن بۇل ءىس سىزگە جەڭىلدەپ, ونىڭ ەسەسىنە بەرەتىن پايداسى كوبەيە بەرەتىندىگىنە سەنىمىمىز مول.

ازىرلەگەن

سۇڭعات ءالىپباي,

«ەگەمەن قازاقستان».

پايدالى كەڭەستەردى مىنا سايتتاردان الۋعا بولادى:

http://prohoz.ru/soderzhanie-cyplyat-indeek/

http://alwaystop.ru/post/php?id=55

http://www.fermer.ru/node/2905

http://www.forum-grad.ru/forum236/thread7168/html

http://indogu.narod.ru/indvz.html

http://www./fugl.ru/domashnyaya-ptitsca/indaika/porody-inaukov. html