ايماقتار • 16 شىلدە، 2019

«قاسقاسۋ» تاۋ - شاڭعى كۋرورتىنىڭ جوباسى تالقىلاندى

480 رەت كورسەتىلدى

تۇركىستان وبلىسى تولە بي اۋدانىندا جۇزەگە اسىرىلۋى ءتيىس «قاسقاسۋ» تاۋ - شاڭعى كۋرورتىنىڭ جوباسى قازاقستاندا ءتۋريزمدى دامىتۋ جونىندەگى 2019-2025 جىلدارعا ارنالعان مەملەكەتتىك باعدارلاما اياسىندا «قازاقستاننىڭ تۋريستىك كارتاسى» توپ – 50 نىسانىنىڭ تىزىمىنە، سونداي-اق تۇركىستان وبلىسىن دامىتۋدىڭ 2019-2024 جىلدارعا ارنالعان كەشەندى جوسپارىنا ەنگىزىلدى. ياعني وتكەن عاسىردىڭ سەكسەنىنشى جىلدارىندا ۇسىنىس جاسالىپ، شامامەن 10 جىل بۇرىن حالىقارالىق ستاندارتتارعا ساي كەلەتىن تاۋ-شاڭعى كۋرورتى قۇرىلىسى جۇرگىزىلەتىنى جاريا ەتىلگەنىمەن ىسكە اسىرىلماي كەلە جاتقان جوبا ناقتى قولعا الىناتىنىنا العىشارتتار جاسالۋدا.

تولە بي اۋدانى، قاسقاسۋ ەلدى مەكەنى، «ەco Village كaskasu» دەمالىس ايماعىندا «قاسقاسۋ» تاۋ-شاڭعى كۋرورتىن دامىتۋ بويىنشا حالىقارالىق ساراپشىلاردىڭ قاتىسۋىمەن وتكەن «دوڭگەلەك ۇستەل» دە جوبانىڭ «قاعازدا قالمايتىنىن» اڭعارتادى. تۇركىستان وبلىسى اكىمىنىڭ ورىنباسارى م.مىرزاليەۆتىڭ باسشىلىعىمەن وتكەن   «دوڭگەلەك ۇستەلگە» مەملەكەتتىك ورگاندار، «Dianeige France»، «STEM International France»،  «MND Group France»  سياقتى حالىقارالىق كومپانيالاردىڭ ساراپشىلارى، رەسەي جانە ەلىمىزدىڭ حالىقارالىق شاڭعى فەدەراتسياسىنىڭ ينسپەكتورلارى قاتىستى. جيىنعا قاتىسقان كومپانيالاردىڭ تاۋ-شاڭعى كۋرورتىن قۇرۋ جانە دامىتۋ بويىنشا ۇلكەن تاجىريبەسى بار. مامانداردىڭ پىكىرىن ءبىلۋدى ماقسات ەتكەن جيىندا «MND Group France» كومپانياسىنىڭ ديرەكتورى فرەرە ەددي  جوبانىڭ تەحنيكالىق - ەكونوميكالىق تۇرعىدان ءتيىمدى جاسالىنعانىن جانە ءوڭىردىڭ دامۋىنا زور ۇلەس قوساتىنىن ايتتى. ال حالىقارالىق شاڭعى فەدەراتسياسىنىڭ ينسپەكتورى اندرەي وبىسكالوۆتىڭ ايتۋىنشا، جوبا جۇزەگە اسقاندا شاڭعى سپورتىنان قۇرلىقتىق جانە حالىقارالىق ءىس-شارالار وتكىزۋگە مۇمكىندىك پايدا بولادى.

بۇگىنگى تاڭدا «CG Group» كومپانياسى قوناق ءۇي كەشەندەرىن سالۋعا قىزىعۋشىلىق تانىتىپ وتىر. جالپى تاۋ - شاڭعىسى كۋرورت اۋماعى جوبا بويىنشا 2 نەگىزگى ايماققا بولىنگەن. ونىڭ بىرىندە 1 910-دەن 3 200 مەترگە دەيىنگى بيىكتىكتە ينفراقۇرىلىمى بار شاڭعى تراسسالارى، ارقان جانە دوڭەس جولدار، كوتەرگىشتەر، سەرۆيستىك عيماراتتار سالۋ كوزدەلسە، ەكىنشىسىندە 1600-دەن 1900 مەترگە دەيىن بيىكتىكتە قوناق ۇيلەر، مەيرامحانالار، اكۆاپارك،  سپورت جانە جاتتىعۋ ورتالىقتارىن سالۋ جوسپارلانعان. مامانداردىڭ مالىمدەۋىنشە، قازىرگى زامانعى تاۋ-شاڭعى كۋرورتىنىڭ قۇرىلىسى وڭىردە قىسقى سپورت تۇرلەرىن دامىتۋعا، وتاندىق تۋريزم يندۋسترياسى قىزمەتىنىڭ باسەكەگە قابىلەتتىلىگى مەن ساپاسىن ارتتىرۋعا، جاڭا جۇمىس ورىندارىن قۇرۋعا، الەۋمەتتىك ينفراقۇرىلىمدى دامىتۋعا، تۇركىستان وبلىسىنىڭ ينۆەستيتسيالىق تارتىمدىلىعىن ارتتىرۋعا مۇمكىندىك بەرەدى. جوبانى ىسكە اسىرۋدىڭ ءبىرىنشى كەزەڭىندە كەلۋشىلەر سانى 110 مىڭنان 140 مىڭ ادامعا دەيىن ارتادى دەپ بولجانۋدا.

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار