قۇرىلىس قارقىنىن كۇشەيتۋدى تاپسىردى

ۇكىمەت باسشىسى ارىس قالا­سىنا اپتا سايىن كەلىپ، جاعدايدى باقىلاۋدا ۇستايتىنىن ايتقان بولاتىن. بۇل ساپارىندا پرەمەر-مينيستر ا.مامين جانە تۇركىستان وبلىسىنىڭ اكىمى ءو.شوكەەۆ الدىمەن ماڭعىستاۋ وبلىسى مەن سايرام اۋدانىنا تيەسىلى اۋماقتا اتقارىلىپ جاتقان جۇمىستاردى كورىپ، تۇرعىنداردىڭ تالاپ-تىلەك­تەرىن تىڭدادى. اتالعان وبلىس پەن اۋدانعا بەكىتىلگەن سەكتوردا 331 ءۇي بار. ونىڭ 279-ىنا جوندەۋ جۇ­مىستارى باستالعان. مۇلدەم جا­رامسىز بولىپ قالعان 4 ءۇي ءسۇرى­لىپ، ورنىنا جاڭاسى سالىنباق. سەكتورعا قاراستى ۇيلەردى 7 قۇرى­لىس كومپانياسىنىڭ 310 جۇمىس­شىسى 1-تامىزعا دەيىن جوندەپ بىتىرمەك. بۇگىندە 102 ءۇي تولىق جوندەۋدەن ءوتىپ، 147 ۇيدە قۇرىلىس جۇمىستارى جۇرگىزىلۋدە. سونداي-اق پرەمەر-مينيستر قوستاناي وبلىسى مەن سارىاعاش اۋدانىنا قاراستى 16-سەكتورعا ات باسىن بۇردى. قوستاناي وبلىسىنىڭ اكىمى ارحيمەد مۇحامبەتوۆ قۇرىلىس جۇمىستارىنىڭ بارىسىمەن تانىستىردى. اسقار ۇزاقباي ۇلى الماتى قالاسىنا تيەسىلى 14-سەكتورداعى تۇرعىن ۇيلەردى دە ارالادى. مۇندا 8 كومپانيانىڭ 471 جۇمىسشىسى 487 ۇيگە جوندەۋ جۇمىستارىن ءجۇر­گىزۋدە. قايتا قالپىنا كەلتى­رۋ جۇمىستارىمەن تانىسقان ۇكى­مەت باسشىسى قۇرىلىس جۇمىس­تارىنىڭ قارقىنىن كۇشەيتۋدى تاپسىردى. قالاداعى بارلىق ءجون­دەۋ جۇمىستارىنىڭ 1-تامىزعا دەيىن اياقتالۋى كەرەكتىگىن ايتتى. 

قازىر ارىس قالاسىندا 1544 جەكەمەنشىك تۇرعىن ۇيدە قۇرىلىس جۇمىستارى اياقتالعان، 7089 جەكە تۇرعىن ۇيدە جانە 96 كوپ قاباتتى ۇيدە قالپىنا كەلتىرۋ جانە ءجون­دەۋ جۇمىستارى جالعاسۋدا. سون­داي-اق قۇرىلىس جۇمىستارى 126 جەكەمەنشىك ۇيدە جانە 1 كوپ قاباتتى ۇيدە جۇرگىزىلۋدە. الەۋ­مەتتىك 66 نىساننىڭ 62-ءسى قال­پىنا كەلتىرىلۋدە، جاڭا قۇر­ى­لىس 4 نىساندا ءجۇرىپ جاتىر. قالپىنا كەلتىرۋ جۇمىستارىنا 207 كومپانيا، 7073 جۇمىسشى، 265 ارنايى تەحنيكا تارتىلعان. پرەمەر-مينيستر ساپار بارىسىندا تۇرعىندارمەن كەزدەسىپ، قالانى قالپىنا كەلتىرۋ بويىنشا جۇمىستارعا بارلىق وڭىرلەر، ۇلتتىق كومپانيالار، ەلىمىزدىڭ ءىرى بيزنەس وكىلدەرى بەلسەنە قاتىسىپ جاتقانىن اتاپ ءوتتى. جاۋاپتى باسشىلارعا زارداپ شەككەن بيزنەس نىساندارىن، كولىك جانە ين­جە­نەرلىك ينفراقۇرىلىمدى قالپىنا كەلتىرۋ جۇمىستارىنىڭ قارقىنىن تومەندەتپەۋدى، دەنساۋلىق ساقتاۋ جانە ءبىلىم بەرۋ نىساندارىن دا­يىنداۋ بويىنشا كەشەندى شارالار قابىلداۋدى تاپسىردى. 

