كۇندەلىكتى كۇيبەڭ تىرلىكتەن قولىمىز ءسال بوساسا, كوپشىلىگىمىزدىڭ قوس جانارىمىز سمارتفونعا قادالاتىنى راس. YouTube حوستينگى نەمەسە ونلاين كينوتەاتردان قالاعانىڭدى كورەيىن دەسەڭ, قىزىلدى-جاسىلدى جارناماسى جارقىراپ, سان ءتۇرلى كازينو مەن بۋكمەكەرلىك ۇيىمدار كوز الدىڭا مەنمۇندالاپ تۇرادى دا قالادى. البەتتە, بۇعان كوپشىلىكتىڭ باسىم ءبولىگى يلانباس, دەسەك تە ءبىردى-ەكىلى ادام قىزىعۋشىلىقپەن سىلتەمەگە باس سۇعۋى ابدەن مۇمكىن. سول قىزىعۋشىلىق تالايلاردىڭ قارجىلىق ءارى مورالدىق-پسيحولوگيالىق احۋالىنا قوماقتى نۇقسان كەلتىرەدى.
ال قۇمارلىقتىڭ قۇرىعىنا ىلىنگەندەردىڭ سانى ەلىمىزدە 400 مىڭعا تاقاپ قالعان ەكەن. ولاردىڭ ارقايسىسىنىڭ قارىزى ورتاشا ەسەپپەن العاندا 10 ملن تەڭگەگە جەتەعابىل.
بۇل ورايدا ەكونوميكالىق تەرگەۋ قىزمەتىنە سۇراۋ سالىپ, رەسمي ستاتيستيكاعا قانىقتىق. قارجى مونيتورينگى كوميتەتى, پروفيلاكتيكالىق جۇمىس جانە باقىلاۋ باسقارماسىنىڭ اسا ماڭىزدى ىستەر بويىنشا جەدەل ۋاكىلى ەردەن جۇما 2018 جىلى زاڭسىز ويىن بيزنەسىنە قاتىستى 337 قىلمىستىق ءىس تىركەلگەنىن, سونىڭ 266-سى بويىنشا ءىس اياقتالعانىن ايتادى.
وسى رەتتە ەسكەرەتىن جايت, قولدانىستاعى زاڭعا ءسايكەس كازينو مەن ويىن اۆتوماتتارىن الماتى وبلىسىنداعى قاپشاعاي سۋ قويماسىنىڭ جاعالاۋىندا جانە اقمولا وبلىسىنىڭ ششۋچە اۋدانىندا جەرگىلىكتى اتقارۋشى ورگان بەلگىلەگەن اۋماقتا ورنالاستىرۋعا رۇقسات ەتىلگەن. باسقا ايماقتاردا ورنالاستىرۋعا زاڭمەن تىيىم سالىنعان. زاڭسىز ويىن مەكەمەسىن اشقانى, ۇستاعانى نەمەسە ولار ءۇشىن ءۇي-جايدى بەرۋمەن قاتار ويىن بيزنەسى سالاسىنداعى قىزمەتتى ليتسەنزياسىز جۇزەگە اسىرعانى ءۇشىن قىلمىستىق كودەكستىڭ 307-بابى بويىنشا 7 جىل باس بوستاندىعىنان ايىرۋ جازاسى كوزدەلگەن, – دەيدى ەردەن جۇما.
بۇعان قوسا بىلتىر قۇقىق قورعاۋشىلار ءتورت ترانسۇلتتىق قىلمىستىق توپتى قۇرىقتاپتى. انىقتالعانداي, زاڭدى بەلشەسىنەن باسقاندار 17 قالادا قۇمار ويىنحانالاردى ۋىسىندا ۇستاپ وتىرعان. ءتارتىپ ساقشىلارىنىڭ مالىمەتىنشە, زاڭسىز يندۋستريانىڭ كىرىسى 10-12 ملرد تەڭگەنىڭ اينالاسىندا بولعان.
قۇمار ويىنعا كۇيگەن كەيىپكەر
جاعىمسىز ستاتيستيكانى تولىقتىرعانداردىڭ ءبىرى ەلوردالىق
ن.و. دەگەن ازامات (كەيىپكەردىڭ قالاۋى بويىنشا ەسىمى جاسىرىن ساقتالدى). ءبىز بۋكمەكەرلىك
كەڭسەنىڭ قىزمەتىنە ءجيى جۇگىنەتىن تانىستارىمىزدىڭ ءبىرى ارقىلى بۇل كەيىپكەرمەن تانىسىپ-ءبىلىسىپ
الدىق. سونىمەن
24 جاستاعى ن.و. اقتوبەدەن باس شاھارعا 2014 جىلى كوشىپ كەلىپ, مەملەكەتتىك قىزمەتكە
ورنالاسقان. وسىدان ءبىر جارىم جىل بۇرىن ول جوعارىدا ايتىلعان ونلاين كازينونىڭ بىرىنە
كىرىپ, ولجالى بولۋدى قالاسا كەرەك. باستاپقىدا اجەپتاۋىر جەڭىستەرگە جەتىپ جۇرگەن.
