كەندى كەنتتىڭ كەسپەسى
سەنبى, 12 قاڭتار 2013 7:49
ول يمپورتتىق ونىمنەن الدەقايدا ساپالى
كەدەن وداعىنا كىرەردە «رەسەي مەن بەلورۋسسيادان كەلەتىن تاۋارلار ءنوپىرى ءبىزدىڭ كاسىپكەرلەردى جۇمىسسىز قالدىرادى» دەگەن قاڭقۋ ءسوز دۋىلداپ بارىپ باسىلعان. دۇنيەجۇزىلىك ساۋدا ۇيىمىنا كىرۋگە دايىندىق جۇمىستارى ءبىراز جىلدان بەرى ءجۇرگىزىلىپ كەلەدى. بۇل تۋرالى ءسوز بولا قالسا «دۇكەن سورەلەرى سىرتتان كەلەتىن ساپالى ارزان تاۋارلارعا تولىپ كەتەدى-اۋ, ءبىزدىڭ وندىرۋشىلەر باسەكەگە شىداس بەرە الار ما ەكەن؟..» دەگەن كۇدىككە بوي ۇرۋشىلار دا جوق ەمەس.
سەنبى, 12 قاڭتار 2013 7:49
ول يمپورتتىق ونىمنەن الدەقايدا ساپالى
كەدەن وداعىنا كىرەردە «رەسەي مەن بەلورۋسسيادان كەلەتىن تاۋارلار ءنوپىرى ءبىزدىڭ كاسىپكەرلەردى جۇمىسسىز قالدىرادى» دەگەن قاڭقۋ ءسوز دۋىلداپ بارىپ باسىلعان. دۇنيەجۇزىلىك ساۋدا ۇيىمىنا كىرۋگە دايىندىق جۇمىستارى ءبىراز جىلدان بەرى ءجۇرگىزىلىپ كەلەدى. بۇل تۋرالى ءسوز بولا قالسا «دۇكەن سورەلەرى سىرتتان كەلەتىن ساپالى ارزان تاۋارلارعا تولىپ كەتەدى-اۋ, ءبىزدىڭ وندىرۋشىلەر باسەكەگە شىداس بەرە الار ما ەكەن؟..» دەگەن كۇدىككە بوي ۇرۋشىلار دا جوق ەمەس. ال ەلىمىزدە ءبىر-ەكى جىلدان بەرى دامۋدىڭ كەپىلىنە اينالعان ۇدەمەلى يندۋستريالىق-يننوۆاتسيالىق باعدارلاما بويىنشا جۇزەگە اسىرىلىپ جاتقان جوبالاردىڭ باسىم بولىگى ءىرى وندىرىستەردەن نەمەسە اۋىل شارۋاشىلىعىنان ورىن الدى. رۋدنىيلىق جاس كاسىپكەر ازامات نۇرعازين تۇتىنۋشىلاردان سۇرانىسقا يە ءونىم ءوندىرەتىن كاسىپورىن اشۋ تۋرالى كوپتەن ويلاناتىن. سول ويىن جۇزەگە اسىرۋ ءۇشىن تەز دايىندالاتىن كەسپەنى سەگىز اي بويى زەرتتەدى. ەرىنگەن جوق, الدىمەن رەسەيدىڭ كورشى وبلىستارىنا باردى, قازاقستاننىڭ وڭتۇستىك وبلىستارىن ارالادى. قىتايدان اكەلىنەتىن كەسپە دۇكەندەردە سىقاپ تولىپ تۇرعانمەن تەز وتەدى. جولاۋشى شىققاندار دا پويىزدىڭ ىشىندە ءيىسىن بۇرقىراتىپ كەسپە جەيدى, تۇستىك تاماق ءۇشىن دە جۇمىسقا وسى تاعامدى الاتىندار از ەمەس.