سونداي-اق پرەمەر-مينيستر ءتۇر­كىستان قالاسىندا بولىپ، ق.ا.ياساۋي مۋزەيى جانە «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ساپار ورتالىعى قۇرىلىستارىمەن تانىستى. اۋماعى 3200 شارشى مەتر بولاتىن قوجا احمەت ياساۋي مۋزەيى قۇرىلىسىن «سامۇرىق-قازىنا» كومپانياسىنىڭ تاپسىرىسىمەن «بازيس-ا» كومپانياسى جۇرگىزۋدە. قۇرىلىس جۇ­مىستارىن 2020 جىلى اياقتاۋ جوسپارلانعان. اتالعان نىسانداردى جانە «ازىرەت سۇلتان» مەم­لەكەتتىك تاريحي-مادەني قو­رىق-مۋزەيى اۋماعىنداعى تا­ريحي-مادەني ورىنداردى زەرتتەۋ، انىقتاۋ، قايتا قالپىنا كەل­تىرۋ جۇمىستارى بويىنشا ءما­دەنيەت جانە سپورت ءمينيسترى اق­توتى رايىمقۇلوۆا، ال قايتا جا­ڭارتۋ جۇمىستارى بويىنشا «قازقايتاجاڭارتۋ» رمك ديرەكتورى اسىلحان ءسادۋوۆ باياندادى. «ازىرەت سۇلتان» تاريحي-ءما­دەني قورىق-مۋزەيىنە قاراستى XI-XII عاسىرلارعا ءتان «جۇما مە­شىتى» بۇگىنگە دەيىن جەتكەن 40 مەشىتتىڭ ءبىرى سانالادى. مە­شىت عيماراتى بويىنشا ميح­راب­پەن تولىق قالپىنا كەلتىرۋ، باس­تىرماعا جاپسارلاس سالىن­عان قابىرعالاردى دەمونتاجداۋ، قۇدىقتى قالپىنا كەلتىرۋ ءجا­نە اۋماقتى اباتتاندىرۋ جۇمىس­تارى جاسالماق. «قىلۋەت» جەراس­تى مەشىتىن قالپىنا كەلتىرۋ جۇ­مىستارى اياسىندا جەراستى قۇرى­لى­سىنىڭ كوتەرگىش قۇرىلىم­دارى مەن ىرگەتاسىن نىعايتۋ، ىشكى ءۇي-جايدى قالپىنا كەلتىرۋ جانە ىرگەلەس اۋماقتى اباتتاندىرۋ جوسپارلانعان. «جەتى اتا» قاقپاسىنان كەسەنەگە دەيىنگى اۋماقتىڭ پانورامالىق ءتۇرىن قالپىنا كەلتىرۋ ماقساتىندا ورتالىق ماگيسترالدى كوشەلەردىڭ ءبىرى قايتا جاڭعىرتىلىپ، «داربازا»، «ءمۇساللا» جانە «جەتى اتا» قاقپالارى دا تاريحي قالىپقا ەنبەك. ارحەولوگيالىق جۇمىستاردىڭ ناتيجەسىندە ىرگەتاسى تابىلعان ورتاعاسىرلىق كوشەنىڭ كىرەبەرىس ىزدەرى مەن حان ورداسى قورشاۋىنىڭ نەگىزگى فراگمەنتتەرى قالپىنا كەلتىرىلىپ، باسقا قۇرىلىستاردى ىزدەستىرۋ جۇمىستارى جالعاستىرىلاتىن بولادى. ال كۇلتوبە قالاشىعى اشىق اسپان استىنداعى مۋزەيگە اينالدىرىلادى. 

پرەمەر-مينيستر جۇمىس ساپارى بارىسىندا سونىمەن قاتار، وبلىس ورتالىعىندا بوي كوتەرىپ جاتقان ستاديوندى، وقۋشىلار سارايىن، حالىققا قىزمەت كورسەتۋ ورتالىعىن، مەدياورتالىق پەن كونگرەسس-حولل عيماراتتارىن، وليمپيادالىق رەزەرۆتەگى سپورت مەكتەبىن، مۋزىكا مەكتەبىن، باسقا دا بىرقاتار ماڭىزدى نىسانداردى ارالاپ كوردى. تۇڭعىش پرەزيدەنت ساياباعىن اباتتاندىرۋ، كيەلى شاھاردىڭ ورتالىق بولىگىن رەكونسترۋكتسيالاۋ جۇمىستارىمەن جانە ارحەولوگيالىق پاركتىڭ جوباسىمەن تانىستى.