بيزنەسى مىقتى ەل قۋاتتى
جۇما, 12 ءساۋىر 2013 2:50
ۇلتتىق ينۆەستورلار كەڭەسىنىڭ ءتۇيىنى, مىنە, وسىنداي
بەلسەندى جۇمىس ىستەي ءبىلۋ كەرەك
ەلباسىنىڭ كاسىپكەرلەرمەن كەزدەسۋى ءبىز ءۇشىن اركەز ەلەۋلى وقيعا. ەل پرەزيدەنتىنىڭ وتاندىق كاسىپكەرلىكتى قولداۋ ساياساتى بارىمىزگە ءمالىم. مەملەكەت تاراپىنان شاعىن جانە ورتا كاسىپكەرلىكتى دامىتۋ ماقساتىندا اۋقىمدى شارالار اتقارىلىپ جاتىر. مەن بۇل جايىندا كەزدەسۋدە سويلەگەن سوزىمدە دە ايتىپ ءوتتىم.
جۇما, 12 ءساۋىر 2013 2:50
ۇلتتىق ينۆەستورلار كەڭەسىنىڭ ءتۇيىنى, مىنە, وسىنداي
بەلسەندى جۇمىس ىستەي ءبىلۋ كەرەك
ەلباسىنىڭ كاسىپكەرلەرمەن كەزدەسۋى ءبىز ءۇشىن اركەز ەلەۋلى وقيعا. ەل پرەزيدەنتىنىڭ وتاندىق كاسىپكەرلىكتى قولداۋ ساياساتى بارىمىزگە ءمالىم. مەملەكەت تاراپىنان شاعىن جانە ورتا كاسىپكەرلىكتى دامىتۋ ماقساتىندا اۋقىمدى شارالار اتقارىلىپ جاتىر. مەن بۇل جايىندا كەزدەسۋدە سويلەگەن سوزىمدە دە ايتىپ ءوتتىم.
كەزدەسۋدە كوپ ماسەلە ايتىلدى. ناقتى-ناقتى تاپسىرمالار بەرىلدى. مەنىڭشە, جەرگىلىكتى جەرلەردەن, وبلىستاردان كەلگەن كاسىپكەرلەردىڭ ءبارى كەزدەسۋدەن ۇلكەن رۋح, جىگەر الدى دەپ ويلايمىن. ەلباسى كاسىپكەرلەرگە جۇكتەلگەن مىندەتتەردى تاعى دا ناقتىلاپ ايتتى. ال كاسىپكەرلىكتى دامىتۋ باعىتىندا كۇتىپ تۇرعان كەشەندى جۇمىستاردى پىسىقتاپ, بىزدەرگە ناقتى-ناقتى تاپسىرمالار جۇكتەدى. «اتامەكەن» وداعى» ۇلتتىق ەكونوميكالىق پالاتاسىنا ۇكىمەتپەن بىرلەسە وتىرىپ «ىسكەرلىك احۋالدىڭ» جاڭا رەيتينگىن جاساۋدى تاپسىردى. وسى ارقىلى ورتالىق جانە جەرگىلىكتى اتقارۋشى ورگانداردىڭ جۇمىستارىن باعالاپ, ولاردىڭ ناتيجەسىن باق-تاردا جاريالاۋ قاجەتتىگىن ايتتى. سونىمەن قوسا, مەملەكەت باسشىسى ءۇستىمىزدەگى جىلدىڭ سوڭىنا دەيىن «ەلەكتروندى ساۋدا تۋرالى» زاڭ جوباسىن, سونداي-اق 5 جىلدىق مەرزىمگە ارنالعان قازاقستانداعى ينتەرنەت-ساۋدانى دامىتۋدىڭ سالالىق پەرسپەكتيۆالىق جوسپارىن ازىرلەۋدى تاپسىردى. ءبىز بۇگىندە بۇل باعىتتاردا جۇمىس ىستەپ جاتىرمىز. ەندى ناقتى بەلگىلەنگەن ۋاقىتتارعا ءتيىستى جوسپارلاردى دايىندايمىز.
ەلباسى, اسىرەسە, جەرگىلىكتى جەردە, اۋىلدىق جەرلەردە كاسىپكەرلىكتى بارىنشا دامىتۋ جايىن ايتتى. اۋىلدى كوتەرۋ, اۋىل كاسىپكەرلەرىن قولداۋ, جاس كاسىپكەرلەرگە كومەك, اۋىل ازاماتتارىنا جاعداي جاساۋ سىندى وزەكتى ماسەلەلەر قارالدى. الەۋمەتتىك سالانى دامىتۋ, كلۋبتار اشۋ, الەۋمەتتىك سالا ارقىلى كاسىبي ماماندار دايارلاۋ, جاستاردى وقىتۋ جونىندە وتە ماڭىزدى تاپسىرمالار بەرىلدى. ءبىز كەزدەسۋدەن سونداي ءبىر سەرپىلىسپەن, جاقسى اسەرمەن شىقتىق. ءبىزدى ەندى الدا اۋقىمدى جۇمىستار كۇتىپ تۇر. بەلسەندى جۇمىس جاساۋىمىز قاجەت.
