ىستالعان تاعامدار ازىرلەۋ
سەنبى, 27 ءساۋىر 2013 1:39
ەت, بالىق, جەمىس-جيدەكتەن ىستالعان تاعامنىڭ ادام تابەتىن شاقىرار جاعىمدى ءدامى بولادى. ادەتتە, تاعامدى تۇتىنمەن ىستاۋ بارىسىندا ونىڭ قۇرامىنداعى ارتىق سۋمەن بىرگە باكتەريالىق زاتتار دا مەيلىنشە ازايىپ, وسىنىڭ اسەرىنەن ول ەندى ءتۇرلى وزگەرىستەرگە بەرىلمەيتىن بەرىكتىك تانىتىپ, نەعۇرلىم ۇزاق ساقتالىناتىن بولادى.
سەنبى, 27 ءساۋىر 2013 1:39
ەت, بالىق, جەمىس-جيدەكتەن ىستالعان تاعامنىڭ ادام تابەتىن شاقىرار جاعىمدى ءدامى بولادى. ادەتتە, تاعامدى تۇتىنمەن ىستاۋ بارىسىندا ونىڭ قۇرامىنداعى ارتىق سۋمەن بىرگە باكتەريالىق زاتتار دا مەيلىنشە ازايىپ, وسىنىڭ اسەرىنەن ول ەندى ءتۇرلى وزگەرىستەرگە بەرىلمەيتىن بەرىكتىك تانىتىپ, نەعۇرلىم ۇزاق ساقتالىناتىن بولادى.
تاعام ىستاۋعا ارناۋلى ورىن-جاي قاجەت ەمەس. ەت تاعامدارىن ىستاۋ جۇمىسىن ءۇي اۋلاسىندا نەمەسە قالاداعى ساياجاي ماڭىندا اتقارا الاسىز. جۇمىس ىستەۋگە قولايلى جەر بولسا, سونىڭ ءوزى جەتىپ جاتىر.
تاعامدى ىستاۋ ءۇشىن قاجەتتى قۇرال-جابدىقتى جاساپ الۋ كوپ قيىندىققا تۇسپەيدى. مۇنداي قۇرال جاساۋدىڭ بىرنەشە نۇسقاسى بار.
تاعامدى ىستاۋ تەحنولوگياسى. تاعامدى ىستاۋدىڭ نەگىزگى ەكى جولى بار. ولار – سۋىتىپ ىستاۋ جانە ىسىتىپ ىستاۋ دەپ اتالادى. ىسىتىپ ىستاۋ (43-45 گرادۋستا) ءتاسىلىن كوپ جاعدايدا مايسىز نەمەسە مايى از تاعامدارعا قولدانادى. ال مايلى تاعامدارعا سۋىتىپ (19-25 گرادۋستا) ىستاۋ ءتاسىلى تيىمدىرەك.
ىستاۋدىڭ ساپاسى اعاشتى جاققان كەزدە پايدا بولاتىن ءتۇتىن ەرەكشەلىگىنە بايلانىستى بولماق. ماسەلەن, اعاشتىڭ نەعۇرلىم قاتتى تۇرلەرىن جاعۋ ناتيجەسىندە پايدا بولعان ءتۇتىن ەڭ پايدالى دەپ ەسەپتەلەدى. ارينە, سۋلى اعاش قۇرعاق اعاشقا قاراعاندا ءتۇتىندى كوبىرەك بولەدى. بىراق مۇنداي اعاش تاعام ىستاۋ ءۇشىن جارامسىز دەپ ەسەپتەلەدى. تاعامدى ىستاۋ ءۇشىن شامشات, ەمەن, قانداعاش, كارى الما اعاشتارىنىڭ بۇتاقتارىن پايدالانعان ءجون. ال قايىڭدى پايدالانۋعا بولمايدى. ءتىپتى, پايدالانعان جاعدايدىڭ وزىندە, ەڭ الدىمەن, ونىڭ قابىعىن سىدىرىپ, دۇرىستاپ كەپتىرىپ الۋ كەرەك.
تاعامدى ىستاۋ كەزىندە وعان الما مەن ورىك جاپىراقتارى ارالاستىرىلعان ارشا بۇتاقتارىن پايدالانعان دا ورىندى. ويتكەنى, ولاردان بولىنەتىن ءتۇتىن ىستالعان تاعامعا ەرەكشە جاعىمدى ءدام مەن ءيىس بەرەدى.
ەگەر ءسىز اعاشتى اۋامەن جەلدەتە وتىرىپ, جارتىلاي عانا جاعاتىن بولساڭىز, ونىڭ بويىنان جەڭىل دە اشىق ءتۇتىننىڭ ءبولىنىپ شىعىپ جاتقاندىعىن بايقايسىز. بۇل ءتۇتىننىڭ ەرەكشە قاسيەتى بار. قىسقاسىن ايتقاندا, اعاشتى جاعۋ ۇدەرىسىنىڭ وزىنە ەرەكشە ءمان بەرۋ كەرەك. ونىڭ جالىنداپ جانعاننان گورى جەڭىل بىقسي تۇتىندەگەنى دۇرىس. وسى ءۇشىن پەشكە ۇساقتاپ كەسىلگەن وتىندى قالاعاننان كەيىن ونىڭ بەتىن اعاش ۇگىندىلەرىمەن كومكەرۋ كەرەك. ىستالۋ ۇستىندەگى تاعام ءتۇتىن اراسىنان ايقىنىراق كورىنىپ جاتقان جاعدايدا ونداعى ءتۇتىننىڭ شوعىرلانۋى دۇرىس جاعدايدا دەپ ەسەپتەلىنەدى.
