تۇركىستان وبلىستىق ءماسليحاتتىڭ كەزەكتەن تىس قىرىق ءبىرىنشى سەسسياسىنىڭ جۇمىسىندا وسىنداي دەرەكتەردى كەلتىرگەن ءوڭىر باسشىسى ومىرزاق شوكەەۆ پرەزيدەنت باقىلاۋىندا تۇرعان تۇركىستان مەن ارىس قالاسىنداعى قۇرىلىس جۇمىستارىنىڭ قارقىنى باسەڭدەمەيتىنىن مالىمدەدى. «بيىل اكىمشىلىك-ىسكەرلىك ورتالىقتا 7 نىسان پايدالانۋعا بەرىلەدى دەپ جوسپارلانعان. ال رۋحاني-مادەني ورتالىعىندا 11 نىساننىڭ 4-ەۋى جىل سوڭىنا دەيىن تاپسىرىلادى», – دەگەن ءوڭىر باسشىسى ارىستى قالپىنا كەلتىرۋ ماسەلەسى دە باستى نازاردا ەكەنىن ايتتى. بۇگىندە ارىس قالاسىندا 5 646 تۇرعىن ءۇيدى قالپىنا كەلتىرۋ جۇمىستارى باستالىپ, ونىڭ 1100-دەن استامى قالپىنا كەلتىرىلگەن, 3 تۇرعىن ءۇيدىڭ قۇرىلىسى جاڭادان جۇرگىزىلىپ اياقتالدى. جىل باسىنان بەرگى اتقارىلعان جۇمىستار جونىندە بايانداعان وبلىس اكىمى 43 ەلدى مەكەن ورتالىقتاندىرىلعان اۋىز سۋ قۇبىرىمەن قامتاماسىز ەتىلگەنىن, اۋىل شارۋاشىلىعى سالاسىندا تامشىلاتىپ سۋارۋ, جىلىجاي شارۋاشىلىعىن قۇرۋ سياقتى تيىمدىلىگى زور تاجىريبەلەر ەنگىزىلىپ جاتقانىن اتاپ ءوتتى. «اۋىل - ەل بەسىگى» جوباسى بويىنشا 7 ەلدى مەكەننىڭ الەۋمەتتىك - ەكونوميكالىق جاعدايدىڭ جاقسارتۋ ماقساتىندا 89 جوباعا 4 ملرد. تەڭگە بولىنگەن. «كۇز ايلارىندا اۋدان ورتالىقتارى مەن باعدارلاماعا ەنگەن ەلدى مەكەندەر جاڭارىپ قايتا تۇلەۋى كەرەك», - دەدى وبلىس اكىمى.
تۇركىستان وبلىسى بيزنەستى دامىتۋ بويىنشا وڭىرلەردىڭ اراسىندا ەكىنشى ورىندا تۇر. ينۆەستيتسيا كولەمى 39 پايىزعا وسكەن. سونداي-اق, وبلىس دامۋىنداعى باسىم باعىتتاردىڭ ءبىرى تۋريزم بولىپ وتىر. ءتۋريزمنىڭ زياراتشىلىق, ارحەولوگيالىق, تابيعاتتى تاماشالاۋ, تاۋ شاڭعىسى سياقتى سالالارىن دامىتۋ جوسپاردا بار. وڭىردە بالا-باقشامەن قامتۋ كورسەتكىشى 96 پايىزعا جەتىپ وتىر. 1-شىلدەگە دەيىن الەۋمەتتىك جاعدايى تومەن 71 مىڭعا جۋىق وتباسىعا اتاۋلى الەۋمەتتىك كومەك تاعايىندالعان. وبلىس بيۋدجەتىنىڭ جالپى كولەمى 682,8 ميلليارد تەڭگە, التى ايدا بيۋدجەت قارجىسى 99 پايىزعا يگەرىلگەن. «ينۆەستيتسيا كولەمىن بيىل 20 پايىزعا ارتتىرۋىمىز قاجەت. سونداي-اق «قاراپايىم زاتتار ەكونوميكاسى» باعدارلاماسى اياسىندا, جيھاز, تاماق, توقىما سالالارى بويىنشا ىسكە اسىرىلاتىن جوبالاردى كوبەيتىپ, جاڭا جۇمىس ورىندارىن قۇرۋىمىز كەرەك. كاسىپكەرلەرگە جان-جاقتى قولداۋ كورسەتىپ, مەملەكەتتىك-جەكەمەنشىك ارىپتەستىكتى دامىتاتىن بولامىز», – دەدى وبلىس اكىمى. سونداي-اق وبلىس اكىمىنىڭ ايتۋىنشا, ءتيىستى مەكەمەلەرگە اۋىل شارۋاشىلىعى جەر تەلىمدەرىنە اۋديت جۇرگىزۋ جانە جەر كاداسترىنىڭ اقپاراتتىق جۇيەسىن تسيفرلاندىرۋ, بيۋدجەت قارجىسىن قاداعالاۋ, مەملەكەتتىك مەكەمە باسشىلارىنىڭ جاۋاپكەرشىلىگىن كۇشەيتۋ جۇكتەلگەن. ءاربىر تاپسىرمانىڭ ورىندالۋى بويىنشا قادامدىق جول كارتاسى ازىرلەنىپ, ورىندالۋ مەرزىمى, اتقارۋشى ورگاندار مەن ولاردىڭ جاۋاپتى ماماندارى بەكىتىلمەك.
تۇركىستان وبلىسى