– قىتايدىڭ كەسپەسىن جۇرتشىلىق كوپ العانمەن, ودان اسقازانى سىر بەرگەندەر تولىپ جاتىر. كەسپەنىڭ تەڭ جارتىسى بيداي ۇنى ەمەس. ويتكەنى, قىتاي ءبىزدىڭ ەل سياقتى استىققا باي ەل ەمەس قوي, ولاردىڭ ءوزى ۇندى سىرتتان ساتىپ الادى, – دەيدى تەز دايىندالاتىن كەسپە شىعارىپ وتىرعان «اق بارىس» نك» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ازامات نۇرعازين. – ءبىز باسەكەگە توتەپ بەرۋ ءۇشىن تەك عانا ساپاعا جۇگىنۋىمىز كەرەك. كەسپەنى ساپالى ەتەتىن ونىڭ قۇرامى عانا. ال ەلىمىزدەگى استىق دەرجاۆاسى سانالاتىن قوستانايدا وتىرىپ, قىتاي عۇرلى كەسپە وندىرە الماساق ۇيات-تاعى!
وسى كەزگە دەيىن كەسپەنى سىرتتان اكەلگەندە تاسىمال, كەدەن شىعىنى تۇتىنۋشىعا جەتكەنگە دەيىن تاۋاردىڭ وزىندىك قۇنىن كوتەرىپ جىبەرەتىن. ساپاسى ءوز الدىنا. وسىنىڭ بارلىعىن كاسىپكەر بۇگە-شىگەسىنە دەيىن ەسەپتەپ, رۋدنىي قالاسىندا زاۋىت اشۋعا بەل بايلاعان. جاقسى ءىس جەردە قالمايدى. يننوۆاتسيالىق-ينۆەستيتسيالىق جوبانىڭ قۇنى 150 ميلليون تەڭگە تۇردى. شىعىننىڭ باسىم بولىگىن «دامۋ» كاسىپكەرلىكتى دامىتۋ قورى» اكتسيونەرلىك قوعامى سۋبسيديالادى. قازىر زاۋىتتا كەسپە وزىق تەحنولوگيالىق جەلىدە دايىندالادى. الدىمەن ۇلكەن ىدىستان ءبولىنىپ تۇسەتىن قامىر جۇقالاپ جايىلادى, ودان كەسىلەدى دە بۋعا پىسىرىلەدى, ەڭ سوڭىندا قۋىرىلادى. وسى ۇدەرىستىڭ بارلىعى ساناۋلى مينۋتتاردا اتقارىلادى. ەڭ باستىسى, كەسپە قۇرامىنىڭ 90 پايىزىنان استامى قازاقستاندىق مازمۇنعا يە. كەسپەنىڭ قامىرى تەك قوستانايلىق جوعارى جانە ءبىرىنشى سورتتى ۇننان, تۇزدان, سۋدان تۇرادى. ال سيىر ەتى, تاۋىق, ساڭىراۋقۇلاق جانە اسشايان ءدامىن بەرەتىن دامدەۋىشتەرى جانە پالما مايى عانا سىرتتان اكەلىنەدى.
– مۇنداي دامدەۋىشتەردى الەمدە تەك ۆەتنام, قىتاي ەلدەرى جاسايدى. ءبىر قۇپيامىزدى سىزگە اشايىن, الداعى ۋاقىتتا وسى دامدەۋىشتەردى دە وزىمىزدە جاسايمىز دەگەن جوسپارىمىز بار. ال قىتايدان, رەسەيدەن شىعارىلاتىن كەسپەلەر قۇرامىنداعى كونسەرۆانتتاردى, جۇمسارتقىشتاردى, جاساندى بوياعىشتاردى قولدانبايمىز. ولار كەسپەنىڭ ءدامىن, ءتۇسىن جاقسارتقان سياقتى بولعانىمەن, ادام دەنساۋلىعىنا زيان ەكەنى بەلگىلى, – دەيدى ازامات نۇرعازين.