ادەتتە تاعامدى ىستاۋ ءۇشىن قاجەتتى اعاشتى ۇساق جاڭقا, ۇگىندى, مۇك, شوكىم تۇرىندە پايدالانعان ورىندى. ونىڭ ۇستىنە ولاردىڭ بىردەن جەڭىل جانىپ كەتپەي, بىقسي جانعان قالىپتا مولىنان ءتۇتىن بەرىپ جاتۋىنا نازار اۋدارۋ كەرەك. ەگەر اۋا رايى ب ۇلىڭعىر, دىمقىل بولعان جاعدايدا جانۋ ۇستىندەگى اعاشقا ازداعان جالىن بەرۋگە دە بولادى.
ىستالۋ ۇستىندەگى تاعامنىڭ بويىنداعى باكتەريانىڭ ءبولىنۋى, ءتۇتىننىڭ تاعامعا سىڭىمدىلىگى كوپ جاعدايدا اۋانىڭ ىلعالدىلىعى مەن جانىپ جاتقان وتتىڭ تەمپەراتۋراسىنا بايلانىستى بولىپ كەلەدى. تەمپەراتۋرا جوعارىلاپ, ىلعالدىلىق ازايعان سايىن ءتۇتىن ىستالۋ ۇستىندەگى تاعامعا نەعۇرلىم ءسىڭىمدى كەلەدى دە, تاعام دا سوعان سايكەس بويىنداعى ىلعالدان جەدەل ارىلا باستايدى. ادەتتە ىستالۋ ۇستىندەگى تاعامنىڭ ءتۇرىنىڭ وزگەرىسكە ءتۇسىپ, قىزارا ءتۇسۋى كوپ جاعدايدا ونىڭ تەرىسىندەگى شايىرلى زاتتارعا بايلانىستى بولادى. مۇنداي جاعدايدا ءونىمنىڭ ءتۇسىن ءوزىڭىز قالاعانداي رەتكە كەلتىرۋ ءۇشىن قانداي اعاش تۇرلەرىن پايدالانا ءبىلۋ قاجەتتىگىن الدىن الا ءبىلۋىڭىزدىڭ ماڭىزى زور. ماسەلەن, قىزىل اعاشتى ىستاۋعا پايدالانعان جاعدايدا ول ونىمگە ادەمى جالقىن قىزىل ءتۇس بەرسە, ەمەن مەن قانداعاش قوڭىر سارىدان باستاپ, قويۋ قوڭىر ءتۇس بەرەدى. ال شامشات, جوكە, ۇيەڭكى اعاشتارى التىن سارى تۇسكە بولەيدى.
تاعامدى ىستاپ بولعاننان كەيىن دايىن بولعان ءونىمدى تەز سۋىتىپ, كەپتىرۋگە قويادى. كەپتىرۋ ءۇشىن ونى 10-12 گرادۋستىق تەمپەراتۋرادا 5-10 تاۋلىك بويى ءىلىپ قويۋ كەرەك. مىنە, وسىنداي جاعدايدا ىستالعان ءونىمنىڭ ىلعالدىلىعى تومەندەپ, ونىڭ بويىنداعى تۇز ءدامى اشىلا تۇسەتىن بولادى. كەپتىرۋ ۇدەرىسىنىڭ سوڭىنا تامان ءونىمنىڭ ىستالۋ دەڭگەيى كۇشەيىپ, وسىنىڭ ناتيجەسىندە ول نەعۇرلىم ۇزاعىراق ساقتاۋ مۇمكىندىگىنە يە بولادى.
ءونىمدى ىستاۋعا جۇمسالاتىن ۋاقىت كوپ جاعدايدا ونىڭ كولەمى مەن تۇرىنە بايلانىستى. شامامەن العاندا, بۇعان 12-24 ساعات ۋاقىت جۇمسالادى. ماسەلەن, ەگەر بالىق, قۇس نەمەسە شوشقا مايىن ىستايتىن بولساڭىز, وعان 12 ساعاتقا جۋىق ۋاقىت قاجەت. ال ەگەر تۇتاس قويدى نەمەسە باسقاداي مالدى ىستايتىن بولساڭىز وعان 1 تاۋلىكتىڭ ءوزى جەتپەيدى. سوندىقتان, ۋاقىتتى ۇنەمدى پايدالانۋ جانە جۇمىستى ساپالى جۇرگىزۋ ءۇشىن ەتتى 2-4 كيلو مولشەرىندە بولشەكتەپ كەسىپ العان دۇرىس. ءونىمدى كەسۋدىڭ دە وزىندىك ءمانى بار. ىستالاتىن ءونىم نەعۇرلىم ادەمى تۇرگە ەنۋ ءۇشىن شيكى ەتتى ونىڭ بويىنان كورىنىپ تۇراتىن تامىرلى جىكتەرى بويىنشا سوگىپ العان ورىندى بولادى. ماسەلەن, قىزىل ءتۇستى ەتتىڭ بويىنان ونىڭ اقشىل جىپكە ۇقساعان جىكتەرمەن بولىنگەن ءمارمار قالىبى انىق بايقالىپ تۇرادى. ىستالاتىن ءونىمدى, مىنە, وسى جىگىمەن اجىراتقان جاعدايدا ونىڭ ىستالعاننان كەيىنگى ءپىشىنى مەن ءتۇرى ادەمى كورىنىس بەرەدى.
