مارتوك اۋدانى رودنيكوۆكا اۋىلىندا «ەگىستىك كۇنى» اۋىلشارۋاشىلىق تەحنيكالىرىنىڭ كورمەسى ءوتتى. جانە اۋىلشارۋاشىلىعىنا قاتىستى ماڭىزدى ماسەلەلەردى تالقىلاۋعا ارنالعان سەمينار ۇيىمداستىرىلدى. اگرونومداردىڭ اۋقىمدى باسقوسۋىنا وبلىس اكىمى وڭداسىن ورازالين ارنايى قاتىسىپ, اۋىلشارۋاشىلىق سالاسىنداعى جاڭارتىلعان تەحنيكالارمەن تانىستى. سونداي-اق ءداستۇرلى تۇردە وتەتىن شاراعا جەرگىلىكتى 160-تان استام شارۋا قوجالىق باسشىلارى مەن باتىس, سولتۇستىك قازاقستان, قوستاناي وبلىستارىنان كەلگەن ماماندار دا بولدى. كەلگەن قوناقتار بيىل «رودنيكي اگرو», «بوردو ينداستريس», «تۋركۋاز ماشەنەري». ەۆرازيا گرۋپ», تب شارۋا قوجالىقتارىنىڭ اۋىلشارۋاشىلىق تەحنيكالارىن تاماشالادى. ماسەلەن, «رودنيكي اگرو» جشس ديحاندارى جاقىندا عانا 1 ملرد 300 ملن تەڭگەگە تراكتور, كومباين, سوڭعى ۇلگىدەگى وزىق تەحنيكالاردى ساتىپ العان. «ەگىستىك كۇنىنىڭ» ماقساتى اقتوبە ءوڭىرىنىڭ اۋىلشارۋاشىلىق سالاسىنداعى تسيفرلاندىرۋ جۇيەسىن كورسەتۋ, وزگە ءوڭىردىڭ ماماندارىمەن تاجىريبە الماسۋ بولىپ تابىلادى. بيىل وبلىستا 786 مىڭ گا جەرگە ءار-ءتۇرلى مايلى داقىل, ءداندى-داقىل, كوكونىس, جەمىس-جيدەك ەگىلگەن. بۇل وتكەن جىلمەن سالىستىرعاندا 8 % ارتىق. سونىمەن قاتار اقتوبە وبلىسىنىڭ ەگىن شارۋاشىلىعىنا 4,4 ملرد تەڭگە قارجى بولىنگەن. سونىڭ ىشىندە 800 ملن-عا جۋىق قاراجات سۋبسيدياعا ارنالعان. بۇل - شارۋالاردىڭ كاسىبىن دامىتۋعا جاسالعان ۇلكەن مۇمكىندىك.
تەحنيكالىق كورمەدەن سوڭ, مامانداردىڭ باس قوسۋىمەن سەمينار ءوتتى. سەمينارعا قاتىسۋشىلار اقتوبە وڭىرىندەگى ەگىن سالاسىن ودان ءارى دامىتۋ جولدارىن تالقىلاپ, پىكىرلەرىن ءبىلدىردى.
جيىن سوڭىندا وڭداسىن ورازالين اۋىلشارۋاشىلىق باسقارماسىنىڭ باسشىسى قۇسايىن سارسەنباەۆقا سالاداعى ەسكى تەحنيكالاردان ارىلىپ, الداعى ۋاقىتتا جاڭالاۋدى, سوڭعى ۇلگىدەگى تەحنيكالاردى ەنگىزىپ, ەڭبەك ونىمدىلىگىن ارتتىرۋدى تاپسىردى.