ابىلاي مىرزاحمەتوۆ,
«اتامەكەن» وداعى» ۇلتتىق ەكونوميكالىق
پالاتاسىنىڭ توراعاسى.
____________________
جاڭاشا جىگەر الدىق
مەنىڭ ءبىراز ءومىرىم ەلىمىزدىڭ ماشينا جاساۋ سالاسىنا قاتىستى ءوتتى. وسى سالا بويىنشا كاسىپكەرلىك قۇرىلىمعا جەتەكشىلىك جاساعان كەزدە ونىڭ ىستىعىنا كۇيىپ, سۋىعىنا توڭدىق. قىسقاسىن ايتقاندا, بۇل سالانىڭ جەتىستىكتەرىمەن دە, پروبلەمالارىمەن دە جاقسى تانىسپىن. وسىعان بايلانىستى تالاي-تالاي باسقوسۋلاردا ءوز وي-پىكىرىمدى ۇنەمى ايتىپ تا ءجۇرمىن.
سوڭعى كەزدەردەگى ۇلكەن ءبىر قۋانىشتى جاعداي, بۇل سالا جاقسى دامۋ قارقىندىلىعىن كورسەتىپ كەلەدى. سوڭعى ءۇش جىلدىڭ وزىندە عانا ونىڭ جالپى كولەمى ءۇش ەسە ءوسىپ وتىر. سونىمەن قاتار, بۇل سالانىڭ ءبىزدىڭ ەلىمىزدە بۇرىن بولماعان جاڭا باعىتتارى پايدا بولىپ, دامۋ ۇستىندە. ماسەلەن, تەمىر جول ماشينالارىن شىعارۋ, اۆتوبۋستار شىعارۋ, جەڭىل كولىكتەردىڭ سانداعان تۇرلەرىن قۇراستىرۋدى يگەرۋ ىستەرىن الايىق. وسىلاردىڭ بارلىعى ءبىزدىڭ قازاقستان ءۇشىن مۇلدەم تىڭ دا جاڭا باعىتتار بولىپ ەسەپتەلەدى. ەندى اۋىر ماشينا جاساۋ سالاسىن دامىتۋدىڭ ءوزى كۇن تارتىبىنە قويىلىپ وتىر.
ەلباسىنىڭ قاتىسۋىمەن جانە تىكەلەي جەتەكشىلىگىمەن وتكەن قازاقستان رەسپۋبليكاسى پرەزيدەنتى جانىنداعى كاسىپكەرلەر كەڭەسىنىڭ وتىرىسىندا ءسوز الىپ, اتالعان سالانىڭ تىڭ تابىستارى تۋرالى ءسوز قوزعادىم. ءسوز اراسىندا ەلباسىنىڭ ءوزى كەلتىرگەن پىكىرلەرىنە قولداۋ ءبىلدىرىپ, ماشينا جاساۋ سالاسىن ەلىمىزدەگى جاڭا يندۋستريالاندىرۋدىڭ № 1 ءماسەلەسى دەپ اتاعاندىعى مەنى ۇلكەن قۋانىشقا بولەدى. ەلباسى بۇل سالانىڭ كەلەشەگى, وعان مەملەكەت تاراپىنان كورسەتىلەتىن قولداۋ مەن قامقورلىقتار تۋرالى ايتىپ ءوتتى. وسىدان اتالعان سالانىڭ ماماندارىنىڭ بارلىعى جاقسى اسەر الدى دەپ ويلايمىن. ەندى ولار وزدەرىنىڭ جاساپ جاتقان جۇمىستارىنا تىڭ كۇشپەن كىرىسەتىندىگى انىق.
قازاقستاندا بۇل سالا كەدەن وداعى اياسىندا دا جاقسى قارقىنمەن دامىپ كەلە جاتقاندىعىن ايتا كەتسەم ارتىق بولماس. كەدەن وداعىنىڭ جۇمىسشى ورگانى – ەۋرازيالىق ەكونوميكالىق كوميسسيانىڭ وتكەن جىلعى قورىتىندىسى تۋرالى ەسەبىندە دە بۇل جايت اتاپ كورسەتىلگەن.
دەمەك, سالانىڭ بولاشاعى ۇلكەن. ەندى وعان مەملەكەت قولداۋى كۇشەيەر بولسا, قارقىندىلىعىمىز قازىرگىدەن دە ارتا تۇسەتىندىگىنە سەنىمدىمىن.
