قازاقستان رەسپۋبليكاسىنىڭ جەكپە-جەك چەمپيوناتى ورال قالاسىندا ءوتتى. 41433 اسكەري ءبولىمىنىڭ اسكەري قىزمەتشىسى ەفرەيتور وتار نۇربەك ءوز كەزدەسۋلەرىن 65 كيلوگراممعا دەيىن سالماقتا وتكىزدى. ول توردا وتكەن 4 بەلدەسۋىنىڭ ەكەۋىن ۋاقىتىنان بۇرىن جەڭسە, ەكەۋىندە ەسەپ سانى ايىرماشىلىعى بويىنشا باسىم ءتۇستى. جارىس ناتيجەسى بويىنشا ول ەل چەمپيونى اتاعىمەن قوسا, الەم بىرىنشىلىگىنە جولداماعا جانە جەكپە-جەكتەن سپورت شەبەرى اتاعىنا يە بولدى.
بۇگىنگى كۇنى, ەفرەيتور وتار نۇربەك «باتىس» وڭىرلىك قولباسشىلىعىنىڭ ارنايى ماقساتتاعى بولىمشەلەرىنىڭ بىرىندە قىزمەت اتقارىپ, قارۋلى كۇشتەردىڭ ۇزدىك سپورتشىلارىنىڭ ءبىرى بولىپ تانىلدى. سوڭعى جەڭىستەن باسقا, ول ەلىمىزدىڭ قويان-قولتىق ۇرىسىنان, اسكەري قويان-قولتىق ۇرىسىنان قازاقستان چەمپيونى, «قازاق جاۋىنگەرى» فورماتىندا وتكەن قارۋلى كۇشتەردىڭ چەمپيوناتىنىڭ جۇلدەگەرى, سونىمەن قوسا, MMA جانە Alem Fighters نۇسقاسى بويىنشا ارالاس جەكپە-جەك كەزدەسۋلەرىنە قاتىسىپ ءجۇر.
«جەكپە-جەك» ءبىزدىڭ ەلىمىزدىڭ ۇلتتىق سپورت ءتۇرى ساناتىنا جاتادى جانە ول كۇرەس, كيكبوكسينگ, سامبو, كاراتە, تحەكۆاندو, قازاقشا كۇرەس ەلەمەنتتەرىنەن قۇرالعان جانە اياق-قولمەن ۇرۋ, لاقتىرۋ, ۇستاۋ, اۋىرتۋ ادىستەرىن قولدانۋعا رۇقسات ەتىلگەن بەلسەندى سپورت ءتۇرى. ەرتە كەزدەرى, قازاق اسكەرلەرىندە وسى سپورت ءتۇرى ەرەكشە كەڭىنەن تارالعان ەكەن.
