قوعام • 24 شىلدە، 2019

تۇركىستان وبلىسىندا جۇمىس ورىندارى قۇرىلادى

127 رەت كورسەتىلدى

تۇركىستان وبلىسىندا بيىل قۇرىلىس وتە قارقىندى. ءبىرىنشى جارتىجىلدىقتا 52،2 ملرد تەڭگەگە قۇرىلىس جۇمىستارى جۇرگىزىلىپ، ناقتى كولەم يندەكسى 116 %-دى قۇرادى، 298،2 مىڭ شارشى مەتر تۇرعىن ءۇي (2537 پاتەر) پايدالانۋعا بەرىلىپ، وتكەن جىلدىڭ وسى مەرزىمىمەن سالىستىرعاندا 47،4%-عا ارتقان. ەلىمىز بويىنشا ەڭ كوپ نىساندار سالىنىپ جاتقان وڭىردە 2537 پاتەر پايدالانۋعا بەرىلگەن. تۇركىستانداعى حالىقارالىق اۋەجاي 2020 جىلى، ال وعان باراتىن جول بيىلعى جىلدىڭ سوڭىندا پايدالانۋعا بەرىلمەك.

تۇركىستان وبلىستىق ءماس­لي­حاتىنىڭ كەزەكتەن تىس قىرىق ءبىرىنشى سەسسياسىنىڭ جۇ­مى­سىندا وسىنداي دەرەكتەردى كەل­تىرگەن ءوڭىر باسشىسى ءومىر­زاق شوكەەۆ پرەزيدەنت باقى­لاۋىن­دا تۇرعان تۇركىستان مەن ارىس قالاسىنداعى قۇرىلىس جۇ­مىس­­تارىنىڭ قارقىنى باسەڭ­دەمەي­تىنىن مالىمدەدى. «بيىل اكىمشىلىك-ىسكەرلىك ورتالىقتا 7 نىسان پايدالانۋعا بەرىلەدى دەپ جوسپارلانعان. ال رۋحاني-مادەني ورتالىعىندا 11 نىسان­نىڭ 4-ەۋى جىل سوڭىنا دەيىن تاپسىرىلادى»، دەگەن ءوڭىر باسشىسى ارىستى قالپىنا كەلتىرۋ ماسەلەسى دە باستى نازاردا ەكەنىن ايتتى. بۇگىندە ارىس قالاسىندا 5 646 تۇرعىن ءۇيدى قالپىنا كەلتىرۋ جۇمىستارى باستالىپ، ونىڭ 1100-دەن استامى قالپىنا كەلتىرىلگەن، 3 تۇرعىن ءۇيدىڭ قۇ­رى­­لىسى جاڭادان جۇرگىزىلىپ اياق­­تالدى. جىل باسىنان بەرگى اتقا­رىلعان جۇمىستار جونىندە بايان­داعان وبلىس اكىمى 43 ەلدى مە­كەن ورتالىقتاندىرىلعان اۋىز سۋ قۇبىرىمەن قامتاماسىز ەتىل­گەنىن، اۋىل شارۋاشىلىعى سالاسىندا تامشىلاتىپ سۋارۋ، جىلىجاي شارۋاشىلىعىن قۇرۋ سياقتى تيىمدىلىگى زور ءتا­جىري­بەلەر ەنگىزىلىپ جات­قا­­­نىن اتاپ ءوتتى. «اۋىل – ەل بەسىگى» جوباسى بويىنشا 7 ەلدى مەكەن­نىڭ الەۋمەتتىك-ەكو­نو­مي­­كالىق جاعدايىن جاقسارتۋ ماق­ساتىندا 89 جوباعا 4 ملرد تەڭگە بولىنگەن. «كۇز ايلارىندا اۋدان ورتالىقتارى مەن باع­دار­­لاماعا ەنگەن ەلدى مەكەندەر جا­ڭارىپ قايتا تۇلەۋى كەرەك»، دە­دى وبلىس اكىمى.

تۇركىستان وبلىسىندا شاعىن ورتا بيزنەس سۋبەكتىلەرىنىڭ سانى 138 مىڭعا جەتىپ، وتكەن جىل­مەن سالىستىرعاندا 8،5%-عا وسكەن. بۇل كورسەتكىش بويىنشا الماتى قالاسىنان كەيىن 2-ورىندا تۇر. جىل باسىنان بەرى نەگىزگى كاپيتالعا سالىنعان ينۆەستيتسيالار كو­لە­مى 133،7 ملرد تەڭگەنى قۇ­راپ، 39،6%-عا ارتقان. «قارا­پاي­ىم زاتتار ەكونوميكاسى» باعدارلاماسىن جۇزەگە اسى­رۋ بارىسىندا وبلىستا 70،8 ملرد تەڭگەگە 207 جوبا قاراس­تى­رىلعان. بۇگىنگى تاڭدا 9،1 ملرد تەڭگەنى قۇرايتىن 6 جوبا ەكىن­شى دەڭگەيلى بانكتەر­مەن ما­قۇلدانىپ، قارجى­لان­دى­رى­لۋ­دا. بۇل كورسەتكىش بويىنشا ءتۇر­كىستان وبلىسى وڭىرلەر اراسىن­دا كوش باستاپ تۇر. سونداي-اق وبلىس دامۋىنداعى باسىم با­عىت­تاردىڭ ءبىرى تۋريزم بولىپ وتىر. ءتۋريزمنىڭ زياراتشىلىق، ارحەولوگيالىق، تابيعاتتى تاما­شا­لاۋ، تاۋ شاڭعىسى سياقتى سا­لا­لارىن دامىتۋ جوسپاردا بار. وڭىردە بالاباقشامەن قام­­تۋ كورسەتكىشى 96 پايىزعا جە­­تىپ وتىر. 1-شىلدەگە دەيىن الەۋ­مەتتىك جاعدايى تومەن 71 مىڭ­عا جۋىق وتباسىنا اتاۋ­لى الەۋ­­مەتتىك كومەك تاعا­يىن­دال­عان. وبلىس بيۋدجەتىنىڭ جالپى كو­لەمى 682،8 ميلليارد تەڭگە، التى ايدا بيۋدجەت قارجىسى 99 پايىزعا يگەرىلگەن، دەدى وبلىس اكىمى.

 

تۇركىستان وبلىسى

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار