قازىرگى كۇنى وڭىردەگى ءىرى كومپانيالار وكىلدەرى مەن قايىرىمى مول جاندار اتالعان ەسەپشوتقا قاراجات اۋدارۋدى ودان ءارى جالعاستىرۋدا. بۇگىنگى كۇنى ارىس قالاسىنىڭ كوشەلەرىندە وق-ءدارى جارىلىسى سالدارىنان ب ۇلىنگەن نىسانداردى قالپىنا كەلتىرۋ جۇمىستارى قىزۋ جۇرگىزىلىپ جاتقانى ءمالىم. وسىنداي ساۋابى مەن شاپاعاتى مول ءىستىڭ سۇبەلى ۇلەسى اقتوبەلىك قۇرىلىسشىلاردىڭ ۇلەسىنە تيەدى. ولار ءوز ىستەرىن 12 اۋماق بويىنشا جۇرگىزۋدە. بۇعان 765 تۇرعىن-ءۇي جانە 5 الەۋمەتتىك نىسان ەنگىزىلگەن ەكەن. بۇگىندە ونىڭ بارىنە شۇعىل ءارى ساپالى تۇردە ءتيىستى زەرتتەۋ مەن انىقتاۋ جۇمىستارى جۇرگىزىلگەن. سول كەزدە اپات بولعان ۋاقىتتا 472 تۇرعىن ۇيگە ءار ءتۇرلى دەڭگەيدە زالال كەلگەنى انىقتالدى. ولاردىڭ بارىنە ءتيىستى اقاۋلى اكتىسى جاسالعان. سونداي-اق تەحنيكالىق تەكسەرۋلەردىڭ ناتيجەسى 3 ۇيگە سنارياد ءتۇسىپ, تولىقتاي ب ۇلىنگەنىن ايعاقتاپ وتىر. سوندىقتان ونىڭ 3-ءۋى دە قايتادان قالپىنا كەلتىرۋ نىساندارىنىڭ تىزىمىنە كىرمەيدى. ياعني بۇل ۇيلەردىڭ تۇرعىندارى ءۇشىن جاڭا باسپانالار تۇرعىزىلۋدا. قازىرگى كەزدە اقتوبەدەن ارنايى اتتانعان مامانداندىرىلعان بريگادالار ءتيىستى قۇرىلىس-مونتاج جۇمىستارىن جۇرگىزىلۋدە. سونىمەن بىرگە وڭىردەن كەلگەن وزگە مەردىگەرلىك ۇيىمدار ارىس قالاسىنىڭ جانىبەكوۆ كوشەسىندەگى 12 پاتەر مەن 1 جەكە تۇرعىن-ءۇيدىڭ شاتىرلارىن اۋىستىرۋ جۇمىستارىن اتقارۋدا. وسىلايشا قازىرگى كەزدە اقتوبەلىكتەردىڭ كومەگىمەن زالال كەلگەن 238 باسپانا تولىقتاي قالپىنا كەلتىرىلدى. بۇل ىستەردى اتقارۋعا 58 مامان جانە 7 ارنايى تەحنيكا بىرلىگى جۇمىلدىرىلعان.
اقتوبە وبلىسىنىڭ اكىمى وڭداسىن ورازالين ارىس قالاسىنا ارنايى بارىپ, اتالعان 12 اۋماقتاعى جوندەۋ جۇمىسىنىڭ جاي-كۇيىمەن تانىسۋى – ۇلكەن جاناشىرلىق پەن قامقورلىقتىڭ بەلگىسىندەي اسەر قالدىردى. سونىمەن بىرگە ءوڭىر باسشىسى اپات كەزىندە قازا تاپقان 2 ازاماتتىڭ وتباسىنا كوڭىل ايتىپ, ولارعا مورالدىق جانە ماتەريالدىق تۇرعىدان قولداۋ كورسەتتى.
وبلىس اكىمىنىڭ اقتوبەلىك مەردىگەر ۇيىمدارعا قويعان تالابى مەن تاپسىرماسى بىرەۋ عانا – بۇل بارلىق جۇمىستاردىڭ ساپالى اتقارىلۋى جانە ءوز ۋاقىتىندا اياقتالۋى بولىپ وتىر.