مەيرام پىشەمباەۆ,
پارلامەنت ءماجىلىسىنىڭ دەپۋتاتى,
«اتامەكەن» وداعى» ۇلتتىق ەكونوميكالىق
پالاتاسىنىڭ تورالقا مۇشەسى.
_______________________
پايدالى باسقوسۋ بولدى
قازاقستان رەسپۋبليكاسى پرەزيدەنتىنىڭ جانىنداعى قازاقستان كاسىپكەرلەرى كەڭەسىنىڭ وتىرىسى كاسىپكەرلىك قوزعالىستى دامىتۋ ماسەلەسىن جان-جاقتى تالقىلاۋمەن ەستە قالادى دەپ ەسەپتەيمىن.
ءبىز ەلباسىنىڭ الدىندا بيزنەس وكىلى رەتىندە ءوز ۇسىنىس, پىكىرلەرىمىزدى ايتتىق. سونىڭ ىشىندە, مەنىڭ قوزعاعان ءبىر ماسەلەم قازاقستان اۆتوونەركاسىبىن دامىتۋ جايىنا قاتىستى بولدى. سوڭعى جىلدارى بۇل سالا جاقسى قارقىنمەن دامىپ كەلەدى. دەگەنمەن, ول ءالى وتە جاس. اياعىنان ەندى عانا تۇرا باستادى دەۋگە بولادى. بۇل سالادا ۇيىمداستىرىلعان ءۇش كاسىپورىن بولسا, سونىڭ بارلىعى تاۋەلسىزدىك جىلدارىندا عانا پايدا بولدى. سوندىقتان, ءدال قازىرگى ساتتە ونەركاسىپتىڭ بۇل جاڭا ءتۇرى مەملەكەت قولداۋىنا وتە مۇقتاج.
قازىرگى كۇنى ءبىزدىڭ «Astana Grouر» كومپانياسى جەڭىل اۆتوكولىكتەر مەن اۆتوبۋس قۇراستىرۋدى قولعا الىپ وتىر. العاشقى ناتيجە جامان ەمەس. ءتىپتى ولاردى وزىمىزگە تاياۋ ورنالاسقان ەلدەرگە دە وتكىزە باستادىق. بىراق, بىزگە ءبىر كەدەن وداعىنىڭ اياسىنا بىرىككەن بەلارۋس پەن رەسەي ەلدەرى كاسىپكەرلەرى تاراپىنان باسەكەلەستىك قىسىم وتە كۇشتى بولىپ وتىر. ولاردا بۇل سالا بۇرىننان دامىعان. سوندىقتان مەن وتىرىس بارىسىندا قازاقستاندا شىعارىلعان اۆتوبۋستاردى مەملەكەت ارقىلى ليزينگكە تاپسىرۋدا وتاندىق كاسىپورىندارعا ارتىقشىلىقتار بەرىلسە دەگەن تىلەگىمدى جەتكىزدىم. ال, ءدال قازىرگى ساتتە كولىكتىڭ بۇل تۇرلەرىن مەملەكەت ارقىلى ليزينگكە تاپسىرۋدا قىتاي, رەسەي كاسىپكەرلەرىنە بىردەي جاعداي تۋعىزىلىپ وتىر. كەدەن وداعى اياسىنداعى, ونان كەيىن بولاتىن بۇكىلالەمدىك ساۋدا ۇيىمى اياسىنداعى كاسىپكەرلىك باسەكەگە توتەپ بەرۋىمىز ءۇشىن, اشىعىن ايتايىن, بىزگە ءدال قازىرگى ساتتە مەملەكەت ءلوببيى ابدەن قاجەت. بۇدان ەشبىر ۇيالۋعا بولمايدى.
وتىرىس بارىسىندا مەنىڭ جوعارىداعى ۇسىنىسىم ىقىلاسپەن تىڭدالدى. بۇل جونىندەگى ناقتى ءبىر شەشىمدى ۇكىمەت قابىلدايتىنى تۇسىنىكتى. ول تاراپتان قولداۋ بولادى دەپ ۇمىتتەنەمىن.
قالاي الىپ قاراعاندا دا, وتاندىق كاسىپكەرلەر كەڭەسىنىڭ بۇل جولعى وتىرىسى وتە پايدالى بولدى دەپ ەسەپتەيمىن. ەلباسىنىڭ ءوزى كاسىپكەرلىكتى قولداۋ كۇشەيە تۇسەتىندىگىن ايتتى. كەڭەستىڭ ءوزى بۇرىنعىدان جوعارىراق جاڭا مارتەبەگە يە بولاتىن بولدى. وسىنىڭ ءوزى ءبىزدى قاناتتاندىرىپ تاستادى.
نۇرلان سماعۇلوۆ,
«Astana Grouر» كومپانياسىنىڭ پرەزيدەنتى.
