الايدا ءبىز وعان دەيىن الەۋمەتتىك جەلىلەردىڭ ادەبى تۋرالى ءسوز قوزعاي تۇرۋعا ءماجبۇرمىز. ادامنىڭ وزىنە عانا تيەسىلى قايعىسى مەن قۋانىشىن, جەتىستىگى مەن جەكە ءومىرىن كۇن سايىن, ءتىپتى ءسات سايىن كۇللى الەمگە جاريا ەتىپ, بىرەۋدىڭ قىزعانىشىن, ەندى بىرەۋلەردىڭ مۇڭى مەن قاسىرەتىن شاقىراتىن, بىتپەيتىن دە قويمايتىن جاريالانىمداردىڭ ءتۇبى قايدا بارىپ تىرەلەدى؟!
ارينە, بۇكىل الەۋمەتكە قاتىستى, پايىم-پاراساتىڭا قوزعاۋ سالاتىن جەتىستىكتەر بولادى. ياكي, قوعام ساباق الۋعا, تۇزەتىلۋگە ءتيىستى ايتپاسقا, جازباسا بولمايتىن كوزگە ۇرىپ تۇرعان كەمشىلىكتەر بار. ەشقانداي تسەنزۋرا مەن تىيىمدى تالاپ ەتپەيتىن جەلىلەردىڭ پايدالى تۇسى دا وسى جەردە.
بىراق, جاڭا تۋعان ءسابيدى جالبىراتىپ, قىرقىنان دا شىقپاعان پەرىشتە نارەستەنى كۇللى الەمنىڭ كوزىنە توسۋ ىقىلىم زامانداردان كەلە جاتقان ىرىم-داستۇرلەرىمىزدىڭ قايسىسىمەن قابىسادى؟!
ەشقانداي ءومىردىڭ يگىلىگى وزدىگىنەن كەلە سالمايدى. بىراق, ارمانداعان كەڭ ءۇيدىڭ ىرگەسىن كوتەرىپ, ونى مىڭداعان ازىرگە باسپاناسىز قينالىپ جۇرگەن جاندارعا سۇيىنشىلەۋ, بىرەۋلەر جەۋگە نان تاپپاي وتىرعاندا, «تابيعاتقا شىعىپ, كاۋاپ پىسىردىك», «قىمبات رەستوراندا تاماق ءىشىپ وتىرمىز» دەپ ماقتانعا سالۋ مۇسىلمانشىلىققا دا جاتپايدى.
ءبارىمىز دە پەندەمىز, ۇلدارىمىزدىڭ ۋنيۆەرسيتەتتى ۇزدىك بىتىرگەنى, قىزدارىمىزدىڭ قياعا قونىپ, اققۋداي سىلانىپ, ۇزاتىلىپ بارا جاتقانى قۋانتادى. دەگەنمەن, ءسوز بەن كوزدىڭ قاتەرى ۇلكەن ەكەنىن ءجيى قاپەردەن شىعارىپ الامىز.
العان كولىگىڭ, سىيلانعان ايفون – ونىڭ ءبارى دە ادامنىڭ جەكە مەنشىگى.
الەۋمەتتىك جەلى كەيدە قۋانىشىڭا ورتاقتاسادى, كوپ جاعدايدا كوپشىلىكتىڭ قىزعانىشى مەن اشۋ ىزاسىن تۋعىزادى. بۇعان مىسالدى الىستان ىزدەمەي-اق قويالىق. وسىدان 3-4 جىل بۇرىن فەيسبۋكتە وتىرعاندار ەلىمىزدىڭ تانىمال اقىن قىزىن الەۋمەتتىك جەلىدەن قۋىپ شىققان-دى. زامانداسىمىزدىڭ كۇن سايىن سوعىم ەتىن اسىپ, وتكەن جىلعى, الدىڭعى جىلى جەلىنىپ ۇلگەرمەگەن قازى-قارتا, جال-جاياسى, استا-توك داستارقانى كوپ ۇزاماي-اق الەۋمەتتىك جەلىدە وتىرعانداردىڭ «جىنىنا» تيە باستادى. ادامداردىڭ مۇنداي جايتتاردى قابىلداۋى ءارتۇرلى عوي. بۇل قىزعانىش پەن اشۋ-ىزا كوپ ۇزاماي ۇلكەن تالقىلاۋلارعا ۇشىراپ, اقىن قىزىمىز قايتىپ بۇل الەۋمەتتىك جەلىگە ورالعان جوق... ال شىن مانىندە ول اقىن ءسوزى زەردەلى, ءومىرى كۇردەلى تۇلعا بولاتىن.