الايدا, ۋاقىت وتە كەلە ويىنعا باسىبايلى بەرىلىپ كەتكەنىن ءوزى دە اڭداماي قالادى.
قۇمارتقانى سونشالىق, قىزمەتى بىلاي تۇرسىن, ءتىپتى ومىرلىك جارى مەن جورگەكتەگى بالاسىنا
نازار بۇرۋدى قويادى. ۇتقانىنان ۇتىلعانى كوبەيە بەردى. اقىرى ەسەسىن قايتارۋ ءۇشىن
نەسيە الىپ, قارىزعا بەلشەسىنەن باتىپ تىنادى. ناتيجەسىندە ايەلىمەن اجىراسىپ, قايعىسىن
شولمەكپەن باسۋعا تىرىسىپتى. سويلەسە كەلە شەشىلىپ سالا بەرگەن جىگىت كەي-كەيدە ومىرىمەن
قوش ايتىسۋعا بەكىنگەن ساتتەرى دە بولعانىن جاسىرماي ايتىپ بەردى.
– العاشىندا جاي قىزىعىپ, كازينونىڭ سايتىنا كىرىپ كوردىم. مەنىڭ جوعارى ءبىلىمىم بار, ازداپ ەسەپكە ءتاۋىرمىن. تىگىلەتىن ۇتىس پەن پايدالى كوەففيتسيەنتتىڭ جوعارى ەكەنىنە كوز جەتكىزگەن سوڭ نار تاۋەكەلگە بەل بۋدىم. كەرەمەتتەي جەڭىپ ءجۇردىم دەمەيمىن, بىراق ۇساق تيىن بولسا دا ۇتىستارىم ۇزىلمەيتىن. بىردە ۇيگە جۇمىستان شارشاپ كەلگەن ەدىم. ادەتتەگىدەي كومپيۋتەرگە وتىرىپ, ويىننىڭ ۇتىستارىن باقىلادىم. سوندا كۇندەگىگە قاراعاندا ايتارلىقتاي ۇلكەن «كۋش» (ۇلكەن اقشا) باسكە قويىلىپتى. ارينە مۇنداي مۇمكىندىكتى جىبەرۋدى ابەستىك بولار دەپ ەسەپتەدىم. سول سەبەپتى نەسيە كارتامداعى بار قاراجاتىمدى ۇتىسقا تىكتىم. بىراق كۇتكەنىم ورىندالمادى. بۇكىل قاراجاتتان ايىرىلىپ قانا قويماي, ءوزىم مينۋسقا كىرىپ كەتتىم. ەندىگى ماقسات شىعىننىڭ ورنىن جابۋ ءۇشىن ءبارىن قايتارىپ الۋ بولدى. ۇتىلعانىما شامدانىپ, بالاعا تولەنەتىن جاردەماقىنى دا ويىنعا سالدىم. جارىم قاتتى اشۋلاندى. بىراق سەنەسىز بە, مۇندايدا كوز تۇمشالانىپ قاسىڭداعى ادامداردى كورمەيدى ەكەنسىڭ. سەنى تەك جالعىز ماقسات قانا جەتەلەيدى – ۇتىلعان سومانى قايتارۋ. قۇددى ءبىر «زومبيگە» اينالىپ كەتەسىڭ. بۇل ءومىردىڭ ماعان بەرگەن ۇلكەن ساباعى. ونى ەسىمە ءتۇسىرۋدى قالامايمىن. بۇل تاۋەلدىلىكتەن ارىلۋ ءۇشىن جاقىندارىمنىڭ كومەگىمەن شۆەتسياعا بارىپ ەمدەلدىم. قۇدايعا شۇكىر, ومىرلىك جولداسىم جانە بالاممەن قايتا قاۋىشتىم. قازىر ۋاقىتتىڭ بارلىعىن وتباسىم مەن تۋىستارىما ارناپ ءجۇرمىن. بۇل ماعان بەرىلگەن سوڭعى مۇمكىندىك دەپ ەسەپتەيمىن. سوندىقتان ۋاقىتىمدى تەككە كەتىرگىم كەلمەيدى, – دەيدى قۇمار ويىنعا ابدەن كۇيگەن كەيىپكەرىمىز.
ءيا, بۇل ءبىر عانا ادامنىڭ باسىنان ءوتكەن جاعداي.
