بازاراليەۆتىڭ بايلىعى اقالتەكەدەن… بەكىرەگە دەيىن
جۇما, 25 قاڭتار 2013 7:07
ەلگە ەسىمى بەلگىلى كاسىپكەر, وبلىستىق ءماسليحاتتىڭ دەپۋتاتى, «لۋگوۆوي جىلقى زاۋىتى» جشس-نىڭ ديرەكتورى حاليت بازاراليەۆتىڭ شارۋاشىلىعى, نەگىزىنەن, اسىل تۇقىمدى جىلقىلاردى باعۋمەن, باپتاۋمەن جانە ولاردى ءتيىمدى باعاعا ساتۋمەن شۇعىلدانادى. اتىنىڭ ءوزى ايتىپ تۇرعانداي, ەرتەرەكتە وسى زاۋىتتىڭ ابسەنت اتتى اسىل تۇقىمدى اقالتەكەسى باسقا رەكوردتارى مەن جۇلدەلەرىن بىلاي قويعاندا, ريم وليمپياداسىنىڭ چەمپيونى (1960), توكيو وليمپياداسىنىڭ قولا جۇلدەگەرى (1964) اتانىپ, ءتىپتى مەحيكو وليمپياداسىنان دا قۇر قايتپاي, 4-ورىنعا تۇراقتاپ, اتى دۇنيە جۇزىنە ءماشھۇر بولعان تەكتى دە سۇلۋ جانۋار ەدى.
جۇما, 25 قاڭتار 2013 7:07
ەلگە ەسىمى بەلگىلى كاسىپكەر, وبلىستىق ءماسليحاتتىڭ دەپۋتاتى, «لۋگوۆوي جىلقى زاۋىتى» جشس-نىڭ ديرەكتورى حاليت بازاراليەۆتىڭ شارۋاشىلىعى, نەگىزىنەن, اسىل تۇقىمدى جىلقىلاردى باعۋمەن, باپتاۋمەن جانە ولاردى ءتيىمدى باعاعا ساتۋمەن شۇعىلدانادى. اتىنىڭ ءوزى ايتىپ تۇرعانداي, ەرتەرەكتە وسى زاۋىتتىڭ ابسەنت اتتى اسىل تۇقىمدى اقالتەكەسى باسقا رەكوردتارى مەن جۇلدەلەرىن بىلاي قويعاندا, ريم وليمپياداسىنىڭ چەمپيونى (1960), توكيو وليمپياداسىنىڭ قولا جۇلدەگەرى (1964) اتانىپ, ءتىپتى مەحيكو وليمپياداسىنان دا قۇر قايتپاي, 4-ورىنعا تۇراقتاپ, اتى دۇنيە جۇزىنە ءماشھۇر بولعان تەكتى دە سۇلۋ جانۋار ەدى.
دەگەنمەن, ح.بازاراليەۆ ءبۇگىندە اسىل تۇقىمدى جىلقى شارۋاشىلىعىمەن عانا اينالىسىپ قويماي, سونىمەن بىرگە ءوز مۇمكىندىگىن باسقا سالالاردان دا ىزدەستىرىپ كورۋدە. سونىڭ ءبىرى – بالىق شارۋاشىلىعى. بۇل ىسكە ول زاماناۋي تەحنيكا مەن تەحنولوگيانىڭ ارقاسىندا قول جەتكىزدى. ياعني اۋداننىڭ ءشولدى-شولەيتتى ايماعىنا ورنالاسقان اۋىلدىڭ قاسىنان تەرەڭدىگى 250 مەتر جەر استى سۋىن شىعارىپ, ءشولدى ءوڭىردى كولدى وڭىرگە اينالدىردى. اگرونوميا عىلىمىنىڭ تىلىندە «تامشىلاتىپ سۋارۋ» دەگەن ءادىستى دە ومىرگە اكەلدى. ال سۋ بار جەردە, نۋ بار, نۋلى جەردە بالىق بار. بەكىرە بالىعىن كوبەيتۋ باستاماسى دا وسىدان تۋعان. بۇگىندە بازاراليەۆتىڭ بەكىرەلەرى جاساندى كولدىڭ وزىندە-اق ۋىلدىرىق شاشىپ, كوبەيىپ جاتىر. ءبىر شارۋاشىلىققا 5 مىڭ بەكىرە ازىرگە از ەمەس. ولار بىرەر جىلدىڭ بەدەرىندە بۇدان بىرنەشە ەسە كوبەيۋى مۇمكىن.
سوندىقتان بولار, ۇلت داستارقانى ءۇشىن تاڭسىق ءدام بولىپ سانالاتىن ءونىمدى وندىرۋگە دەن قويعان كاسىپكەر, بالىق ونەركاسىبىن وركەندەتۋ ءۇشىن زاۋىتىنا شەتەلدىك قوندىرعىلار ورناتۋدا. گەرمانيادان اكەلىنگەن بۇل تەحنولوگيا بالىق ەتتەرىن بۇقتىرىپ, قالبىردان جاسالعان ارنايى ىدىستارعا اۆتوماتتى تۇردە جاباتىن بولادى.
– بەكىرە بالىعىن ءبىر يگەرىپ الساق, ءارى قاراي جۇرت اسا ءسۇيسىنىپ جەيتىن قىزىل بالىقتى دا اكەلىپ, ونى دا كوبەيتەتىن بولامىز, – دەيدى حاليت بازاراليەۆ مىرزا.
بەرەكەلى ازامات بازاراليەۆ باسقاراتىن لۋگوۆوي جىلقى زاۋىتىندا بۇگىندە اۋداننىڭ مىڭنان استام ادامدارى ەڭبەك ەتەدى. ويتكەنى, مۇندا اسىل تۇقىمدى اقالتەكە جىلقىلارىن باعىپ, كۇتۋدەن باسقا, ءىرى قارا مەن «تالپاق تاناۋ» شارۋاشىلىقتارى دا قاتار دامىعان. سونداي-اق, كاسىپكەردىڭ ەگىن سالاسى مەن قۇرىلىس يندۋسترياسى دا وركەندەپ تۇر. ال بيوگاز ونەركاسىبى ءوز الدىنا ءبىر توبە.
قىسقاسى, حاليت بازاراليەۆتىڭ اقالتەكەدەن بەكىرە بالىعىنا دەيىنگى بايلىعىنىڭ قىزىعىن تاۋ مەن قۇمنىڭ ورتاسىن كولبەپ جاتقان اۋدان تۇرعىندارى دا ءبولىسىپ, ءبىر اتانىڭ بالاسىنداي تاتۋ-ءتاتتى ەڭبەك ەتىپ جاتىر.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى,
تۇرار رىسقۇلوۆ
اتىنداعى اۋدان,
كوگەرشىن اۋىلى.
سۋرەتتە: لۋگوۆوي جىلقى زاۋىتى كەشەنىندەگى ابسەنت ەسكەرتكىشى.