دەمەك, قيىنشىلىقتارىڭدى ۇمىتىپ, قايعى-مۇڭىڭدى ىسىرىپ, ءومىرىڭنىڭ تەك قۋانىشتى كەزەڭدەرىن جارنامالاۋدى كوڭىل كۇيى ءارتۇرلى ۆيرتۋالدى الەم قابىلداي بەرمەيدى. ويتكەنى بۇل الەم ءتۇرلى-ءتۇرلى پيعىلداعى ادامداردىڭ بارلىعىنا ورتاق. تەك جىلانا بەرسەڭ, تەك شاعىمدانا بەرسەڭ ۇنايتىن, مىنا ءومىردىڭ تەك كولەڭكەلى جاعىن عانا كورە الاتىن ادامداردىڭ كوپشىلىگى وسىندا.
ال جاقسىلىق, قۋانىش ىزدەگەن ادام ساياحاتقا شىعادى, گۇل وتىرعىزادى, ارماندارىن جۇزەگە اسىرادى, قىسقاسى, قاراپايىم عانا ارەكەت ەتەدى. ناتيجەسىندە جەتىستىكتەر مەن جاقسى كۇندەرگە جەتەدى.
ال ەندى بۇل ماسەلەنىڭ ءبىر جاعى عانا. بىراق, جەكە ومىرىمىزدەگى قۋانىشتارىمىز بەن جەتىستىكتەرىمىز ءوزىن قورعاۋدى, سۇق كوزدەن ساقتاۋدى سۇرانىپ-اق تۇر. كەز كەلگەن تابىسقا قانداي بەينەتپەن جەتكەنىڭ وزىڭە عانا ءمالىم.
الەۋمەتتىك جەلىلەردە ءتىلى اششى, ايتىپ تاستاعىش, جازىپ تاستاعىشتار عانا ەمەس, سۇق كوزدىلەر, وزگەنىڭ قۋانىشىنا ورتاقتاسا المايتىن نەشە ءتۇرلى نيەت بار.
قانداي قۋانىش بولسا دا جالاۋلاتپاي, ىشتەي شۇكىرشىلىك ەتىپ, ىشتەي تاۋبە دەپ وتىراتىن ەلدىڭ ۇرپاعىمىز. وتباسىمىزداعى جەكە جەتىستىكتەرىمىزدى جاھانعا جاريا ەتپەك تۇگىلى, ءوز جاقىندارىمىز دا ىشتارلىق تانىتىپ قالاتىنىن اتا-بابالارىمىز: «اعايىن بار بولساڭ كورە المايدى, جوق بولساڭ بەرە المايدى» دەپ باياعىدا-اق ايتىپ كەتكەن.
ال ءتىل-كوزدىڭ بار ەكەنى قاسيەتتى قۇراندا دا ايتىلعان, عىلىم دا دالەلدەگەن.
قۇراننىڭ ءبىر اياتىندا: «ءاي, بالام! كورگەن ءتۇسىڭدى ءوز باۋىرلارىڭا ايتۋشى بولما! ولار ساعان ءبىر قۋلىق جاساپ جۇرمەسىن» («ءجۇسىپ» سۇرەسى) دەيدى. بۇل ءبىر پايعامباردىڭ ەكىنشى پايعامبارعا ايتىپ وتىرعان ساقتىعى.
ءدال وسى «ءجۇسىپ» سۇرەسىندە جاقىپ پايعامبار (ا.س.) ءوز ۇلدارىن مىسىرعا جىبەرىپ جاتقاندا, ولارعا ءبىر قاقپادان ەمەس, بىرنەشە قاقپاعا ءبولىنىپ كىرۋدى تاپسىراتىنى بار. ونىڭ دا استارىندا ءسوز بەن كوز جاتىر. ال ارداقتى مۇحاممەد پايعامبارىمىز (س.ع.س.): «مەنىڭ ۇمبەتىمنىڭ كوپشىلىگى تاعدىر مەن قازادان كەيىن, كوبىنەسە, كوز تيگەننەن قايتىس بولادى», – دەيدى.
اللانىڭ ەلشىسى (س.ع.س.) ءوز ءۇرىم-بۇتاعىن وسىلايشا قورعاپ, ۇلكەن بالەدەن, قاۋىپ-قاتەردەن ساقتاندىرادى.
مۇنان ارتىق نە ايتۋعا بولادى؟!