ءونىمدى وتكىزۋ تاسىلدەرى. دايىن بولعان ءونىمدى وتكىزۋدىڭ ەڭ قولايلى جولى ءوزىڭىزدىڭ ەلدى مەكەنىڭىزدە نەمەسە وعان جاقىن جەرلەردە ورنالاسقان قوعامدىق تاماقتاندىرۋ ورىندارى – كافەلەر مەن بارلار, سىراحانالار بولىپ تابىلادى. سولارعا بارىپ, يەلەرىمەن كەلىسسوز جۇرگىزىپ بايقاڭىز. الداعى ۋاقىتتا جولىڭىز بولۋى ءۇشىن باستاپقى كەزدە نەعۇرلىم تومەنىرەك باعا ۇسىنىڭىز. ەگەر ءونىمىڭىز مۇنان كەيىنگى كەزەكتە سۇرانىسقا يە بولىپ جاتسا, وندا ءسىزدىڭ جاڭا كاسىبىڭىزگە جاقسى جول اشىلادى.
ساۋدا دۇكەندەرىنەن پوليەتيلەن پلەنكانى ساتىپ الىپ, دايىن بولعان ءونىمىڭىزدى 100 گرامنان 1 كيلوعا دەيىنگى ارالىقتا ادەمىلەپ كەسىڭىز. سونان كەيىن ونى پوليەتيلەن پلەنكامەن ادەمىلەپ وراڭىز. مۇنداي جاعدايدا ءبىرىنشى كەزەكتە ىستالعان ءونىمنىڭ ادەمى ءتۇسىنىڭ كورىنىپ تۇرۋىنا زەر سالۋ كەرەك. مۇنان كەيىن ءاربىر كەسىلگەن تاعامدى ولشەپ, سالماعىن كومپيۋتەرگە جازىپ, پرينتەردەن شىعارىڭىز دا, پلەنكا سىرتىنا جاپسىرىڭىز. ءونىمدى وتكىزۋ ىسىندە مۇنىڭ ءوزى دە اجەپتاۋىر ءرول وينايتىن بولادى.
جۇمسالاتىن شىعىن. 1 كيلو جىلقى ەتى بازارلاردا 1500-2000 تەڭگەنىڭ ارالىعىندا. ال, ەگەر ءسىز تۇتاس جىلقى ەتىن ساتىپ الساڭىز, ول سىزگە نەعۇرلىم ارزانىراق تۇسەتىندىگى تاعى بەلگىلى. ماسەلەن, ونىڭ ءار كيلوسىنىڭ باعاسى سىزگە 1000 تەڭگەدەن اينالۋى مۇمكىن. سوندا ءسىز سالماعى 100 كيلوداي بولاتىن تاي ساتىپ الساڭىز, ول سىزگە ەڭ ءارى كەتكەندە 100 مىڭ تەڭگەگە تۇسەدى.
كىرەتىن كىرىس پەن پايدا. 1 كيلو ىستالعان جىلقى ەتىنىڭ قازىرگى باعاسى 2300-3000 تەڭگە ارالىعىندا. سوندا ءسىز جاڭاعى تايدىڭ ىستالعان ەتىن كەمىندە 230-300 مىڭ تەڭگەگە وتكىزىپ, وسى ىستەن 130 000-200 000 تەڭگە ارالىعىندا پايدا كورەتىن بولاسىز. ياعني, سىزگە تۇسەتىن پايدا وعان جۇمسالاتىن شىعىننان كەمىندە ەكى ەسەدەي اسىپ ءتۇسىپ, ءسىزدىڭ ەڭبەگىڭىزدى ەسەلەپ اقتايتىن بولادى.
ەگەر ءوزىڭىزدىڭ مالىڭىز بولسا, ءسىز بۇل ىستەن ەداۋىر پايدا كورە الاسىز.
پايدالى كەڭەستەردى مىنا سايتتاردان الۋىڭىزعا بولادى:
http://www.hombiz.ru
http://www.uspeh4u.com/view_ideasbiz.php?id=25
http://www.smokery.narod.ru
ازىرلەگەن
سۇڭعات ءالىپباي,
«ەگەمەن قازاقستان».
