ال بيىل وڭىردە پايدالانۋعا بەرىلەتىن تۇرعىن ۇيلەر اۋقىمى ەكى ەسە ارتىپ, 80 مىڭ شارشى مەترگە جەتەدى. اتاپ ايتقاندا, 42,1 مىڭ شارشى مەتر نەسيەلىك, 32 مىڭ شارشى مەتر جالگەرلىك, 5,2 مىڭ شارشى مەتر كوممۋنالدىق تۇرعىن ءۇي قۇرىلىسى اياقتالماق. ياعني, جىل سوڭىنا دەيىن 924 پاتەردە قونىس تويى تويلانباق. بۇل باعىتتاعى جۇمىستىڭ ناتيجەسى قازىردەن انىق بايقالۋدا.
ماسەلەن, كۇنى كەشە الماتى وبلىسىندا 330 وتباسى ءبىردەن قونىس تويىن تويلادى. تالدىقورعان قالاسىندا 230 پاتەرلىك 3 كوپقاباتتى جانە قاراتال اۋدانىندا كوپ بالالى وتباسىلار مەن الەۋمەتتىك باعدارلاما بويىنشا ءۇي كەزەگىندە تۇرعاندارعا ارنالىپ سالىنعان 100 پاتەرلىك, كوپقاباتتى 2 باسپانا پايدالانۋعا بەرىلدى.
تالدىقورعان قالاسىنىڭ 6-شاعىن اۋدانىنداعى 16 قاباتتان تۇراتىن 3 ءۇي «نۇرلى جەر» باعدارلاماسى بويىنشا سالىنىپ, تۇرعىن ءۇي قۇرىلىسى جيناعى ارقىلى ازاماتتارعا بۇيىردى. قولدانىسقا بەرىلگەن تۇرعىن ءۇي عيماراتىنىڭ جالپى اۋدانى 22 مىڭ شارشى مەتردى قۇرايدى. 230 پاتەردىڭ توقسان ەكىسى 1 بولمەلى, توقسان ەكىسى 2 بولمەلى جانە 46 پاتەرى 3 بولمەلى.
– بيىل وبلىس بويىنشا 800 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانۋدا. تەك «نۇرلى جەر» باعدارلاماسىنىڭ وزىنە عانا 27,9 ملرد تەڭگە ءبولىنگەن. بۇل قاراجاتقا 1279 پاتەردەن تۇراتىن 334 تۇرعىن ءۇي سالۋ كوزدەلگەن. ونىڭ ىشىندە كوپ بالالى وتباسىلاردى تۇرعىن ۇيمەن قامتۋ ەرەكشە نازاردا. 2025 جىلعا دەيىن وبلىسىمىزدىڭ 5 مىڭعا جۋىق از قامتىلعان وتباسىلارى باسپانامەن قامتىلماق, – دەيدى وبلىس اكىمى اماندىق باتالوۆ.
سونداي-اق قاراتال اۋدانىنىڭ ورتالىعى ۇشتوبە قالاسىنان دا 100 وتباسىنا باسپانا كىلتى تابىس ەتىلدى. قاراتال اۋدانىنىڭ ورتالىعىندا پايدالانۋعا بەرىلگەن 40 جانە 60 پاتەرلىك ەكى كوپقاباتتى تۇرعىن ءۇي كوپتەن بەرى جەكە باسپاناعا مۇقتاج بولىپ جۇرگەن كوپ بالالى جانە جالعىزباستى انالارعا, مۇمكىندىگى شەكتەۋلى جاندارعا, مۇگەدەك بالاسى بار نەمەسە مۇگەدەك بالا تاربيەلەپ وتىرعان جانۇيالارعا, زەينەتكەرلەرگە, اتا-انا قامقورلىعىنان ايىرىلعان بالالارعا, ۇوس ارداگەرلەرى جانە ۇوس مۇگەدەگىنە تەڭەستىرىلگەندەرگە, بيۋدجەتتىك سالا قىزمەتكەرلەرىنە بەرىلدى.
كوپ بالالى وتباسىلار مەن از قامتىلعان اۋلەتتەردى تۇرعىن ۇيمەن قامتۋ جايى اۋدانداردا دا جۇزەگە اسىپ جاتقانى قۋانتادى. ءسوزىمىزدىڭ دالەلى رەتىندە, جاقىندا كوكسۋ اۋدانىنداعى 13 كوپ بالالى وتباسىنىڭ باسپانالى بولعانىن ايتالىق. وڭىردەگى بالپىق بي, مۇقانشى, اينابۇلاق, ەڭبەكشى اۋىلدىق وكرۋگتەرىندە تۇراتىن اۋلەتتەردىڭ قۋانىشىن اۋدان اكىمى الماس ءادىل ءبولىستى. كوپ بالالى وتباسىلارعا بەرىلگەن تۇرعىن ءۇيلەر «نۇرلى جەر» مەملەكەتتىك باعدارلاماسى اياسىندا ساتىپ الىنعان ەكەن. وسى ماقساتقا رەسپۋبليكالىق بيۋدجەتتەن 123 ميلليون 750 مىڭ تەڭگە قاراجات ءبولىنىپتى.
– مەملەكەت تاراپىنان ءبولىنگەن قاراجاتقا 21 تۇرعىن ءۇي ساتىپ الۋ كوزدەلگەن ەدى. ونىڭ ون ءۇش ءۇيىن تاپسىردىق. ەندى تامىز ايىنىڭ سوڭىنا قاراي قالعان 8 ءپاتەردى ساتىپ الامىز. ودان بولەك, اۋداندا 50, 30 پاتەرلى ءۇيدىڭ قۇرىلىسى اياقتالىپ, قازان-قاراشا ايلارىندا تابىستالادى. ول ءۇيدەن دە 30-40 پاتەر كوپ بالالى وتباسىنا بەرىلمەك, – دەيدى كوكسۋ اۋدانىنىڭ اكىمى الماس ءادىل.
جالپى, الماتى وبلىسىندا 145 مىڭنان استام ادام تۇرعىن ءۇي كەزەگىندە تۇر. دەمەك, «نۇرلى جول», «نۇرلى جەر», «7-20-25» مەملەكەتتىك باعدارلامالارى جانە كوپ بالالى وتباسىلارعا ارناپ ءۇيلەر سالۋ مىندەتى تۇرعىنداردى باسپانامەن قامتۋدا كوپ مۇمكىندىكتەر بەرەدى.
