جايباسارلىققا جول جوق
جۇما, 19 ءساۋىر 2013 0:45
اۋا رايىنا تاۋەلدىلىكتەن قۇتىلۋ جاۋاپتى ناۋقاندى ساپالى وتكىزۋمەن تىعىز ساباقتاس ەكەنىن اركىم ءتۇسىنۋى ءتيىس
سولتۇستىكقازاقستاندىق ديقاندار بىلتىرعى جىلدىڭ قۇرعاقشىلىعىن ۇمىتا قويعان جوق. سوعان قاراماستان, قالىپتاسقان باي تاجىريبەنىڭ, ىلعال ساقتاۋ تەحنولوگيالارىن ءتيىمدى قولدانۋدىڭ ارقاسىندا وتان قامباسىنا 5 ميلليون توننا ەل ريزىعىن قۇيعان-دى.
جۇما, 19 ءساۋىر 2013 0:45
اۋا رايىنا تاۋەلدىلىكتەن قۇتىلۋ جاۋاپتى ناۋقاندى ساپالى وتكىزۋمەن تىعىز ساباقتاس ەكەنىن اركىم ءتۇسىنۋى ءتيىس
سولتۇستىكقازاقستاندىق ديقاندار بىلتىرعى جىلدىڭ قۇرعاقشىلىعىن ۇمىتا قويعان جوق. سوعان قاراماستان, قالىپتاسقان باي تاجىريبەنىڭ, ىلعال ساقتاۋ تەحنولوگيالارىن ءتيىمدى قولدانۋدىڭ ارقاسىندا وتان قامباسىنا 5 ميلليون توننا ەل ريزىعىن قۇيعان-دى. ولار مول ءونىم نەگىزى ەرتە كوكتەمنەن قالاناتىنىن جاقسى بىلەدى. بيىل دا مولشىلىقتان ءۇمىتتى. كۇزگى-قىسقى كەزەڭدەردە توپىراق قاباتىنا ىلعال نورماداعىدان ەكى ەسەگە جۋىق كوپ ءتۇزىلدى. «ءساۋىر بولماي ءتاۋىر بولماس» دەگەن ءسوز تەرىسكەي ءوڭىرلەرگە قاراتا ايتىلعانداي. كۇننىڭ نۇرى «سامارقاننىڭ كوك تاسىن» جىبىتەتىندەي بار شۋاعىمەن توگىلىپ ەدى, جەر-انا بۋسانىپ سالا بەردى. ءبىر جاعىنان, اۋا تەمپەراتۋراسىنىڭ بىردەن كوتەرىلۋى قالىڭ قاردى كۇرت ەرىتىپ, ىلعال قورىنىڭ جەتكىلىكتى جينالماۋىنا كەرى اسەر ەتە مە دەگەن الاڭداۋشىلىق تا جوق ەمەس. سول سەبەپتى وبلىستا كوكتەمگى ەگىس ناۋقانىن ساپالى وتكىزۋگە باعىتتالعان دايىندىق شارالارى كۇن وتكەن سايىن قارقىن الىپ كەلەدى.
ايماق باسشىسى سامات ەسكەندىروۆتىڭ توراعالىعىمەن وتكەن كەڭەستە عىلىمي نەگىزدەلگەن اگروتەحنيكالىق تەحنولوگيالار مەن وزىق ادىستەردى قولدانۋ ماسەلەلەرى جان-جاقتى تالقىلاندى. جاۋاپتى ناۋقاندى جوعارى دەڭگەيدە ۇيىمداستىرۋدا نولدىك تەحنولوگيانىڭ ماڭىزى اتاپ كورسەتىلىپ, ناقتى تاپسىرمالار جۇكتەلدى. اگرارلىق سالا عالىمدارى ىلعال جابۋدىڭ جانە داقىلداردى سەبۋدىڭ عىلىمي نەگىزدەلگەن قولايلى مەرزىمىن ۇسىنىپ, ادىستەمەلىك كىتاپشالار تاراتتى. بيىل 4 ميلليون 338 مىڭ گەكتار جەرگە تۇقىم سىڭىرىلەدى دەپ ۇيعارىلىپ وتىر. اۋىل شارۋاشىلىعىنىڭ ەگىستىك القاپتارىن ءارتاراپتاندىرۋ, مونوداقىلدى شارۋاشىلىق جۇرگىزۋ ادىسىنەن باس تارتۋ جونىندەگى ەلباسى تاپسىرماسىنا سايكەس باستى داقىل – بيدايدىڭ كولەمى ازايتىلىپ, كەرىسىنشە مايلى داقىلدار – 367 مىڭ, جەمازىق داقىلدار – 318 مىڭ گەكتارعا جەتكىزىلدى. كارتوپ 27,5 مىڭ, كوكونىس 5,1 مىڭ گەكتار القاپقا ورنالاستىرىلادى.
