كونفەرەنتسيادا قازاقستان, قىرعىزستان, تاجىكستان, تۇركمەنستان, وزبەكستان جانە مونعوليادان كەلگەن باق تىلشىلەرى, ازاماتتىق قوعامنىڭ وكىلدەرى, مەديا سالاسىنداعى حالىقارالىق ساراپشىلار قازىرگى ۋاقىتتاعى عالامتورلىق تەحنولوگيالىق وزگەرىستەرگە – اقپاراتتاردى جەتكىزۋدىڭ تسيفرلىق جۇيەگە وتۋىنە بايلانىستى تۋىنداپ وتىرعان ماسەلەلەردى تالقىلادى. سونداي-اق كونفەرەنتسيا جۇمىسىنا قىرعىزستاننىڭ سىرتقى ىستەر, مادەنيەت, اقپارات جانە تۋريزم مينيسترلىكتەرىنىڭ وكىلدەرى قاتىستى.
نەگىزگى باياندامانى ەقىۇ-نىڭ باق ەركىندىگى ماسەلەلەرى بويىنشا وكىلى ارلەم دەزير جاسادى. «وتكەن جىلى نۇر-سۇلتان قالاسىندا بولعان كونفەرەنتسيادا ءبىز ورتالىق ازياداعى بۇقارالىق اقپارات قۇرالدارىنىڭ ەركىندىگىن تالقىلاعان ەدىك. سوڭعى مەزگىلدە بۇل باعىتتا جاعدايدىڭ جاقسارعانىن ءبىز بايقاپ وتىرمىز. دەگەنمەن, بۇقارالىق اقپارات قۇرالدارىن قورعاۋدىڭ قاجەتتىلىگى بار», - دەدى دەزير مىرزا. ول ءوزىنىڭ اقپاراتتىق سايتتاردىڭ قۇرساۋلانۋىنا جانە جۋرناليستتەردىڭ ەركىندىگىنىڭ شەكتەلۋىنە وراي بىرنەشە رەت ورتالىق ازيا ولكەلەرىندەگى مەملەكەتتىك ورگاندارعا قايرىلۋعا ءماجبۇر بولعانىن بەلگىلەپ ءوتتى. «ورتالىق ازيا مەملەكەتتەرى ەقىۇ-نىڭ مۇشەلەرى بولىپ سانالادى, سوندىقتان ولار جۋرناليستتەردىڭ ەركىندىگىن ساقتاۋعا مىندەتتى», - دەپ تۇجىرىمدادى ءسوزىن ەقىۇ-نىڭ وكىلى.
جيىندا تالقىلانىپ جاتقان ماسەلەلەرگە ءوز پىكىرىن بىلدىرگەن قىرعىزستاننىڭ مادەنيەت, اقپارات جانە تۋريزم ءمينيسترى ازامات جامانعۇلوۆ ولكەدە ءسوز ەركىندىگىنىڭ ەداۋىر جاقسى دەڭگەيدە ەكەنىن بەلگىلەپ, عالامتور جەلىسىندە جاعىمسىز ۇردىستەردىڭ جارالىپ جاتقانىن بەلگىلەپ ءوتتى. اتاپ ايتقاندا, ارقانداي فەيك (جالعان) مالىمەتتەردىڭ جاريالانۋى كەڭىرى ەتەك الدى. جۋرناليستتەردى ورىنسىز قارالايتىن تروللدار پايدا بولدى.
قىرعىزستاننىڭ سىرتقى ىستەر ءمينيسترىنىڭ ءبىرىنشى ورىنباسارى نۋران نيازاليەۆدىڭ ايتۋىندا, قىرعىزستان ءۇشىن دە, شەكتەس اۋماقتاعى ولكەلەر ءۇشىن دە جالعان جاڭالىقتار جانە عاداۋاتتار بۇگىنگى كۇندە عالامتورداعى كوكەيكەستى پروبلەمالار بولىپ وتىر.
جيىندا ورتالىق ازيانىڭ ءار تاراپىنان كەلگەن باق وكىلدەرى جانە ساراپشىلار ءوز ولكەلەرىندەگى اقپارات تاراتۋدىڭ جاي-كۇيىن بايانداپ, ونى جاقسارتۋدىڭ جولدارىن بويىنشا پىكىرلەرىن ورتاعا سالدى.
تاجىكستاندىق «ازيا پليۋس» پورتالىنىڭ ديرەكتورى زەبو تاجيباەۆا وز ولكەسىندە عالامتورلىق اقپارات بۇلاقتارىنا شەكتەۋ كۇشەيىپ جاتقانىن حابارلادى. «بۇل از بولعانداي, VPNدەر (ۆيرتۋال جەكە جەلىلەر) دە جابىلۋدا. تاجريبەلى قولدانۋشىلار ءارتۇرلى باعدارمالاردى كوشىرىپ الۋ ارقىلى اقپارات الۋعا ءماجبۇر بولۋدا»,- دەدى ول.
ەكىكۇندىك كونفەرەنتسيادا «باق-تاعى پليۋراليزمگە تسيفرلىق دامۋدىڭ اسەرى», «ونلاين-باق-تى رەتتەۋ جانە پىكىر ءبىلدىرۋ ەركىندىگىن قورعاۋ», «ورتالىق ازيادا پىكىر ءبىلدىرۋ ەركىندىگى سالاسىنداعى ۇردىستەر», «بوسقىندار ىستەرى - ريمدىك حارتيا جونىندە مالىمدەۋ», «اۋماقتاعى باق ەركىندىگى سالاسىنداعى جاعدايدى شولۋ» جانە باسقا تاقىرىپتار بويىنشا پىكىر الىسۋ ءوتتى.
نازاربەك بايجىگىتوۆ,
ارنايى «ەگەمەن قازاقستان» ءۇشىن.
قىرعىز رەسپۋبليكاسى, بىشكەك قالاسى
سۋرەتتەر اۆتوردىكى