قازىر قوستاناي وبلىسىندا ءوسىمدىك مايىن شىعاراتىن زاۋىتتىڭ ءوزى بەس-التىعا جەتتى.
– كەسپەنى قۋىرۋعا نەگە جەرگىلىكتى وسىمدىك مايىن پايدالانبايدى؟
– كەز كەلگەن وسىمدىك مايىنا قۋىرىلعان كەسپە ءبىر ايدان كەيىن اشىپ كەتەدى ەكەن. ال پالما مايىنا قۋىرىلعاندىقتان رۋدنىيلىق كەسپەنىڭ ساقتاۋ مەرزىمى ءبىر جىل. گوست وسىلاي بەكىتكەن, ال شىندىعىندا كەسپە 38 ايعا دەيىن دامدىك ساپاسىن بۇزبايدى, – دەيدى ازامات نۇرعازين.
وتكەن جىلى ءونىمنىڭ ەكولوگيالىق تازالىعى ءتۇبىرلى تەكسەرىلگەننەن كەيىن, ول «حالال» سەرتيفيكاتىنا لايىق دەپ تابىلدى. ديرەكتوردىڭ ايتۋىنشا, كەسپەنى «حالال» ستاندارتىمەن شىعارىپ وتىرعان الەمدەگى جالعىز كاسىپورىن رۋدنىي قالاسىنداعى «اق بارىس» نك» جاۋاپكەرشىلىگى شەكتەۋلى سەرىكتەستىگىنىڭ زاۋىتى عانا. ال بۇل زاۋىتتىڭ قازاقستاندا ءبىرىنشى رەت اشىلىپ وتىرعانىن ەسكە سالۋدىڭ دا ارتىقتىعى جوق.
– مۇنداي زاۋىت كورشى رەسەيدە بار. ءبىزدىڭ ولاردان ارتىقشىلىعىمىز, بىرىنشىدەن, ساپاسىندا, ال ەڭ باستىسى, باعاسىندا دەسەك بولار. ويتكەنى, كەسپەنى ورايتىن پوليەتيلەن قالتالار, سالاتىن كارتون جاشىكتەر رۋدنىي مەن كورشى ليساكوۆ قالالارىندا وندىرىلەدى. بۇل دا ءونىمنىڭ قازاقستاندىق مازمۇنىن بايىتۋمەن قاتار, وزىندىك قۇنىن كەمىتە تۇسەدى, – دەيدى كاسىپكەر.
قازىر تۇساۋىن كەسكەنىنە ءبىر جارىم اي عانا بولعان زاۋىتتىڭ ءونىمى رەسەيدىڭ كورشى وبلىستارىنا, ارمەنياعا, قازاقستاننىڭ وڭتۇستىك, باتىس وبلىستارىنا جىبەرىلدى. ەندى جاقىندا عانا سوناۋ سىبىردەن دە سۇرانىس ءتۇسىپ, ءونىم ارتىلدى. زاۋىت ايىنا 8 ميلليون وراما كەسپە شاعاراتىن بولادى. «GRiTO» ساۋدا ماركاسىمەن ساتىلاتىن كەسپەنى تەك كورشىلەر عانا ەمەس, الىس شەت ەل تۇرعىندارى دا سۇراتاتىنىنا, كەيبىرەۋلەردىڭ كۇدىگىن كوبەيتكەن كەدەن وداعى دا, دۇنيەجۇزىلىك ساۋدا ۇيىمى دا رۋدنىيلىق زاۋىت پايداسىنا جۇمىس ىستەيتىنىنە كاسىپكەر سەنىمدى. ايتپاقشى, تەز دايىندالاتىن كەسپە جاڭا جۇمىس ورنىن تاپقان 45 رۋدنىيلىقتىڭ قولىنان وتەدى.
ءنازيرا جارىمبەتوۆا,
«ەگەمەن قازاقستان».
رۋدنىي.
