جۇلدىزدى ءسات
سەيسەنبى, 1 قاڭتار 2013 8:27
زىمىران ۋاقىتتىڭ تاعى ءبىر جىلى ارتتا قالدى. وتكەن جىلعا شىعىسقازاقستاندىقتاردىڭ وكپەسى جوق. كەندى التاي جۇرتشىلىعى 80 جىلدىق مەرەيتويىن استا-توك اتاپ وتپەسە دە, ەل ەسىندە قالاتىنداي ءماندى دە ءساندى وتكىزدى. سپورت سارايىنا جينالعان التى مىڭعا تارتا وبلىس جۇرتشىلىعى اسەم ءان مەن ءتاتتى كۇيدى تىڭداپ, وبلىستىڭ وركەندەۋى جايلى ءفيلمدى, تەاترلاندىرىلعان كورىنىستەردى تاماشالادى.
سەيسەنبى, 1 قاڭتار 2013 8:27
زىمىران ۋاقىتتىڭ تاعى ءبىر جىلى ارتتا قالدى. وتكەن جىلعا شىعىسقازاقستاندىقتاردىڭ وكپەسى جوق. كەندى التاي جۇرتشىلىعى 80 جىلدىق مەرەيتويىن استا-توك اتاپ وتپەسە دە, ەل ەسىندە قالاتىنداي ءماندى دە ءساندى وتكىزدى. سپورت سارايىنا جينالعان التى مىڭعا تارتا وبلىس جۇرتشىلىعى اسەم ءان مەن ءتاتتى كۇيدى تىڭداپ, وبلىستىڭ وركەندەۋى جايلى ءفيلمدى, تەاترلاندىرىلعان كورىنىستەردى تاماشالادى. ەلۋدەن استام ەڭبەك وزاتتارى مەملەكەتتىڭ وردەندەرى مەن مەدالدارىمەن ماراپاتتالدى. ونەر مەن مادەنيەت سالاسىنىڭ قىزمەتكەرلەرى, وبلىستىق پۋشكين اتىنداعى كىتاپحانانىڭ ديرەكتورى حابيبا اقجىگىتوۆا ۇزاق جىلعى جەمىستى قىزمەتى ءۇشىن «قۇرمەت» وردەنىمەن ماراپاتتالدى. «قالامقاس» ءانسامبلىنىڭ ءانشىسى ب.شاعاتاەۆا «قازاقستاننىڭ ەڭبەك سىڭىرگەن قايراتكەرى» اتاعىنا يە بولدى. قوجالىق يەسى ۆ.گ.ۆوراپاي «بارىس» وردەنىن, ءوندىرىس وزاتتارى مەن قوجالىق يەلەرى مەملەكەتتىك ناگرادالاردى ومىراۋىنا تاقتى. ولارعا ءوڭىر باسشىسى ب.ساپارباەۆ سالتاناتتى جاعدايدا قۇرمەت كورسەتتى.
2013 جىلى شىرايلى شىعىستا ەلەۋلى جاڭالىقتار بولماق. وسكەمەندەگى جامبىل اتىنداعى وبلىستىق دراما تەاترىنا ءجۇز جىلدان استى. تاريحي ەسكەرتكىشكە جاتاتىن دراما تەاترىنا بۇدان ءتورت جىل بۇرىن «جول كارتاسى بويىنشا 43 ميلليون تەڭگەگە كۇردەلى جوندەۋ جۇرگىزىلگەن ەدى. بىراق ەسكىنىڭ اتى ەسكى. تەاتردىڭ ەكى اياعىنان تىك تۇرۋىنا ەرەكشە ەڭبەك سىڭىرگەن تالانتتى رەجيسسەر ءارى ديرەكتورى رۇستەم ەسداۋلەتوۆ جاڭا تەاتر قۇرىلىسىن سالۋ جونىندە ءوڭىر باسشىسىنا ناقتى دالەل كەلتىرىپ ءجۇرىپ, جاڭا قۇرىلىستىڭ باستالۋىنا مۇرىندىق بولعان. اقىرى 600 ورىندىق جاڭا تەاتردىڭ قۇرىلىسى 2011 جىلى باستالدى. امانشىلىق بولسا, تەاتر 2013 جىلى اشىلىپ, وعان تالانتتى رەجيسسەر, اكتەر, اقىن رۇستەم ەسداۋلەتتىڭ ەسىمى بەرىلمەك.