قوماقتى سالىق تولەيدى
دەي تۇرعانمەن قۇمار ويىندى قولدايتىن تاراپتىڭ دا ايتار ءۋاجى بار. ويىنحانالاردىڭ وكىلدەرى جىل سايىن مەملەكەت قازىناسىنا شامامەن 10-13 ملرد تەڭگە سوماسىندا سالىق تۇسىرەتىنىن ايتادى. سونىمەن قاتار بۇل ءىستىڭ تامىرىنا بالتا شابىلسا, ءبىزدىڭ نىساندارىمىزدى تۇنشىقتىرىپ تاستاسا, وندا وتاندىق مەكەمەلەردىڭ ورنىن شەتەلدىك ويىنحانالار الماستىرادى دەپ دابىل قاعىپ وتىر.
ال ولار ينتەرنەت رەسۋرستى پايدالاناتىندىقتان, زاڭدى اينالىپ ءوتۋ ەش قيىندىققا سوقپايتىنىن جەتكىزدى. تيىسىنشە سىرتتان اۋدارىلاتىن سالىق جونىندە ايتۋدىڭ ءوزى ارتىق. وسىلايشا مەملەكەت كولەڭكەلى ەكونوميكانىڭ قانات جايۋىنا جول اشادى دەيدى وتاندىق بۋكمەكەرلەر. بۇدان قالدى جۇمىسسىزدىق دەڭگەيى دە ازداپ وسەدى. ويتكەنى اتالعان سالادا شامامەن سەگىز بەن ون مىڭنىڭ ارالىعىندا قازاقستاندىق كۇندەلىكتى نانىن تاۋىپ ءجۇر. سوندىقتان ساراپشىلار بۇل ماسەلەدە باسقا جولدى قاراستىرۋعا كەڭەس بەرەدى.
ەندى شارتاراپتاعى جاعدايدى ساراپتاساق. قۇمار ويىن تۇرلەرىن دامىتىپ, ەلدىڭ ەكونوميكاسىنا دا قىرۋار تابىس ءتۇسىرىپ وتىرعان ەڭ ۇلكەن مەكەمەلەر اقش-تا شوعىرلانعانى بەلگىلى. «AGA State of the States» باسىلىمىنىڭ ەسەبىنشە امەريكالىق ويىنحانالار 2017 جىلى 40 ملرد دوللار كولەمىندە كىرىس تاپقان.
امەريكالىق باسقا دا كومپانيالاردىڭ احۋالى جامان ەمەس كورىنەدى. ماسەلەن, نەۆاداداعى كازينولار 2017 جىلى 980 ملن دوللار شاماسىندا پايدا تاۋىپتى. امەريكاداعى ايگىلى ويىنحانالاردىڭ دەنى لاس-ۆەگاستا ورنالاسقانىن ەسكەرسەك, ولاردىڭ جىلدىق تابىسى 110,3 ملن دوللاردى قۇراعان.
مۇحيتتىڭ ار جاعىندا ونلاين-كازينو جەلىسى دە تۇراقتى دامىپ جاتىر. دالىرەك ايتقاندا, بىلتىر ينتەراكتيۆتى ويىن سەكتورىنىڭ اقشالاي ءتۇسىمى 2017 جىلمەن سالىستىرعاندا 28%-عا ۇلعايعان.
ساراپشىلار ازيا نارىعى دا باسەكەگە تۇسەتىندەي دەڭگەيگە جەتكەنىن ايتادى. مىسالى, 2018 جىلى امەريكالىق Wynn ويىن وپەراتورىنىڭ ماكاوداعى بولىمشەسىندە كىرىس ديناميكاسى 187,4 ملن دوللار شاماسىندا بايقالىپتى. ماكاو بۇل يندۋستريانىڭ «سارى قۇرلىقتاعى» ورتالىعى بولىپ سانالادى.
كورشىلەس رەسەي مەملەكەتىندە ويىنحانا بيزنەسى نەگىزگى 4 ايماققا بولىنگەن. سوچيدەگى «كراسنايا پوليانادان» وتكەن جىلى رەسەي قازىناسىنا 1, 47 ملرد رۋبل سالىق تۇسسە, «پريمورە» ويىن ايماعىنان 100 ملن رۋبل اۋدارىلدى. بيىل بۇل سوما – 110 ملن رۋبلگە ارتادى دەپ كۇتىلۋدە. ال «يانتارنايا» ايماعىنان ساراپشىلار 100 ملن رۋبل قاراجات ەل بيۋدجەتىنە ترانسفەرتتەلەدى دەپ بولجاپ وتىر.
قاراپ وتىرساق, قۇمار ويىندى زاڭمەن رەتتەپ, ەلدىڭ ەكونوميكاسىنا قىرۋار تابىس ءتۇسىرىپ, جۇزدەگەن مىڭ ادامدى جۇمىسپەن قامتىپ وتىرعان ەلدەر بار ەكەن. الايدا, ءوز ءوزىن يگەرە الماي, ويىنحانالاردىڭ تابالدىرىعىن اتتاعاننان كەيىن «ءسۇرىنىپ كەتىپ, ءب ۇلىنىپ جۇرگەن تاعدىرلار دا» تولىپ جاتىر.
جاقسىلىق مۇراتقالي,
«Egemen Qazaqstan»
