اسكەري كەڭەس مۇشەلەرى العاشقى جارتىجىلدىقتاعى جاۋىنگەرلىك قىزمەتتى قورىتىندىلاۋ, وڭىرلىك قولباسشىلىقتار مەن اسكەري بولىمدەردەگى زاڭدىلىقتىڭ ساقتالۋى جانە قۇقىقتىق ءتارتىپ اسكەرىن تىلمەن قامتاماسىز ەتۋ ماسەلەلەرىن قاراستىردى.
وتىرىس بارىسىندا ىشكى ىستەر ءمينيسترى پوليتسيا گەنەرال-لەيتەنانتى ەرلان تۇرعىمباەۆ ۇلتتىق ۇلان جەكە قۇرامىنا جۇكتەلەتىن مىندەتتەردىڭ ماڭىزدىلىعى ارتىپ جاتقانىن اتاپ ءوتتى. سونىمەن قاتار اسكەردىڭ جەكە قۇرامىمەن جۇمىس جۇرگىزۋ, كادرلاردى كاسىبي تۇرعىدا دايارلاۋ جۇيەسىن ۇزدىكسىز جەتىلدىرىپ وتىرۋدىڭ قاجەتتىلىگىنە توقتالدى.
اسكەري كەڭەس مۇشەلەرى الدىندا ۇلتتىق ۇلان باس قولباسشىسى, گەنەرال-لەيتەنانت رۋسلان جاقسىلىقوۆ پەن «وڭتۇستىك» وڭىرلىك قولباسشىلىعىنىڭ قولباسشىسى, گەنەرال-مايور تالاپكەر امريەۆ بايانداما جاساپ, ارىس قالاسى تۇرعىندارىنىڭ قاۋىپسىزدىگىن قامتاماسىز ەتۋگە, اپات سالدارىن جويۋعا جانە قالا ىشىندە زاڭدىلىقتىڭ ساقتالۋىن قاداعالاۋعا بەلسەندى قاتىسقان اسكەري قىزمەتشىلەردىڭ ارەكەتىن اتاپ ءوتتى.
قۇقىق قورعاۋ ۆەدومستۆوسىنىڭ باسشىسى ەرلان تۇرعىمباەۆ جيىندى قورىتىندىلاي كەلە, وڭىرلىك قولباسشىلىقتارعا اسكەري بولىمدەردىڭ توتەنشە جاعدايلار كەزىندەگى جاۋىنگەرلىك دايىندىعى مەن قابىلەتىن ارتتىرۋدى مىندەتتەدى.
وتىرىس سوڭىندا ىشكى ىستەر ءمينيسترىنىڭ بۇيرىعىمەن قىزمەتتىك مىندەتتەرىن ادال اتقارعانى, سونداي-اق, ارىس قالاسىندا قوعامدىق ءتارتىپتى قامتاماسىز ەتۋگە جانە تۇرعىنداردى قاۋىپسىز ايماقتارعا شىعارۋعا, قالانى زالالسىزداندىرۋعا بەلسەنە قاتىسقانى ءۇشىن ۇلتتىق ۇلاننىڭ بىرقاتار اسكەري قىزمەتشىسىن گراموتالارمەن, توسبەلگىلەرمەن جانە مەدالدارمەن ماراپاتتادى.