وڭىردە مادەنيەت سالاسىنا ەرەكشە كوڭىل بولىنگەن. كاتونقاراعاي اۋدانىنىڭ ۇلكەن نارىن اۋىلىندا ونەر ءۇيى اشىلماق. سونداي-اق, ۇلان اۋدانىنىڭ ساعىر جانە تايىنتى اۋىلدارىندا كلۋبتار اشىلماق. وسىدان ءۇش جىل بۇرىن تاربايعاتاي اۋدانىنىڭ بىرنەشە ەلدى مەكەندەرىندە تاسقىن سۋ بولىپ, بىرنەشە اۋىلداردا جۇزدەگەن تۇرعىن ۇيلەر ىستەن شىققان. ءاسىرەسە, كوكجىرا جانە ءجانتەكەي اۋىلدارى قاتتى زارداپ شەكتى. اتالعان ەكى اۋىلدا بەس جۇزگە تارتا تۇرعىن ءۇي, الەۋمەتتىك مەكەمەلەر ىسكە قوسىلدى. جاڭا جىلان جىلىندا ەكى اۋىلدا دا كۇن تالابىنا ساي مادەنيەت ۇيلەرى بوي كوتەرمەك. زايسان اۋدانىندا دا 60 پاتەرلىك تۇرعىن ءۇي, بىرنەشە كلۋب اشىلماق. قاراشوقىداعى بالالار دەمالاتىن ورىن, اۋدان ورتالىعىنداعى بايتەرەك, تاۋەلسىزدىك مونۋمەنتى الىستان مەنمۇندالايدى.
«وسكەمەن قۇس فابريكاسى» جاۋاپكەرشىلىگى شەكتەۋلى سەرىكتەستىگى قازىر جىلىنا 20 مىڭ توننا ەت ءوندىرىپ جاتىر. كاسىپورىن ونىڭ دامۋىنا تاياۋداعى ءۇش-ءتورت جىلدا 6 ميلليارد تەڭگە قارجى سالماق. 2013 جىلى كاسىپورىن قۇس ەتىنەن بىرنەشە ءتۇرلى شۇجىق تاعامدارىن شىعارۋدى مەجەلەدى.
«ازيا-اۆتو» كولىك قۇراستىرۋ زاۋىتىندا بۇل كۇندەرى جۇردەك تە ساپالى 20-عا تارتا تۇلپار قۇراستىرىلىپ شىعارىلىپ جاتىر. كاسىپورىن باسشىسى ەرجان مانديەۆتىڭ ايتۋىنشا, 2013 جىلى زاۋىتتا شەتەلدىڭ بىرنەشە جاڭا ءتۇرىن شىعارۋدا جۇمىستار اتقارىلىپ جاتىر. ەلىمىزدەگى تۇڭعىش اۆتوكولىك قۇراستىرۋ زاۋىتى رەسەيدىڭ «لادا» كورپوراتسياسىمەن بىرلەسىپ, الداعى ۋاقىتتا ساپالى ماشينالار شىعارۋدا ىزدەنىس پەن ىلكىمدىلىك تانىتۋدا. ال سەمەي قالاسىنداعى «سەماز» جاۋاپكەرشىلىگى شەكتەۋلى سەرىكتەستىگى 2013 جىلدىڭ سوڭىندا «بەلارۋس» تراكتورىنىڭ جاڭا ءتۇرىن شىعارۋدى مەجەلەپ وتىر. وعان قوسىمشا كورەيانىڭ كاسىپكەرلەرىمەن بىرلەسىپ اتالمىش ءوندىرىس ورنىندا «جەدەل جاردەم» كولىگىن شىعارۋ دا جۇزەگە اسپاق. جاقىندا وبلىس اكىمى ب.ساپارباەۆ وڭتۇستىك كورەياعا ساپارى كەزىندە ەكى جاقتى كەلىسىگە قول قويدى. جىلان جىلىندا ءۇرجاردان الماتىعا توتە ۇشاتىن ۇشاق شالعايداعى اۋدان تۇرعىندارىن قۋانىشقا بولەگەلى وتىر.
«كازتسينك», «وسكەمەن تيتان-ماگني كومبيناتى», «شىعىس قازاقستان ءماشينا جاساۋ زاۋىتى» ۇجىمدارى جاڭا جىلدان ءۇمىت كۇتەدى. وبلىس بويىنشا جالپى قۇنى 611,9 ميلليارد تەڭگە بولاتىن 39 ينۆەستيتسيالىق جوبا ەلىمىزدىڭ يندۋستريالاندىرۋ كارتاسىنا ەنگىزىلگەن. ونىڭ ءبىرازى جۇزەگە استى. بۇل جوبا تولىعىمەن جۇزەگە اسقاندا 22,2 مىڭ ادام جۇمىسپەن قامتاماسىز ەتىلمەك.
شىرايلانعان شىعىستىڭ شارىقتاعان شاعى تولايىم تابىستارمەن ەل ەسىندە قالماق.
وڭداسىن ەلۋباي,
«ەگەمەن قازاقستان».
وسكەمەن.
