«قازاق وقىرماندارى مۇستاي كارىمنىڭ ەسىمىن ەرەكشە قۇرمەت تۇتادى. الماتىداعى كىتاپحانالاردا اقىننىڭ قازاق جانە ورىس تىلدەرىندە جارىق كورگەن جۇزدەن اسا كىتاپتارى ساقتالعان. اقىننىڭ تۋعانىنا 100 جىل تولۋىنا ارنالعان بۇگىنگى شاراعا قازاقستاننىڭ اسا كورنەكتى قالامگەرلەرى مەن مەملەكەت جانە قوعام قايراتكەرلەرى قاتىسىپ وتىر. بۇل مۇستاي كارىمنىڭ حالىققا ەتەنە جاقىن, الەم ادەبيەتىنە ورتاق تۇلعا ەكەنىن كورسەتەدى»,- دەدى باقىتجان ساعىنتاەۆ.
ايتۋلى كۇنگە وراي ەلىمىزگە ارنايى كەلگەن مۇستاي كارىمنىڭ نەمەرەسى ءارى اقىن اتىنداعى قوردىڭ قۇرىلتايشىسى ت. كاريموۆ قالامگەردىڭ ارۋاعىنا كورسەتىلگەن ولشەۋسىز قۇرمەتى ءۇشىن كۇللى قازاق حالقىنا العىسىن ءبىلدىردى. بۇگىن ولەڭ مەن جىردىڭ قاسيەتتى ورداسىنا اينالعان الماتى تورىندە «مۇستاي كارىم – 100 جىل» اتتى حالىقارالىق عىلىمي-تاجىريبەلىك كونفەرەنتسيا وتەدى.
كارىم مۇستاي, مۇستافا سافيچ كاريمي – باشقۇرت اقىنى, سوتسيوليستىك ەڭبەك ەرى (1979). العاشقى شىعارمالارى 1935 جىلدان جاريالانا باستادى. تۇڭعىش جيناعى «وترياد قوزعالدى» دەپ اتالسا (1938), 1941 جىلى «جازعى داۋىستار» اتتى ەكىنشى جيناعى جارىق كوردى. سوعىس جىلدارىندا جاۋىنگەرلەر ومىرىنەن «جەلتوقسان جىرى», «ولمەسباي» اتتى پوەمالار جازدى. ول سوعىستان كەيىن «ءبىزدىڭ ءۇيدىڭ قۋانىشى» پوۆەسىن (1952), «كوكتەم داۋىسى» (1954), «وزەندەر سويلەيدى» (1964), «الىستا قالعان جاعالار» (1966), «جىلدار ىزىمەن» (1971) جيناقتارىن جاريالادى. مۇستاي كارىمنىڭ «توي جالعاسۋدا» (1947), «جالعىز قايىڭ» (1950), «قىز ۇرلاۋ» (1959), «جىرلانباعان جىر» (1961), «اي تۇتىلعان ءتۇن» (1964) اتتى پەسالارى بار. ونىڭ «ءۇش تاعان» (1965), «ءتالتۇس» (1972) اتتى كىتاپتارى قازاق تىلىنە اۋدارىلعان. مۇستاي كارىم رەسەيدىڭ ك.س. ستانيسلاۆسكي اتىنداعى مەملەكەتتىك سىيلىعىنىڭ (1967), باشقورتوستان مەملەكەتتىك سىيلىعىنىڭ (1967), كسرو مەملەكەتتىك سىيلىعىنىڭ (1972) لاۋرەاتى.
الماتى
