تالدىقورعان قالاسىنىڭ 6-شاعىن اۋدانىنداعى 16 قاباتتان تۇراتىن 3 ءۇي «نۇرلى جەر» باعدارلاماسى بويىنشا جۇزەگە سالىنىپ, تۇرعىن ءۇي قۇرىلىسى جيناعىن جاساعان ازاماتتارعا بۇيىردى. قولدانىسقا بەرىلگەن تۇرعىن ءۇي عيماراتىنىڭ جالپى اۋدانى 22 مىڭ شارشى مەتردى قۇرايدى. 230 پاتەردىڭ توقسان ەكىسى 1 بولمەلى, توقسان ەكىسى 2 بولمەلى جانە 46- پاتەرى 3 بولمەلى. جاڭا قونىس يەلەرىن باسپانالى بولۋلارىمەن جانە استانا كۇنىمەن وبلىس اكىمى اماندىق باتالوۆ قۇتتىقتادى.
- بيىل وبلىس بويىنشا 800 مىڭ شارشى مەتر تۇرعىن ءۇيدى پايلالانۋعا بەرۋ جوسپارلانۋدا. تەك «نۇرلى جەر» باعدارلاماسىنىڭ وزىنە عانا 27,9 ملرد.تگ بولىنگەن. بۇل قاراجاتقا 1279 پاتەردەن تۇراتىن 334 تۇرعىن ءۇي سالۋ كوزدەلگەن. ونىڭ ىشىندە كوپبالالى وتباسىلاردى تۇرعىن ۇيمەن قامتۋ ەرەكشە نازاردا. 2025 جىلعا دەيىن وبلىسىمىزدىڭ 5 مىڭعا جۋىق از قامتىلعان وتباسىلارى باسپانامەن قامتىلماق,- دەدى وبلىس اكىمى اماندىق باتالوۆ.
سونداي-اق, استانا كۇنىندە ۇشتوبە قالاسىنىڭ 100 وتباسى باسپانا كىلتى تابىس ەتىلدى. قاراتال اۋدانىنىڭ ورتالىعىندا پايدالانۋعا بەرىلگەن 40 جانە 60 پاتەرلىك ەكى كوپقاباتتى تۇرعىن ءۇي كوپتەن بەرى جەكە باسپاناعا مۇقتاج بولىپ جۇرگەن كوپبالالى جانە جالعىزباستى انالارعا, مۇمكىندىگى شەكتەۋلى جاندارعا, مۇگەدەك بالاسى بار نەمەسە مۇگەدەك بالا تاربيەلەپ وتىرعان جانۇيالارعا, زەينەتكەرلەرگە, اتا-انا قامقورلىعىنان ايىرىلعان بالالارعا, ۇوس ارداگەرلەرى جانە ۇوس مۇگەدەگىنە تەڭەستىرىلگەندەرگە, بيۋدجەتتىك سالا قىزمەتكەرلەرىنە بەرىلدى.
ءۇي يەلەرىنە باسپانا كىلتىن وبلىس اكىمى اماندىق باتالوۆ تابىس ەتتى. باسپانا كىلتتەرىن تابىستاپ, قۇتتىقتاۋ تىلەگىن جەتكىزگەننەن كەيىن ءوڭىر باسشىسى جاڭا ۇيدەگى ەكى پاتەرگە كىرىپ, قۇرىلىس ساپاسىنا قاتىستى ءۇي يەلەرىنىڭ پىكىرىن تىڭداپ, ولارعا تەلەديدار سىيلادى. وسىدان كەيىن اماندىق عابباس ۇلى 60 پاتەرلى جالدامالى كوپقاباتتى ۇيگە بارىپ, وندا دا قونىس يەلەرىن استانا كۇنىمەن جانە قۋانىشتى ساتتەرىمەن قۇتتىقتادى.
الماتى وبلىسى
