12 ەلدىڭ ديپلوماتى – قوستانايدا
سارسەنبى, 8 مامىر 2013 1:45
قوستانايعا ەكى كۇندىك ساپارمەن كانادانىڭ, جاپونيانىڭ, ءۇندىستاننىڭ, وڭتۇستىك افريكا رەسپۋبليكاسىنىڭ, يندونەزيانىڭ, يراكتىڭ, ۆاتيكاننىڭ قازاقستانداعى ەلشىلەرى مەن كورەيا ەلشىسىنىڭ ورىنباسارى, قىتاي حالىق رەسپۋبليكاسى ەلشىسىنىڭ كەڭەسشىسى جانە حاتشىسى, ومان سۇلتاندىعى ەلشىسىنىڭ حاتشىسى, بەلگيا ەلشىلىگى ساۋدا-ەكونوميكالىق ءبولىمىنىڭ باسشىسى, يسپانيا كورولدىگى ەلشىلىگىندەگى وسىنداي ءبولىمنىڭ وكىلى كەلدى. «ەلدەستىرمەك – ەلشىدەن» دەگەندەي, ولاردىڭ بارلىعى دا قوستاناي وبلىسىمەن تانىسۋدى ماقسات تۇتتى.
سارسەنبى, 8 مامىر 2013 1:45
قوستانايعا ەكى كۇندىك ساپارمەن كانادانىڭ, جاپونيانىڭ, ءۇندىستاننىڭ, وڭتۇستىك افريكا رەسپۋبليكاسىنىڭ, يندونەزيانىڭ, يراكتىڭ, ۆاتيكاننىڭ قازاقستانداعى ەلشىلەرى مەن كورەيا ەلشىسىنىڭ ورىنباسارى, قىتاي حالىق رەسپۋبليكاسى ەلشىسىنىڭ كەڭەسشىسى جانە حاتشىسى, ومان سۇلتاندىعى ەلشىسىنىڭ حاتشىسى, بەلگيا ەلشىلىگى ساۋدا-ەكونوميكالىق ءبولىمىنىڭ باسشىسى, يسپانيا كورولدىگى ەلشىلىگىندەگى وسىنداي ءبولىمنىڭ وكىلى كەلدى. «ەلدەستىرمەك – ەلشىدەن» دەگەندەي, ولاردىڭ بارلىعى دا قوستاناي وبلىسىمەن تانىسۋدى ماقسات تۇتتى.
– ەلشىلەرگە وبلىستى تانىستىرۋداعى باستى ماقسات – ءوڭىردىڭ ينۆەستيتسيالىق قاۋقارىن تانىتۋ. مۇمكىن وسى ەلدەردىڭ بىرىمەن ەكونوميكالىق مۇددەمىز توعىسىپ قالار, – دەدى وبلىس اكىمىنىڭ ورىنباسارى مۇرات دارىباەۆ. مۇنداي شارانى وتكىزۋگە وبلىس اكىمدىگى مۇرىندىق بولعان.
قوناقتار الدىمەن وبلىس ورتالىعىنداعى «دوستىق» ۇيىندە بولدى. وندا قازاق جەرىنىڭ ءبىر شالعايى – قوستانايدىڭ ءتۇرلى ۇلت وكىلدەرىنىڭ تاتۋ-ءتاتتى تۇرىپ جاتقان قۇت مەكەن ەكەنىنە كوزدەرى جەتتى. «دوستىق» ۇيىندەگى ەتنومادەني ءبىرلەستىكتەر جۇمىسىمەن تانىستى. وسىندا جىل سايىن وتەتىن حالىقارالىق «التىن ميكروفون» بالالار ءان بايقاۋىنىڭ جەڭىمپازدارى كۇشىمەن شاعىن كونتسەرتتى تاماشالادى. وبلىستىق تاريحي-ولكەتانۋ مۋزەيىن ارالاعاننان كەيىن قوناقتار «سادچيكوۆ» ساۋىن فەرماسىندا, كەن الىبى – «سوكولوۆ-سارىباي كەن ءوندىرۋ بىرلەستىگى» اكتسيونەرلىك قوعامىندا, «فيرما اراسان» جاۋاپكەرشىلىگى شەكتەۋلى سەرىكتەستىگىنىڭ رۋدنىي فيليالىندا بولدى.
ەكى كۇندىك ساپاردىڭ ەكىنشى كۇنى وبلىس اكىمى نۇرالى سادۋاقاسوۆ ديپلوماتيالىق كورپۋسپەن كەزدەستى. وبلىستاعى بەلگىلى كاسىپكەرلەردىڭ قاتىسۋىمەن ۇلكەن ءماجىلىس ءوتتى. كەزدەسۋدە شەتەلدىك قوناقتار قوستاناي وبلىسى ەكونوميكاسى مەن تابيعي بايلىعى تۋرالى حاباردار ەتىلدى. ودان كەيىن ەلشىلەردىڭ وبلىس ءوندىرىسى جانە الەۋمەتتىك-مادەني نىساندارمەن تانىسۋى ودان ءارى جالعاستى. ولار كونفەت شىعاراتىن «بايان سۇلۋ» جانە شەتەلدىك جۇردەك ماشينالار قۇراستىراتىن «اگروماشحولدينگ» اكتسيونەرلىك قوعامدارىن, «ەۆراز كاسپيان ستال» جاۋاپكەرشىلىگى شەكتەۋلى سەرىكتەستىگىن, مەملەكەتتىك تىلدە ءبىلىم بەرەتىن زارەچنىي ورتا مەكتەبىن, كوركەمسۋرەت گالەرەياسىن, ءى.وماروۆ اتىنداعى قازاق دراما تەاترىن, جەڭىس ساياباعىن ارالاپ كوردى.
ءنازيرا جارىمبەتوۆا,
«ەگەمەن قازاقستان».
قوستاناي.