بيىل «قازاگرو» اق-قا قاراستى قارجى ينستيتۋتتارى 9 باعدارلاما شەڭبەرىندە 7,7 ميلليارد تەڭگەنىڭ نەسيەلەۋ, سۋبسيديالاۋ كومەكتەرىن ۇسىنسا, 5 ميللياردى ەگىنشىلىككە تيەسىلى. 2011 جىلى ەگىس القاپتارى 19 مىڭ توننا مينەرالدى تىڭايتقىشپەن بايىتىلسا, ءۇستىمىزدەگى جىلى 47 مىڭ توننانى قۇرايدى. الايدا, بۇل كورسەتكىش قاجەتتىلىكتىڭ تورتتەن ءبىرىن عانا وتەيتىنىن ەسكەرسەك, الدا قىرۋار جۇمىستار كۇتىپ تۇرعانىن اڭعارۋعا بولادى. قاجەتتى 546 مىڭ توننا تۇقىم سەبۋ بابىنا جەتكىزىلىپ, ءوڭدەۋ, دارىلەۋ جۇمىستارى قىزۋ قارقىن العان شاق. سورت اۋىستىرۋ, اۋدانداستىرۋ جانە جاڭعىرتۋ ءىسىن ودان ءارى جالعاستىرۋ ماقساتىمەن 20 مىڭ توننا ەليتالى تۇقىم ازىرلەندى. كوكتەمگى ەگىسكە 14,5 مىڭ ءارتۇرلى ماركالى تراكتورلار, 5500 سەبۋ اگرەگاتتارى, 1000-نان استام جوعارى ءونىمدى ەگىس كەشەندەرى جۇمىلدىرىلماق. ولاردىڭ 94 پايىزى دايىندىق ساپىندا. جىل باسىنان بەرى 1,4 ميلليارد تەڭگەنىڭ 169 تەحنيكا بىرلىگى ساتىپ الىندى.
اۋىل شارۋاشىلىعى مينيسترلىگىنىڭ جانار-جاعارمايدىڭ ءليترى 95 تەڭگەمەن بوساتىلاتىنىن, بۇل ءبولشەك ساۋداداعى باعادان 8 پايىزعا ارزان ەكەنىن مالىمدەۋى اگرارلىق سالاعا دەگەن مەملەكەتتىك قامقورلىقتىڭ كۇشەيتىلگەنىن اڭعارتسا كەرەك. دەمەك, قولايلى ءمۇمكىندىكتەردى قالت جىبەرمەي جانار-جاعارماي ماتەريالدارىمەن, ديزەل وتىنىمەن ءبىرىنشى كەزەكتە قامتاماسىز ەتۋدىڭ ماڭىزى وتە زور. 70 مىڭ توننا ديزەل وتىنى, 11 مىڭ توننا بەنزين, 3,2 مىڭ توننا موتور مايى قاجەت دەلىنسە, اۋىلشارۋاشىلىق قۇرىلىمدارى 50 پايىزدايىمەن قامتاماسىز ەتىلگەن. جەتكىزۋشى وپەراتورلار 22 مىڭ توننا ديزەل وتىنىنا كەلىسىم جاساستى. الايدا, كەي تاۋار وندىرۋشىلەر شارتقا وتىرۋعا, الدىن الا تولەم جاساۋعا اسىعار ەمەس.
جاۋاپتى ناۋقانعا كىرىسەتىن ۋاقىت تاياپ قالدى. ولاي بولسا, جايباسارلىققا جول جوق دەگىمىز كەلەدى.
ومىر ەسقالي,
«ەگەمەن قازاقستان».
سولتۇستىك قازاقستان وبلىسى.
