حالىقارالىق قارجى ورتالىقتارىنىڭ دۇنيەجۇزىلىك اليانسى (WAIFC) نۇرسۇلتان نازارباەۆقا احقو قۇرعانى ءۇشىن, سونداي-اق حالىقارالىق قارجى ورتالىقتارى اراسىنداعى جاھاندىق ىنتىماقتاستىقتى دامىتۋداعى ەلباسىنىڭ ەلەۋلى ەڭبەگى ءۇشىن قۇرمەت ماراپاتىن بەردى.
ماراپات جىل سايىنعى «Astana Finance Days» قارجىلىق كونفەرەنتسياسى اياسىندا تاپسىرىلدى. ماراپاتتى تۇڭعىش پرەزيدەنت اتىنان احقو باسقارۋشىسى قايرات كەلىمبەتوۆ قابىلدادى.
حالىقارالىق قارجى ورتالىقتارىنىڭ دۇنيەجۇزىلىك اليانسى باسقارما مۇشەلەرىنىڭ الدىندا سويلەگەن سوزىندە ق. كەلىمبەتوۆ احقو-نىڭ جۇمىس ىستەگەن العاشقى جىلعى جەتىستىكتەرىن اتاپ ءوتتى. «تۇڭعىش پرەزيدەنت جارلىعىن باسشىلىققا الا وتىرىپ, احقو الەمدەگى كوپتەگەن دامىعان جانە دامۋشى حالىقارالىق قارجى ورتالىقتارى مەن بيرجالارمەن ارىپتەستىك قارىم - قاتىناس ورناتتى», - دەدى ول.
WAIFC اتىنان باسقارۋشى ديرەكتور د-ر يوحەن بيدەرمانن قارجى قىزمەتتەرىنە, قازاقستان رەسپۋبليكاسىنىڭ باعالى قاعازدار نارىعىن دامىتۋعا جانە ونىڭ حالىقارالىق كاپيتال نارىقتارىمەن ينتەگراتسيالانۋىن قامتاماسىز ەتۋ ءۇشىن تارتىمدى جانە اشىق حالىقارالىق ورتا قۇرۋ ارقاسىندا ەلدىڭ ەكونوميكاسىنا ينۆەستيتسيا تارتۋداعى احقو - نىڭ نەگىزگى ءرولىن مويىنداۋ بەلگىسى رەتىندە رەسپۋبليكانىڭ تۇڭعىش پرەزيدەنتى-ەلباسىعا قۇرمەت ماراپاتىن تاپسىردى.
